Read Ibibiliya mu Shimakonde Imbodi Yaambi na dimbande dya Imbodi Yakala Mateu 26 Bible Online

Mateu 26 - Ibibiliya mu Shimakonde Imbodi Yaambi na dimbande dya Imbodi Yakala bible

Mateu 26

¹Napanelo Yesu akamalile kutangola malove ala uti, andívaulila vakwoda vake kushidoni,

²“Mwenu mundimanya kenga andibakila maduva mavili pakulota kuwika Pasaka. Mwana Wamunu vanankamudya kwavanu pakulota vankamele panshalaba.”

³Napanelo vanang'olo vavakulangalalela-shadaka namu vanang'olo vavenentete vandíkadyania paing'ande imwe nkúlangalalela-shadaka nkumene aijá wavanshema Kaipashi

⁴kutwala kwikala nguguvale wakuteja ntego vankamule na vammyae.

⁵Napane vovo vo vashishidoni, “Haunave wakati washikukulu mwaa inkuulukika venentete kutenda mandamano akupinga.”

⁶Napanelo Yesu àvele ku Betaniya paing'ande imwe Simoni wamalemba

⁷àikele pandamu, popo po kuwika nkongwe jumo ànyukete ishupa yamauta akunung'angila auka njuluku woe kutwala kummiminangila mmuti.

⁸Vakwoda vake pavagwene shitendo asho kuvanyatila, vanavo do, “Da asala ai uti yanyamani?

⁹Mauta ala vakandishumidya na njuluku woe namene kutwala kuvapa vákave pashinu.”

¹⁰Yesu amanya makumbukililo ave andítangola kushidoni, “Mwaa shani nkongwe jo munkumwangaishanga? Nae aningutandela shinu shambone.

¹¹Vákave pashinu vo, ngwengwe mundapagwanavo napane nangu, hangupagwa ngwengwe namu mwenu.

¹²Nae andimiminangila mauta mumili mwangu pakulota angupanganiange yakungushika.

¹³Ninkumwaulila mwiu doni, kula kushinu kwavalota kuvalanganga ntenga wambone mushilambo amu, namomo vinu vyatandile nkongwe aju vandavalanganga kenga kumbukumbu kwake nae.”

¹⁴Napanelo jumo pakati pa avalá kumi na mbili, aijá walina Yudashi Shikaliyote, andívaukila vanang'olo vavakulangalalela-shadaka

¹⁵ndavaudya doni, “Mulota kungulipa nyamani nangu ndikankamudya mwenu Yesu jo?” Vanavo kutwala kunnipa dishingo salasini dyalyava.

¹⁶Bai kutunduvangila apo, Yudashi ashindalambela litala lyakunkamudidya kwavanavo.

¹⁷Napanelo muliduva litandi lyashikukulu shamagung'u ákave nkukumuku, Yesu vandímuukila vakwoda vake ndamudya doni, “Da Pasaka ai, ulota tukakupanganiangidye pashi ulye?”

¹⁸Nae kushidoni, “Wena kunjini ko mukatangole na munu jumo kushidoni, ‘Mwalimu atédoni, “Wakati wangu undivandika, nadoni paing'ande pako apa ndatandela Pasaka na vakwoda vangu.” ’ ”

¹⁹Mwiu vakwoda vake kutenda kenga mo mwavatumidile; vanavo vandípanganianga Pasaka ayo.

²⁰Pauwikile wakati wayalyulo Yesu kwikala pandamu na vakwoda vake.

²¹Akuno valya kutwala kuvaulila doni, “Ninkumwaulila mwiu doni, pakati penu jumo anangulimya.”

²²Vakwoda vake kutwala kuvaida shipalodi shoe namene na kutunduvanga kudya vaashidoni, “Nang'olo, da nangu apa?”

²³Nae kushidoni, “Aijá álidya pandamu namu nangu ni jojo álota kungulimya.

²⁴Mwana Wamunu andapalela kenga mo mwavandikidile vamwamba nae napane apambale aijá álota kunnimya Mwana Wamunu jo! Munu ajo kudyanga hanavalekwe.”

²⁵Kutwala Yudashi aijá nannimya kumudya, “Labi, da nangu apa?” Yesu kushidoni, “Wako ni úvalanganga.”

²⁶Muwakati wavashilya, Yesu akatwala ligung'u kwalaliya kutwala kumajanianga kuvapa vakwoda vake aashidoni, “Twala mulye! Au ni mili wangu.”

²⁷Namomo akatwala shikombe akalambwalela kutwala kuvapa vakwoda vake aashidoni, “Kumbilanga uti mwenu apa.

²⁸Avi apa ni myadi vyangu, myadi vyaimbodi vivajaikíla voe kwakulivalivigwa kwamadambi.

²⁹Ninkumwaulila doni, mwiko hangukumbila kavili ugwalwa au wavyepo mpaka muliduva alyo lyangulota kukumbila ugwalwa waambi namu mwenu muutawala umwe Atata.”

³⁰Vakaimba lwimu kutwala kuumananga kuka kulishinga lyamilandi vya Ulivela.

³¹Napanelo Yesu ankuvaulila kushidoni, “Mwenu uti shilo sho shanelo ashi munangwambukanga mwaa indyandikigwa doni, “ ‘Nammyaa nkúshunga kutwala dingandolo dyamushipinga asho kumwadilikananga.’[73]

³²Napane pangudyuka po, nangu ndalangalela kuka ku Galileya.”

³³Patulu kutwala kushidoni, “Ata ikava kenga vavangu ava uti vandakuleka, nangu mwiko handikuleka!”

³⁴Yesu kushidoni, “Ninkukwaulila mwiu doni, shilo sho shanelo ashi ng'uku akanava kukangavela unangukana myanda mitatu.”

³⁵Patulu do, “Ata ikava yakupela namu wako, nangu mwiko handikukana.” Kutwala vakwoda vake vanji uti kutangalela momo.

³⁶Napanelo Yesu ankuka pamo na vakwoda vake kulyutu lyavashema Geteshemani na ankuvaulila kushidoni, “Ikalanga apa! Nangu nguka mushu amulá ndashwali.”

³⁷Nae kuntwala Patulu namu vanavake Shebedeu vavili. Bai kutunduvanga kumwida shipalodi na kumwida kwangaikanga

³⁸kutwala kushidoni, “Ungumi wangu unkuvanavo shipalodi shakutadya kupela. Mwenu ikalanga popo apa, mupimile namu nangu.”

³⁹Nae akauka mushu padyoko kugwa ing'ope kutindya pai kutwala kushwali aashidoni, “Atata, ikaululika nyemya pamili pangu luwene alu[74] ila haunatende mwangulatela nangu, tenda mwaulatela wako umwene.”

⁴⁰Bai nae ankuja, ankuvakodya vakwoda vake vàvele mulwono kutwala kumudya Patulu, “Shasho! Da mwenu po hamuvé dimongo dyakupimila namu nangu ata isaa imo vela ai?

⁴¹Pimila na shwali pakulota hamunainjile mukutubigwa! Imumu mwiu inkuva tayali, mili ni udabadabénge.”

⁴²Nae akauka kavili mwanda wambili kutwala kushwali aashidoni, “Atata, ikava kenga hayululika luwene alu kunyema bila kukumbila nangu, bai ive mo mwaulatela wako umwene.”

⁴³Akauja kavili kuvakodya vàlalenge mwaa mevo ave andidapelwa na lwono.

⁴⁴Nae akavaleka kuka kavili ndashwali mwanda wantatu aujidya malove lolo matandi.

⁴⁵Bai ankuujila kwavakwoda vake kutwala kushidoni, “Da mpaka ambi munkulala? Doni po munkupumula? Mwenu, undiwika wakati wavalota kunkamudya Mwana Wamunu kumakono kwavakutega.

⁴⁶Takatukanga tuke! Wakungulimya jo, andivandika!”

⁴⁷Napanelo Yesu akuno atangola kwidinneu Yudashi jumo pakati pa avalá kumi na mbili pamo na imbumba yavanu vànyukatenge maambila na dilungu. Vanu avo, vandítumigwa na vanang'olo vavakulangalalela-shadaka na vanang'olo vavenentete.

⁴⁸Jo wakunnimya jo andívapa shimanyikilo aashidoni, “Munu jo wangulota kumwambatila ni jojo, mwenu nkamulinneu.”

⁴⁹Nae kukinneu kumwe Yesu ndaashidoni, “Labi, umumi?” Bai kutwala kumwambatila.

⁵⁰Yesu kushidoni, “Mbwana, tenda shawidilile.” Bai avalá vavé namu nae vakamuukila Yesu kunkamula kumunga.

⁵¹Napanelo mwe! Jumo pakati pa avalá vavé namu Yesu akakamula lyambila lyake, kwalamola, kummyaa ntumika wake nkúlangalalela-shadaka nkumene kutwala kunnumula lyatu lyake.

⁵²Yesu kushidoni, “Jela lyambila lyako mwishavi! Uti avalá vakulupíla maambila andavapedya lo maambila.

⁵³Da nangu naulule kunjugwangila Atata kutwala nae kutumididyanneu dimbumba dyavanjelo vaing'ondo dyakupunda kumi na mbili?

⁵⁴Na davo po alota kuwikila dashi popo Maandiko atédoni, ‘Indivaikila itandakele momo’?”

⁵⁵Muwakati wowo Yesu kutangalela imbumba kushidoni, “Kenga nkalau shamwida na maambila na dilungu kwida nangukamula? Kula liduva ngushindapagwa mwing'ande ya Nnungu ngwìkele ngupundisha ata hamunguungile.

⁵⁶Uti avi vinkutandeka pakulota awikile popo Maandiko avakulava.” Bai vakwoda vake uti vanínneka kutwala kutukutanga.

⁵⁷Napanelo avalá vankamwíle Yesu vandímuukanavo kwing'ande imwe Kaipashi nkúlangalalela-shadaka nkumene kulyutu lyavakadyaniénge vamwalimu vadishaliya pamo na vanang'olo.

⁵⁸Patulu ashindamwoda Yesu kwakushu mpaka mulugwani lwankúlangalalela-shadaka nkumene jo. Nae akainjila kutwala kwikala pamo na vakushunga pakulota aone ashilá shilóta kutandeka.

⁵⁹Bai vanang'olo vavakulangalalela-shadaka pamo na ikamati uti vashindalambela ushuda waushwang'a pakulota vammalidye,

⁶⁰napane havapatíle ata ikava kenga vandípatikananga vashuda voe. Kudabanga vila kwida vanu vavili

⁶¹naashidoni, “Aju apa ashitangola doni, ‘Nangu ninkuulula kubamalanga ing'ande yake Nnungu kutwala kudenga kwamaduva matatu kumalila.’ ”

⁶²Bai nkúlangalalela-shadaka nkumene kutakatuka kutwa kushidoni, “Da hashipali shakujang'ula vyavakutambudyanga avi?”

⁶³Yesu kumalala. Nkúlangalalela nkumene jo do, “Palina lya Nnungu mumi, twaulila ikava kenga wako ni Klistu aijá mwanagwe Nnungu!”

⁶⁴Yesu kushidoni, “Wako ni útangola. Leka apo kutunduvangila ambi apa mundamwona Mwana Wamunu àikele kunkanakono kwake Wadimongo-uti na aida mumaundi kuwa.”

⁶⁵Bai nkúlangalalela-shadaka nkumene aijá andípapulanga dinguvo dyake aashidoni, “Andikupulu! Napane tulambela ushuda shani kavili? Mwenu mundigwa kukupulu aku.

⁶⁶Napanelo mwona dashi?” Vanavo do, “Inimmaikila apele.”

⁶⁷Bai vanavo kunshunangila mata kumevo, kunkanyola na kunkoma malatuma

⁶⁸vaashidoni, “Wako Klistu, tuvalangangila akukanywelé nyani?”

⁶⁹Napanelo Patulu andíikala mulugwani kutwala ntumika jumo mwali kumuukila ndamwaulila doni, “Nawako uvele pamo namu Yesu wa ku Galileya.”

⁷⁰Nae kukana vanu uti vamwigwa aashidoni, “Shawamba wako sho nangu hangunamanya shinu.”

⁷¹Bai pashuumila pannango walugwani, ntumika junji nkongwe kumwona kutwala kuvaulila vanu vavéle apo kushidoni, “Munu aju avele pamo namu Yesu wa ku Nashaleti.”

⁷²Patulu kukana alilapa mwanda unji aashidoni, “Nangu munu ajo hanimmanyite.”

⁷³Muwakati padyoko vanu vavéle mulyutu alyo vandímuukila ndamwaulila kushidoni, “Wako mwiu wamushipinga shosho tunkukumanyila shitangodi shako.”

⁷⁴Nae kutunduvanga kulitaa dilana na kulilapa, “Nangu munu ajo hanimmanyite!” Ng'uku kutwala kukangavalenneu.

⁷⁵Patulu kukumbukilinneu malove atangwéle Yesu kushidoni, “Ng'uku akanava kukangavela wako unangukana myanda mitatu.” Nadoni nae andyúmila panda ndatumbula ing'uto.