Read Ibibiliya mu Shimakonde Imbodi Yaambi na dimbande dya Imbodi Yakala Mateu 8 Bible Online

Mateu 8 - Ibibiliya mu Shimakonde Imbodi Yaambi na dimbande dya Imbodi Yakala bible

Mateu 8

¹Napanelo Yesu pashulwike palishinga dimbumba dyavanu dindímwoda.

²Mwe! Popo po kumwidila munu jumo wamalemba mumili kunguguvalila kutwala kushidoni, “Nang'olo, ukalota unkuulula kungutadya ngutakate!”

³Yesu kunyalodya nkono wake kunkwaa kushidoni, “Elo ndilota, takata!” Malemba lo kulambalakenneu, mili wo kutakata.

⁴Yesu kutwala kumwaulila kushidoni, “Wako, haunamwaulile munu ila wena ukalilodye kwankúlangalalela-shadaka, umye shadaka shalamulidile Musha pakulota uve ushuda kwavanavo.”

⁵Napanelo Yesu ainjila nkaja mu Kapalanaumu andímwidila nang'olo jumo wavaing'ondo miya wavaloma nanjugwangila aashidoni,

⁶“Nang'olo, ntumika wangu andididimanga magwangwa na nnwele namene.”

⁷Yesu kushidoni, “Nangu ndaida namponia.”

⁸Nang'olo wavaing'ondo do, “Nang'olo, nangu hanguvaikidile kungwidila wako kwing'ande kwangu. Wako tangola lilove limo tu, ntumika wangu andapona.

⁹Mwaa ata nanangu momo ninkupagwa mwina madalaka na ninkuvanavo vaing'ondo vandivalamulila. Ndámwaulila jumo doni, ‘Wena!’ Nae kuukinneu. Kumwaulila junji doni, ‘Ida!’ Nae kwidinneu. Namomo ndámwaulila ntumika wangu, ‘Tenda ashi!’ Nae kutandenneu shosho.”

¹⁰Yesu paigwite malove ala andíshanga na andívaulila avalá váshimwoda kushidoni, “Ninkumwaulila mwiu doni, ku Ishilaeli akuno hangunava kumwona munu walikulupililo kenga aju.

¹¹Nangu ninkumwaulila, vandaaloka vanu voe nkono wakwalyalakela liduva na wakwalyenda liduva kwida ndaikala namu Abulaamu, Ishaki namu Yakobo pandamu muutawala wakuwa

¹²napane avalá vene utawala kujalegwa panda kushii. Kwanavo ko kundapagwa shililo na kutuka shulu nkanywa.”

¹³Bai Yesu andímwaulila nang'olo wavaing'ondo aijá kushidoni, “Wena! Vitandeke kenga mo mwaukulupilidile.” Mwisaa yoyo, ntumika jo kuponneu.

¹⁴Napanelo Yesu pawikile paing'ande imwe Patulu anínkodya nkwegwe Patulu àlele paigoli umpwateka mili

¹⁵nae kunkwaa mmakono, mili wo kuponenneu kutakatuka kutunduvanga kuntumika.

¹⁶Muwakati wayalyulo vanu kuvaidanavo kumwe Yesu vamajini voe. Nae majini lo, kwalilove lyake andíkumulanga namomo valwele uti andívaponia.

¹⁷Napavedoni lindíwikila popo lilove lyatangwéle nkúlava Ishaiya doni, “Kudabadabanga kwetu, anditwala jo mwene, malwele etu, andilitika.”[23]

¹⁸Napanelo Yesu akone imbumba yavanu intang'anadidye andívalamulila vakwoda vake vaamboke vauke litanda nkono unji.

¹⁹Mwalimu jumo wadishaliya anímmandika kumwaulila, “Mwalimu, nangu ndakwoda kwoekwoe kwaulota kuka.”

²⁰Yesu kushidoni, “Vanansheto vankuvanavo vivava, vyuni vyakuniania vinkuvanavo vyanda kanji Mwana Wamunu havé pashinu pakwijamidya muti wake.”

²¹Nkwóda wake junji, “Nang'olo, nguleka shitandi nguke ndikanshike atata.”[24]

²²Yesu kushido, “Ngwoda! Valeke vakupela vavashike vakupelamwave.”

²³Napanelo nae painjidile mwingalava vakwoda vake vandímwoda.

²⁴Mwe! Mulitanda mo kulipuka shimbunga shakujowa shíshitadya mawimbi kugang'ola-gang'ola ingalava, Yesu akuno àlele lwono.

²⁵Vakwoda vake kumuukila ndamwimulanga vaashidoni, “Nang'olo tuposha, wetu kupela aku!”

²⁶Nae kushidoni, “Mwenu mmanu mmalikulupililo lidikidiki mwaa shani munkujopa?” Nae kutakatuka apalá kutangalela shimbunga sho pamo na litanda, vyanavo kulimaladya do, kimyaa.

²⁷Bai vanavo vandíshanga vaashidoni, “Da munu aju avalalelé mwashi átenda ata mpaka imepo na litanda kumwigwilila?”

²⁸Yesu akawike litanda mwangu unji yani isemu yavagadalenu, vandímwidila vanu vavili vamajini váshaalakela kumakabuli. Vanavo vashindajowa namene mpaka kutadya indila ayo mene kupitika.

²⁹Mwe! Vanavo kukugwanga pashanya po vaashidoni, “Yesu mwanagwe Nnungu! Da wako ulota nyamani kumili kwetu wetu? Da widilé ndatupa shaushanga wakati wake ukanava kuwika?”

³⁰Napanelo mwakushu padyoko shindípagwa shipinga shikumene shavanguluve shíshipita shilya.

³¹Alalá majini anínjugwangila Yesu aashidoni, “Pakuva unkutukumulanga, bai tulamulila tuke tukavainjile vanguluve avalá.”

³²Nae do, “Wenananga!” Mwe! Majini lo kuumananga kuka ndaviinjilanga vanguluve kutwala shipinga uti shavanguluve kwalalela mwibondi kuka ndalijalanga mulitanda kuwanga.

³³Avalá vakushunga-dinguluve vandyúma vatukuta kuka kukaja ndavalanganga uti vinu vitandéke na vivatandéke avalá vanu vamajini.

³⁴Mwe! Vanu uti vapalikaja alyo kumuukila Yesu. Vakankodye vanínjugwangila aume mushilambo shave.