Read Ibibiliya mu Shimakonde Imbodi Yaambi na dimbande dya Imbodi Yakala Mateu 7 Bible Online

Mateu 7 - Ibibiliya mu Shimakonde Imbodi Yaambi na dimbande dya Imbodi Yakala bible

Mateu 7

¹“Hamunavaukumu vanu kwambangidya namwenu hamunaukumigwe na Nnungu.

²Mwaa mo mwamulota kuvaukumila vavenu, namwenu Nnungu anamukumila momo. Shipimo shosho shamulota kuvapimila vavenu, namwenu Nnungu anampimila shosho.

³Mwaa shani unkwona shikoko muliu lyanung'unumunu kutwala kwiludyanga likangolo livéle muliu mwako?

⁴Umwaulila dashi nung'unumunu doni, ‘Leka ndikushe shikoko muliu mo,’ akuno muliu mwako lishingeme likangolo likumene?

⁵Umunu washinankulaba davo gwe! Shitandi likangolo lishingéme muliu mwako mo, usha. Apo undalola shana kutwala kusha shikoko asho muliu lyanung'unumunu.

⁶“Hamunavape vang'avanga vinu vyakwilimyanga na ata hamunavape vanguluve majanga amali. Vovo vo vankuulula kuluvatanga kutwala kumuujila mwemwe mmene kunshapwalanga.

⁷“Jugwa mundapata, lambela mundona na taa odi vananshimulila.

⁸Kula munu ánajugwa vandámupa, ánalambela andóna na ánataa odi vanánshimulila.

⁹Wakwashi pakati penu ánatenda mwanagwe akanjugwa ligung'u nae kumupa lijanga?

¹⁰Kwali akanjugwa yomba nae kumupa nyoka?

¹¹Ikava kenga mwenu pamo na ukalau wenu munkumanya kuvapa vanavenu vyambone, kushi Tatagwenu ávele kuwa hamamodya kuvapa vinu vyambone avalá vanjúgwa?

¹²Napavedoni kula shinu shamulota mwenu vavenu vantandele, namwenu vanavo vatandele vyovyo mwaa lyolyo ali ni Lilamulo na Vakulava.

¹³“Injilila pannango udikidiki mwaa indila na nnango uvaúkanavo vanu kukubamalegwa, ùkumene. Vainjilíla amo, vavelé voe.

¹⁴Pakuva nnango wo, ùdikidiki na indila yo, ìdikidiki yúka kushingumi, vaanaléla nnango awo me vavé padyoko!

¹⁵“Lishunge kwavakulava vakushang'apa. Vanavo vankumwidila mwenu vàgwalenge magwogwe adingandolo kanji mmitima myave vàvele mavinji akukalipa.

¹⁶Vanavo mundavamanya kwadindila dyavyepo vyave. Da vandépa dyuwe mwinalala kwali kwepa nshambalau mulilonga?

¹⁷Nadoni kula nnandi wakukonda upa vyepo vyambone napane úkakondile upa vyepo vyakunyalanyalanga.

¹⁸Hainaulukika shinu nnandi wakukonda kupa vyepo vyakunyalanyalanga na úkakondile kupa vyepo vyambone.

¹⁹Kula nnandi úkapa vyepo vyambone vandálumula kujela pamoto.

²⁰Napavedoni vanavo mundavamanya kwadindila dyavyepo vyave.

²¹“I uti avalá vangwaulíla ‘Umu, Umu’ vandainjila muutawala wakuwa, ila aijá átandedya malotelo ake Atata ávele kuwa.

²²Muliduva alyo vanu voe vanangwaulila doni, ‘Umu, Umu! Da wetu palina lyako hatulavile, palina lyako hatukumulenge majini na palina lyako hatutandile vyamakango vyoe?’

²³Ni apo pangulota kuvaulila ngala doni, ‘Mwiko hanimmanyite. Ngunyema apa mwenu mútandedya ungave-lilamulo.’

²⁴“Napavedoni kula munu áigwilila malove angu na kutandedya mwalatangalakela, ankuva kenga munu wamang'amung'amu ádangile ing'ande yake pashanya lijanga lyakulitandika.

²⁵Medi kutonya, dyundi kuumbalanga, imepo kupunga yuka shalatoto na ing'ande ayo kanji ing'ande yo kugwa do mene mwaa wakudenga palijanga.

²⁶Napane kula munu áigwilila malove angu kanji mene kutandedya mwalatangalakela, ankuva kenga munu ákave ding'ano ádangile ing'ande yake palitimbwitimbwi.

²⁷Medi kutonya, dyundi kuumbalanga, imepo kupunga yuka shalatoto na ing'ande ayo kutwala ing'ande yo, kujiuka.”

²⁸Bai Yesu pamalidile kutangola malove alo, dimbumba dyavanu dindíshanga namene mapundisho ake

²⁹mwaa nae ashipundisha kenga munu ávenavo madalaka i kenga vamwalimu vave vadishaliya.