Read Ibibiliya mu Shimakonde Imbodi Yaambi na dimbande dya Imbodi Yakala Malukushi 10 Bible Online

Malukushi 10 - Ibibiliya mu Shimakonde Imbodi Yaambi na dimbande dya Imbodi Yakala bible

Malukushi 10

¹Yesu paumile apo, andyúka kulijimbo lya Yudeya mpaka mwangu unji wa Yudani. Bai imbumba yavanu indímwidila kavili na nae kenga lidyavalelo lyake ashindavapundisha.

²Napanelo mapalishayo vandímuukila kumudya doni, “Da lilamulo linkutuleka munu kunneka ndyagwe?” Vovo vo, vashinanninga.

³Nae kushidoni, “Da Musha annamulidilé dashi?”

⁴Vanavo, “Musha atulamulidilé munu amwandikile italaka nkongwe atwale anneke.”[21]

⁵Nae kutwala kushidoni, “Musha andimwandikila lilamulo alyo mwaa mwenu mitima vyenu vyakunanopa.

⁶Kanji tangu kunantandi kukandyanga Nnungu shilambo, ‘nae ankandyengé nnume na nkongwe.’[22]

⁷‘Nadoni nnume andalyumadyanga patatake na panyoke kuka ndalyunganianga na nkongwe ndyagwe

⁸kutwala vanu vavili ava kuva mili umo.’[23] Nadoni vanu vavili ava havanava shinu vavili; ni mili umo bai.

⁹Napavedoni shaunganienge Nnungu, munu hanapukaniange.”

¹⁰Napanelo vavele kavili paing'ande, vakwoda vake vandímuudyangidya ing'ano ayo.

¹¹Yesu kutwala kuvajang'ula kushidoni, “Munu woewoe ánneka ndyagwe kuka nannomba nkongwe junji, munu ajo ankulavalava na ankuntagela ndyagwe ntandi.

¹²Namomo nkongwe ánneka ntwagwe kuka ndalombwa na nnume junji, nkongwe ajo ankulavalava.”

¹³Napanelo vanu vashindavaidanavo vadyoko kumwe Yesu avavikile makono kutwala vakwoda vake kuvashulanga.

¹⁴Yesu pagwene shitendo asho inínnyatila kutwala kushidoni, “Valeke vadyoko vaide kwangu, hamunavaleye mwaa utawala wa Nnungu wavanu vavéle mwavadyoko.

¹⁵Ninkumwaulila mwiu doni, aijá ákapwashalela utawala wa Nnungu kenga ndyoko, ajo mwiko hainjila shinu muutawala awo.”

¹⁶Bai nae andívatwala vadyoko vo kuvavikila makono na kuvaalaliya.

¹⁷Napanelo Yesu pashuukanavo kavili mushu na shimwanda shake, munu jumo aníntukutila kuka ndaguguvala mushu mwake ndaashidoni, “Mwalimu wambone, ngutandelé mwashi pakulota ngupate shingumi shíkamalilika?”

¹⁸Nae kushidoni, “Mwaa shani ungushema kuva wambone? Hapali munu wambone; wambone ni gweka Nnungu bai.

¹⁹Wako unkumanya malamulo, ‘Haunabyae, Haunalavalave, Haunaive, Haunaumye ushuda waushwang'a, Haunatindinganiange na Mwishimu tatako na anyoko.’ ”

²⁰Nnemba jo kushidoni, “Mwalimu, nangu malamulo ala ninkwodedya tangu shidyoko shangu.”

²¹Yesu pannadile aninnagwaledya kutwala kushidoni, “Shindikubakila shinu shimo. Uti vyauvenavo wena ukashulushe, njuluku wo uvape vákave pashinu. Undavanavo libadila kuwa; ling'oto, ida ungwode.”

²²Nnemba aijá paigwite lilove alyo andítangadikanga shintimatima na andívanavo shipalodi shoe mwaa avenavo vinu vyoe.

²³Yesu kushiliuka kulalyanga nnyenje mwake kuvaulila vakwoda vake kushidoni, “Pandikamadyanga namene vatajili kwinjila muutawala wa Nnungu!”

²⁴Vakwoda vake vandíshanga malove alo kanji nae kavili kushidoni, “Mmanavangu, me pandikamadyanga namene[24] kwinjila muutawala wa Nnungu.

²⁵Shíkakamadyenge ni kupaleta ngamila mulilanga lyakashinji kuliko kwinjila ntajili muutawala wa Nnungu.”

²⁶Vanavo kumamodya namene kushanga kutwala kudyania shivenevene vaashidoni, “Ikava davo po, aambwalegwa nyani?”

²⁷Yesu kuvalola kutwala kushidoni, “Kwavanu shinu ashi hashinaululika shinu kanji kwa Nnungu i mwanavo mwaa Nnungu vinu uti ankuulula.”

²⁸Napanelo Patulu kushidoni, “Wetu tundileka vyetu uti kukwoda wako.”

²⁹Yesu kushidoni, “Ninkumwaulila mwiu kenga, kula munu álakile ing'ande yake, ávalakile vanung'unuvake kwali vakuluvake, ávalakile valumbuvake, ánnakile tatake kwali anyoke, ánnakile ndyagwe kwali vanavake, álakile mashamba kwamwaa wangu nangu na kwamwaa wantenga wambone,

³⁰munu aju muwakati wowo au, kwakwanjadyeka myanda miya andapata ding'ande adyo, vanung'unumunu avo, valumbumunu avo, vajujumunu avo, vana avo na mashamba alo pamo na kupapatigwa. Namomo muwakati wída, munu ajo andapata shingumi shíkamalilika.

³¹Kanji manya kenga vanu voe vatandi vandava vamwisho na vamwisho vandava vatandi.”

³²Napanelo vanavo vauka mushu na shimwanda shave sha ku Yelusalemu, Yesu àlangaladile vakwoda vake vandímwoda kunyuma akuno vashanga shimwanda asho na vanu vanji váshivoda vashindajopa. Nae ni pavashamadile kavili kwagweka avalá kumi na mbili kuvaulila vinu uti vilóta kuntandeka aashidoni,

³³“Mwenu, tunkuka ku Yelusalemu. Koko ko, Mwana Wamunu vanannimya kunkamudya kumakono kwavanang'olo vavakulangalalela-shadaka na kwavamwalimu vadishaliya. Vovo vo, vandamuukumu apele na vanankamudya kumakono kwavamidi.

³⁴Vanavo vandamwiludyanga, kunshunangila mata, kunshapa viboko na vanampedya. Kanji muliduva lyantatu lyake andadyuka.”

³⁵Napanelo Tiyagu namu Nshuwau vanavake Shebedeu vandímuukila Yesu ndamwaulila doni, “Mwalimu, wetu tulota utwangangole shoeshoe shatulota kukujugwa.”

³⁶Nae, “Mulota nimwangangole nyamani?”

³⁷Vanavo do, “Paulota kupagwa mulishangelo lyako, tupa litala lyakwikala, jumo kunkanakono junji kunshanda kwako.”

³⁸Nae kushidoni, “Hamunamanya shinu shakujugwa. Da mwenu munkuulula kukumbila luwene lwangukumbila nangu kwali kupata ubatisho wangupata nangu?”

³⁹Vanavo, “Elo, tunkuulula.” Yesu kushidoni, “Luwene lwangukumbila nangu, mundakumbila. Ubatisho wangupata nangu, mundapata

⁴⁰kanji yakwikala kunkanakono kwali kunshanda kwangu, ayo hainava shinu yakujava nangu. Vene mautu alo ni avalá vavapanganiangididye.”

⁴¹Bai vanji kumi vo vakaigwe malove alo, vanímmikila shitundi Tiyagu namu Nshuwau.

⁴²Yesu kuvashema kuvaulila doni, “Mwenu munkumanya kenga avalá vánavavika kuva vakutawala vavamidi vandálitumbudya kwavenentete na vakumene vave vandátumila madalaka kwavanavo.

⁴³Kwaupande wenu mwenu hainave davo. Aijá álota ave nang'olo pakati penu inimmaikila ave ntumika.

⁴⁴Namomo aijá álota ave ntandi, inimmaikila ave ntumwa wenu mwenu uti.

⁴⁵Ata jo Mwana Wamunu aju haidile vantumike; nae aidilé ndatumika na kujaula shingumi shake shive lyambolelo lyavanu voe.”

⁴⁶Bai Yesu pamo na vakwoda vake vandíwika pa Yeliko. Napanelo pavashuma nkaja mo nae na vakwoda vake pamo na imbumba yavanu, ndila mo andíikala munu jumo nkújugwajugwa wakuputala mevo walina Balitimeu mwanagwe Timeu.

⁴⁷Nae paigwite kenga Yesu wa ku Nashaleti ankupita mulyutu alyo andítunduvanga kushema pashanya po aashidoni, “Mwanagwe Daudi,[25] Yesu wako, ngwanangila shididi.”

⁴⁸Vanu kunshulanga vamwaulila amalale kanji nae kuka mushu tu ashema pashanya po, “Mwanagwe Daudi, ngwanangila shididi!”

⁴⁹Yesu kwimila kutwala kushidoni, “Nsheme!” Vanavo kunshema aijá wakuputala mevo kumwaulila doni, “Lyunge ntima! Takatuka, ankukushema.”

⁵⁰Nae kutwala ikanju yake kujela ako, kudaloka kwimila kutwala kumuukila.

⁵¹Yesu kumudya, “Da ulota ndikutandele nyamani?” Nae doni, “Mwalimu, ngulota nguujile kulola.”

⁵²Yesu kushidoni, “Wena, likulupililo lyako lindikuposha.” Muwakati wowo munu jo kulalenneu kutwala kupita amwoda Yesu mwashuka.