Read Ibibiliya mu Shimakonde Imbodi Yaambi na dimbande dya Imbodi Yakala Mateu 6 Bible Online

Mateu 6 - Ibibiliya mu Shimakonde Imbodi Yaambi na dimbande dya Imbodi Yakala bible

Mateu 6

¹“Lishunge pakulota hamunatende vitendo vyenu vyaishaliya pamevo pavanu kwambangidya vyoneke. Mukatenda davo po, Tatagwenu ávele kuwa hamupa shinu inudyo.

²Napavedoni paumya lipwashalelo haunaambele lipalapanda kenga mwavatandela vanu vamalambi muvitala vyakulipudidya na mudibalabala valota vapate lishangelo kwavanu. Ninkumwaulila mwiu doni vanavo tayali vandipata inudyo yave.

³Wako paumya lipwashalelo, shitandéka kunkanakono kwako, nkono nshanda wo haunamanye

⁴pakulota lipwashalelo lyako live lyashipii. Nadoni Tatamunu áona kwashipii, andakupa inudyo.

⁵“Napanelo pamushwali hamunave kenga avalá vanu vamalambi. Vanavo kuvanagwela kushwali vaimidile muvitala vyakulipudidya na nanyenje dibalabala pakulota vaaneke kwavanu. Ninkumwaulila mwiu doni, vovo vo tayali vandipata inudyo yave.

⁶Wako ukalota kushwali injila kushumba shako ushime nnango wo utwale ushwali unjugwe Tatako ávele mushipii. Nadoni Tatako áona kwashipii andakupa inudyo.

⁷Pamushwali hamunaujidyeujidye malove kenga mwavatandela vamidi. Vanavo vandákumbukila doni pavaujidyaujidya kutangola, vyavajugwa avilá vindaigwinika.

⁸Mwenu hamunave kenga vanavo! Tatagwenu, ata mukanava kunjugwa, nae andimanya kaladavo ashilá shamulóta.

⁹Napenelo amu ni mwakushwalidya mwenu, “ ‘Atata wetu úvele kuwa, lina lyako liilimyangike,

¹⁰utawala wako wide, malotelo ako atandeke, mushilambo shapai kenga kuwa.

¹¹Ligung'u lyetu lyakula liduva, tupa nelo.

¹²Makosha etu, tulivaliva kenga mo mwatuvalivalivila wetu vatutagela.

¹³Haunatuukenavo kukutubigwa kanji tuposha kumakono kumwe nkalau.’[21]

¹⁴“Mwaa mukavalivaliva vanu kupujungula kwave, nanae Tatagwenu ávele kuwa anannivaliva mwenu.

¹⁵Napane mukanavalivaliva vanu, nanae Tatagwenu hannivaliva kupujungula kwenu.

¹⁶“Napanelo pamunga hamunalilodye kuva mushipalodi kenga mwavatandela vanu vamalambi. Vanavo vandányadyanyadyanga kumevo valilodye kwavanu kenga vandyunga. Ninkumwaulila mwiu doni, vovo vo tayali vandipata inudyo yave.

¹⁷Napane wako paunga, navanga medi kumevo mmuti mo, pakala mauta

¹⁸pakulota vanu havanakumanye kenga undyunga. Akumanye gweka Tatamunu ávele mushipii na jo Tatamunu áona kwashipii, andakupa inudyo.

¹⁹“Napanelo hamunalikandyedye mali mushilambo shapai mwavananganga vinu ushwa na umandi, mwavatutumula vakwiva kutwala kwiva.

²⁰Kondya mali enu kuwa, kwanavo ushwa na umandi havanaulula shinu kwanonga na kwavakatutumula vakwiva.

²¹Po palota kupagwa mali ako ntima wako undapagwa popo.

²²“Liu ni shenje shamili. Liu lyako likava lingumi, mili uti lindaumbala lilangadyo.

²³Kanji liu lyako likava lilwele, mili wako uti shindaumbala shii. Napanelo lilangadyo mumili mwako likava shii, shii asho mwaa shani shilota kwilimyanga namene!

²⁴“Hapali munu wakuulula kuvatumikila vanang'olo vavili. Jumo anammangedya, junji jo kunnagwaledya; jumo kumwigwilila, junji jo kumwiludyanga. Mwenu hamuulula kuntumikila Nnungu akuno mutumikila mali.

²⁵“Napavedoni nangu ninkumwaulila hamunaangaikangile shingumi shenu kwa ashilá shamulota kulya kwali shamulota kukumbila na ata mili vyenu kwa ashilá shakulota kugwadya. Da shingumi i shinu shikumene kupunda shakulya na mili i shinu shamana kupunda dinguvo?

²⁶Lola vyuni vyulukánga kuniania. Vyanavo havinapanda, havinanang'ena na havivenavo vidimbi. Ata ivele davo Tatagwenu ávele kuwa ankulisha. Kushi mwenu po hamuvenavo mana namene kupunda vyuni?

²⁷Wakwashi pakati penu na kwangaikanga kwake ankuulula kwanjadyedya isaa imo vela yashingumi shake?

²⁸“Napanelo mwaa shani dinguvo dyo, munkwangaikila? Lola maukutu adinduva mumwitu mo mwakulumukila. Anavo madengo hanakola na hanalikandyangidya dinguvo.

²⁹Nangu ninkumwaulila kushidoni, ata jo Shalomoni jo na lishangelo lyake uti, hagwalidile kulinganana na anavo.

³⁰Napane ikava kenga maukutu amumwitu anáma jo nelo lunduno kujela pamoto Nnungu ankunnemya, kushi mwenu mmanu mmalikulupililo lidikidiki hannemya kupunda apo?

³¹“Bai mwenu hamunaangaikange muushidoni, ‘Tulota kulya nyamani?’, ‘Tulota kukumbila nyamani?’, ‘Tulota kugwala nyamani?’

³²Doni, vinu avyo uti vamidi ni vaangaikangíla. Tatagwenu wakuwa ankumanya kenga uti avyo mwenu munkulota.

³³Mwenu kanji shitandi angaikangila utawala[22] na ishaliya yake; vinu vinji vyo, vinanjadyeka.

³⁴Nadoni hamunangaikangile liduva lyalunduno mwaa vyalunduno, vyalunduno. Migagolo vyaliduva limo vinkutosha kwaliduva lyolyo.