Read Ibibiliya mu Shimakonde Imbodi Yaambi na dimbande dya Imbodi Yakala Mateu 5 Bible Online

Mateu 5 - Ibibiliya mu Shimakonde Imbodi Yaambi na dimbande dya Imbodi Yakala bible

Mateu 5

¹Napanelo Yesu akone dimbumba adilá, andíkwela palishinga kwikala. Vakwoda vake pavammandike,

²andítunduvanga kuvapundisha aashidoni,

³“Vandyalaligwa avalá vamashikini mwimumu, mwaa vanavo utawala wakuwa wàve.

⁴Vandyalaligwa avalá valíla, mwaa vanavo vandapambadyangigwa.

⁵Vandyalaligwa avalá valishapéya, mwaa vanavo vandapata shilambo kuva shave.

⁶Vandyalaligwa avalá vavénavo indala na inyota yaishaliya, mwaa vanavo vandaikuta.

⁷Vandyalaligwa avalá vavénavo shididi, mwaa vanavo vandaanangiligwa shididi.

⁸Vandyalaligwa avalá vavénavo mitima víkave ushapu, mwaa Nnungu, vanavo vandamwona.

⁹Vandyalaligwa avalá vatandédya amani, mwaa vanavo vandashamegwa vana vake Nnungu.

¹⁰Vandyalaligwa avalá vapapatígwa kwamwaa waishaliya, mwaa vanavo utawala wakuwa wàve.

¹¹“Mundyalaligwa mwenu pavantukananga, pavampapata, pavantangalela vinu uti vyakunyata, vanambilila kwamwaa wangu nangu.

¹²Litamange na puwangila mwaa inudyo yenu kuwa ko ing'umene. Amo nimomo mwavavatandalele vakulava mwenu mukanava.

¹³“Mwenu ni munyu wamushilambo, napane munyu ukadalala ulota kunogwa dashi kavili? Wanavo haunavanavo kavili madengo ila pavanajaa vanu ni kuluvatanga tu.

¹⁴Mwenu ni lilangadyo lyamushilambo na njini uvéle pashanya lishinga, haunapiika.

¹⁵Namomo hapali ánakaledya itaa kuvika nshilongo ila vavika pashinu pakwaneka pakulota ivamulikile vanu uti vapagwíte nng'ande amo.

¹⁶Nadoni inimmaikila lilangadyo lyenu limulike pakati pavanu pakulota vone matendo enu ashalowa na vamupe lishangelo Tatagwenu ávele kuwa.

¹⁷“Hamunakumbukile kenga ngwidilé ndamalidya Lilamulo na Vakulava. Hangwidile ndamalidya, ngwidilé ndatadya viwikile popo vinu avyo.

¹⁸Ninkumwaulila mwiu doni, shilambo shakuwa na shapai vikanava kupita, hashipali shilóta kwapuka nkati mu Lilamulo ata palukavéle lutembo kwali lukweu ludikidiki vela, vindapagwa mpaka uti vitandeke.

¹⁹Woewoe álota kwiludyanga lilamulo lidikidiki pakati pamalamulo ala kutwala kuvapundisha vanu vanji vatandele momo, ajo kuutawala wakuwa, vananshema kuva ndyoko. Napane aijá álota kutandedya malamulo ala na kuvapundisha vanu vanji kutandela momo, kuutwala wakuwa ko, nae vananshema kuva nang'olo.

²⁰Napavedoni ninkumwaulila mwiu, ishaliya yenu ikanapunda yavamwalimu vadishaliya na mapalishayo, mwiko muutawala wakuwa hamwinjila.

²¹“Mwenu mundigwa ashilá shavavaulidile vanyakala doni, ‘Haunammyae munu na woewoe álota kubyaa, vandamuukanavo paukumu.’

²²Napane nangu jo ninkumwaulila doni, kula munu álota kunshunalila nung'unumunu vandamuukanavo paukumu. Namomo álota kuntukana nung'unumunu, vandamuukanavo kwikamati, nakavili, ámwaulila nung'unumunu do, ‘Hauvé ding'ano!’ vandamuukanavo kumoto wakushena.

²³Napane ukauka ndaumya shadaka ku alutali, popo ukumbukila doni, apali nung'unumunu ávenavo mwaa namu wako,

²⁴bai shinantandi leka yakumya yo uke ukaigwanenavo nung'unumunu jo, ling'oto uje wide umye shadaka shako.

²⁵Igwania shipajelo namu waukashenienavo akuno muka kulibengi pakulota hanakupalakedye kumwe nkúukumu, nkúukumu nanae jo kukupalakedya kumwe nkúshunga kutwala nae kukujela nkalaboshi.

²⁶Ninkukwaulila mwiu doni, kushinu ako wako hauma shinu ukanava kulipanga mpaka ishingo yamwisho.

²⁷“Mwenu mundigwa ashilá shavavaulidile vanyakala doni, ‘Hamunalavalave.’[16]

²⁸Napane nangu jo ninkumwaulila doni, kula munu álota kunnola nkongwe ang'unuka, muntima mwake mo, andilavalava tayali kwankongwe ajo.

²⁹Ikava kenga liu lyako lyakunkanakono linkukutadya utege, usha ujae kushu ko. Kudyanga ikwove imbandi imo yamili wako kuliko mili wako uti wakulinganana kujela kushena.

³⁰Ikava kenga nkanakono wako ukakutadya kutega, lumula ujae kushu ko. Kudyanga ikwove imbandi imo yamili wako kuliko mili wako uti wakulinganana kujela kushena.

³¹“Namomo vanditangola doni, woewoe ánneka ndyagwe inimmaikila amupe italaka.[17]

³²Napane nangu jo, ninkumwaulila doni, kula munu ánneka ndyagwe paukavele mwaa waugoni, ajo ankuntadya nkongwe jo alavalave. Namomo woewoe álota kunnomba nkongwe wavannakile, ankulavalava.

³³“Namomo mwenu mundigwa ashilá shavavaulidile vanyakala doni, ‘Haunatimbange vyaulilapidile[18] na tandedya uti avilá vyaulilapidile kumwe UMU.’

³⁴Napane nangu jo ninkumwaulila doni, hamunalilapile mwiko, mulilapila kuwa mwaa kwanavo ko ni shiteng'u shake Nnungu,

³⁵ata hamunalilapile shilambo shapai mwaa pai apa ni lyutu lyakupumudya madodo ake, na ata hamunalilapile ku Yelusalemu mwaa wanavo ni njini umwe UMU Nang'olo.

³⁶Namomo haunalilapile muti wako mwaa wako hauulula kujalulanga yuli yako kuva yakudimba na ugwimbu wakudimba kuva yuli.

³⁷Mwenu mukashidoni, ‘Elo’ ive mwiu elo, mukashidoni ‘Mene’ ive mwiu mene. Shinji shakupunda apo, shinkwalakela kumwe aijá nkalau.

³⁸“Mwenu mundigwa ashilá shavatangwele doni, ‘Átumbula liu nanae vantumbule. Átema lino nanae vanteme.’[19]

³⁹Napane nangu jo ninkumwaulila doni, hamunammikile makukulu nkalau. Woewoe ákukoma lilatuma kunkanakono, nshiliulile kunshanda.

⁴⁰Ákukashali alota akupoke ikanju yako, likoti yadavo nnakele atwale.

⁴¹Woewoe ákukanyilidya muwene shuuluta shimo, wako wenanavo vyuluta vivili.

⁴²Ákujugwa shinu, mupe na aijá álota akukope, haunamwime.

⁴³“Mwenu mundigwa ashilá shavatangwele doni, ‘Nnagwaledye nkwenu na mmangedye mmongo wako.’[20]

⁴⁴Napane nangu jo ninkumwaulila doni, vanagwaledye vamongo venu na vashwalidye avalá vampapáta

⁴⁵pakulota muve mmana mmatatagwenu ávele kuwa. Mwaa nae vanu vakalau na vambone, liduva lyake ankuvavalila na vo vanu vaishaliya na vaungave-ishaliya vo, imbula ankuvatanyela.

⁴⁶Da mwenu mukavanagwaledya gweka avalá vannagwalédya mulota kupata inudyo shani? Da ata avalá vakukatisha-ukodi havanatandela momo?

⁴⁷Namomo mukavaudyanga vanung'unumunu gweka, munkutenda shinu shani shikumene shipundíle apo? Da i mo mwavatandela vamidi?

⁴⁸Napavedoni mwenu inimmaikila muve mmanu mmashalowa-uti kenga Tatagwenu wakuwa, nae washalowa-uti.