Read Ibibiliya mu Shimakonde Imbodi Yaambi na dimbande dya Imbodi Yakala Mateu 9 Bible Online

Mateu 9 - Ibibiliya mu Shimakonde Imbodi Yaambi na dimbande dya Imbodi Yakala bible

Mateu 9

¹Napanelo Yesu akakwele mwingalava, andyámboka litanda kuka kukaja kwake.

²Mwe! Popo po, vanu kumwidanavo munu wakudidimanga mili vànadidye mwigoli. Yesu pagwene likulupililo lyave, andímwaulila wakudidimanga jo kushidoni, “Mwanangu lyunge ntima! Madambi ako andilivalivika.”

³Mwe! Pakati pavamwalimu vadishaliya kutangadikanga shivenevene vaashidoni, “Aju ankukupulu.”

⁴Yesu amanya makumbukililo ave andívaulila doni, “Mwaa shani munkukumbukila kunyata mmitima myenu?

⁵Shakwashi shíkakamadyenge kutangola? Ni kushidoni, ‘Madambi ako andilivalivika,’ kwali kushidoni, ‘Takatuka twala mwanda uke’?

⁶Napane pakulota mumanye doni, Mwana Wamunu ankuvanavo madalaka akulivalivila madambi mushilambo amu…” andímwaulila wakudidimanga jo kushidoni, “Takatuka! Twala igoli yako uke kwing'ande kwako.”

⁷Nae kutakatuka kuka kwing'ande kwake.

⁸Bai imbumba yavanu paigwene shitendo asho vandíjopa namene kutwala kumupa lishangelo Nnungu ávapele vanu madalaka ainamuna ai.

⁹Napanelo Yesu paumile apo andímwona munu jumo walina Mateu àikele pashitala shaukodi. Nae kumwaulila doni, “Ngwoda!” Mateu kutakatuka kumwoda.

¹⁰Yesu àvele nng'ande mwake Mateu alya na vakwoda vake, mwe! Kwida vakukatisha-ukodi voe na vakutega, nae kulyanavo.

¹¹Mapalishayo pavagwene davo kutwala kuvaudya vakwoda vake, “Mwaa shani mwalimu wenu alya na vakukatisha-ukodi pamo na vakutega?”

¹²Yesu paigwite malove alo kushidoni, “Vangumi havanannambela nkúlaula. Vanánnambela nkúlaula, valwele.

¹³Wena mukalipundishe mana amalove ala, ‘Shangulota ni shididi i shadaka.’[25] Nangu hangwidile ndavashema vaishaliya ila vakutega.”

¹⁴Napanelo vakwoda vake Nshuwau vandímuukila Yesu ndamudya, “Wetu pamo na mapalishayo tundáunga, kushi vakwoda vako me havanaunga?”

¹⁵Yesu kushidoni, “Ilota kuulukika dashi vanu vakulalikigwa pashitamu kuvanavo shipalodi mwene nkúlomba àpagwite popo? Undawika wakati wavalota kumumya nkúlomba pakati pave. Bai apo ni pavalota kunga.

¹⁶Hapali ánatwala shipande shainguvo íkalikukutike kutenda shivamba mwinguvo yakala. Mwaa shosho sho shindalakananga na inguvo yakala kutwala lilanga lyo kumamodya.

¹⁷Namomo havanataa ugwalwa wavinyu waambi muvitumba vyamagwogwe vyakala. Ukatenda davo vitumba vyo vindapapuka, ugwalwa wo kujaikanga, vitumba avyo kutwala kwanangeka. Mene, ugwalwa wavinyu waambi vataa muvitumba vyaambi undona vinu avyo uti, kushungika.”

¹⁸Akuno atangola malove alo, mwe! Kuwika apalá nkútawala jumo kunguguvalila kutwala kushidoni, “Mwanangu mwali andipela ambi apa. Napane tuke ukammikile makono na nae andanama!”

¹⁹Yesu kutakatuka pamo na vakwoda vake kumwoda nae.

²⁰Mwe! Nkongwe jumo e auwíle vyaka kumi na mbili ulwele úkavele wakumalala kutumila kummandika Yesu, kukwaa nkumbu waikanju yake.

²¹Nae ashona doni, “Kona ngukwaa yo ikanju yake ai, ndapona.”

²²Yesu kushiliuka. Pangwene, kumwaulila kushidoni, “Lyunge ntima mwanangu. Likulupililo lyako lindikuponia.” Kutunduvangila muwakati wowo nkongwe jo kupona.

²³Yesu akawika paing'ande imwe nkútawala aijá, akavona vanu vamwomba kanyembe pashililo po na kwona imbumba yavanu ililanga.

²⁴Nae kutwala kushidoni, “Umananga, mwali jo hanapela shinu ankulala.” Vanavo kumweka.

²⁵Napane ling'oto lyakuvaumadyanga vanu nng'ande mo, Yesu andíinjila kunkamula mwali nkono, mwali jo kutakatuka.

²⁶Nadoni dyabali dyashitendo ashi dindyándavala mwisemu ayo uti.

²⁷Napanelo Yesu paumile apo, vandímwoda vakuputala mevo vavili vakugwa pashanya po vaashidoni, “Mwanagwe Daudi, twanangila shididi!”

²⁸Akainjila nng'ande, vakuputala mevo vo kummandika nae kuvaudya, “Mwenu munkukulupila mwiu kenga nangu ninkuulula kumwangangola?” Vanavo do, “Elo nang'olo.”

²⁹Yesu kuvakwaa mevo ave kushidoni, “Intandeke kulingana na likulupililo lyenu.”

³⁰Vanavo mevo ave andyújila kulola shana. Yesu kutwala kuvalaililila namene aashidoni, “Shitendo ashi hamunamwaulile munu.”

³¹Napane vanavo vakaume apo ni kupita vaandadya dyabali adyo mwisemu ayo uti.

³²Vovo vo vauka, mwe! Vanu vakamwidanavo munu jumo bubu walijini.

³³Pavakumulenge lijini lyo, bubu jo kutangolenneu. Dimbumba dyavanu dindíshanga kutwala kushidoni, “Shitendo kenga ashi hashinava kwaneka akuno ku Ishilaeli!”

³⁴Mapalishayo kanji kushidoni, “Aju ankukumulanga majini kwadimongo dyake nang'olo wave majini.”

³⁵Napanelo Yesu ashindatanela minjini uti na makaja apita apundisha muvitala vyakulipudidya avalanganga ntenga wambone wautawala, aponia vilwele na mauvilo uti.

³⁶Nae akone dimbumba kwadimbumba dyavanu andyánangila shididi mwaa wakuvona kudabadabanga na kujaikanga kenga dingandolo díkave nkúshunga.

³⁷Napavedoni andívaulila vakwoda vake doni, “Mwiu mapuno avé oe napane vamadengo vavé padyoko.

³⁸Napavedoni mwenu njugwe mwene mapuno pakulota avatumidye vamadengo mumapuno ake.”