Read Ibibiliya mu Shimakonde Imbodi Yaambi na dimbande dya Imbodi Yakala Mateu 28 Bible Online

Mateu 28 - Ibibiliya mu Shimakonde Imbodi Yaambi na dimbande dya Imbodi Yakala bible

Mateu 28

¹Napanelo likapite liduva lyakupumula, palishitunduvanga liduva litandi lyaishumana, Maliya wa ku Magadalena namu Maliyamwagwe vandyúka ndalola shonga.

²Mwe! Kwashingangala kuumilila shindangenda shakujowa, kuwa ko kwaloka njelo wake UMU kwida ndagang'ola lijanga kutwala kwikalila.

³Njelo jojo jo, avele wakumalameta, dinguvo dyake divele dyakushwalela kenga lila.

⁴Vaing'ondo váshishunga shonga sho vandítatamela kwamwaa wakujopa mpaka kwaneka kenga vandipalanga.

⁵Napane njelo jo kuvaulila vakongwe vo kushidoni, “Hamunajope! Nangu ndimanya kenga mwenu munnambela Yesu wavankamadile panshalaba.

⁶Nae apa hapali. Andidyuka kwodana na kenga mo mwatangaladíle. Ida mulole davo palyutu lyaléle.

⁷Wena shipajelo mukavaulile vakwoda vake doni, nae po andidyuka pakati pavakupela. Nadoni ankuka alangalela ku Galileya, koko ko mwenu mundamwona. Lola, nangu apa nimmanyiya tayali.”

⁸Vakongwe avalá vakaumananga shipajelo shosho vatukuta akuno vàvenavo kujopa na lipuwilo likumene, vandyúka ndavamanyiya vakwoda vake.

⁹Kwashingangala Yesu kuvaumililila kutwala kushidoni, “Mmangumi!” Vanavo kumuukila, kumwambatila mmadodo mwake kutwala kulipudya.

¹⁰Bai Yesu andívaulila kushidoni, “Hamunajope! Wena mukavaulile vanung'unuvangu vauke ku Galileya, koko ko vanangwona.”

¹¹Vakongwe vauka, mwe! Vaing'ondo vanji váshishunga shonga vandyúja kuka kukaja ndavavalangangila vanang'olo vavakulangalalela-shadaka vinu uti vitandéke.

¹²Napane vanang'olo vavakulangalalela-shadaka vo pavaikele nguguvale pamo na vanang'olo vandyúnganila kuvapa vaing'ondo njuluku woe kutwala kuvalaililila doni,

¹³“Mwenu valanganga doni, ‘Shilo wetu tulele lwono, vandída vakwoda vake ndaiva mili.’

¹⁴Napanelo ing'ano ai ikawika kwanang'olo walijimbo, wetu tunantumbilikanga kwambangidya mwenu hamunapate shaushanga.”

¹⁵Vanavo vakapwashalela njuluku kutwala kutandedya kenga momo mwavapakanidile. Bai lilove alyo kutwala kwandavala pakati pavayuda uti mpaka nelo.

¹⁶Napanelo vakwoda vake Yesu kumi na moja vandyúka ku Galileya mpaka ndawika kulishinga lyavalatadíle Yesu.

¹⁷Vanavo vakamwone, vandílipudya ila vanji pakati pave po, vashindamwambambidya.

¹⁸Yesu kutwala kuvavandika kuvaulila kushidoni, “Vaningukamudya madalaka uti kuwa na pai.

¹⁹Napavedoni wena mukavatadye vanu vave vakwoda vangu muvenentete uti muvabatisha palina lya Tata, lya Mwana na lya Imumu Wanashwe

²⁰na muvapundisha kutandedya uti avilá vyaninnamulidile. Nadoni nangu ninkupagwa namu mwenu mumaduva uti mpaka mwisho wawakati.”