Read Ibibiliya mu Shimakonde Imbodi Yaambi na dimbande dya Imbodi Yakala Mateu 3 Bible Online

Mateu 3 - Ibibiliya mu Shimakonde Imbodi Yaambi na dimbande dya Imbodi Yakala bible

Mateu 3

¹Napanelo mumaduva alo andyúmilila Nshuwau Wakubatisha kushimbweshe sha ku Yudeya alaililila

²aashidoni, “Lijugulange mwaa utawala wakuwa undivandika.”

³Aju ni jo wammalangénge nkúlava Ishaiya doni, “Lidi linkwigwinika kushimbweshe, ‘Kandyanga indila yake UMU aalowa mwalota kupita.’ ”[6]

⁴Jo Nshuwau aju ashigwala dinguvo dyavakandyénge na magwimbu angamila, kulyunga nkanda waligwogwe na shakulya shake kuva madalombwe na ushi wakunundu.

⁵Napanelo koko ko, vashindamuukila vayelusalemu, vammakaja uti a ku Yudeya na vamudisemu uti dyananyenje mwake lundi lwa Yudani.

⁶Vanavo vashindabatishigwa namu nae mulundi lwa Yudani akuno valivalanganga madambi ave.

⁷Napanelo pavagwene mapalishayo na mashadukayo voe vaida ndapata ubatisho kwake, nae kushidoni, “Mmana mmadinyoka dyaishumu mwe! Anyinyitidilé nyani kutila shaushanga shake Nnungu shída?

⁸Lodya vyepo vilódya kulijugulanga.

⁹Hamunakumbukile kutangola vila muntima, ‘Tatagwetu wetu Abulaamu.’ Ninkumwaulila doni, lo majanga ala Nnungu ankuulula kundyuwidya Abulaamu vana.

¹⁰Imbedo vandilumika palindi lwannandi tayali. Kula nnandi úkapa vyepo vyambone, vandálumula kujela pamoto.

¹¹“Nangu mwenu apa, ninkumbatisha na medi kulodya kulijugulanga. Napane ling'oto lyangu nangu ankwida munu wadimongo kungupunda nangu wandikavaidile nangu kumuulanga vilatu vyake. Nae mwenu po, anambatisha na Imumu Wanashwe na moto.

¹²Ankuvanavo shombo shakupatangila vyakulya mmakono mwake; andakandyanga palugwa pake kuntwala ngano jo kuntaa mushidimbi kanji makadakada lo, andataa moto úkadimika.”

¹³Napanelo Yesu ankuma pa Galileya kuka ku Yudani akapate ubatisho kumwe Nshuwau.

¹⁴Nshuwau napane ankulingangila kunneya, “Nangu ni ngúvaikidile wako ungubatishe. Napanelo uma dashi wako kungwidila nangu?”

¹⁵Yesu kutwala kunjang'ula kushidoni, “Kwaambi apa leka ive yadavo mwaa indituvaikila tuwishe popo ishaliya uti.” Nshuwau kwitikila.

¹⁶Nadoni po papatile ubatisho, Yesu andyúma mmedi mo kutwala muwakati wowo, mwe! Pamevo pake kuwa kushimuka, nae kumwona Imumu wake Nnungu wakuva mwang'unda ashuluka kwida ndamwikala.

¹⁷Bai lidi lyakwalakela kuwa kushidoni, “Aju ni mwanangu wakunagwaleka, kwamwaa wake nae ninkupuwanga namene.”