Read Ibibiliya mu Shimakonde Imbodi Yaambi na dimbande dya Imbodi Yakala Malukushi 11 Bible Online

Malukushi 11 - Ibibiliya mu Shimakonde Imbodi Yaambi na dimbande dya Imbodi Yakala bible

Malukushi 11

¹Napanelo vanavo pavavandike pa Yelusalemu vàvele pa Betepashi na Betaniya, palishinga lyamilandi Vyaulivela Yesu andívatuma vakwoda vake vavili

²kutwala kuvaulila doni, “Wena palikaja livéle mushu mo. Pamwinjila munankodya mwana wapunda ákanava kunkwela munu vamuungangidile. Mwenu muungule mumwidenavo.

³Akamudya munu kushidoni, ‘Da punda jo mumuungulila nyamani?’ Mwaulile doni, ‘UMU ankunnota, ling'oto andamuujiya.’ ”

⁴Vanavo kuka nankodya mwana wapunda vamuungangidile pannango nanyenje ibalabala kutwala kumuungula.

⁵Napanelo pakati pavanu ve vapagwíte apo kuvaudya, “Mumuungulila nyamani punda jo?”

⁶Vanavo kuvajang'ula kenga mo mwavaulidile Yesu, vanu vo kuvaleka vauke.

⁷Bai vanavo kumwidanavo punda jo kumwe Yesu kuntandikanga dinguvo, Yesu kunkwela.

⁸Vanu voe kupita vatandikanga dinguvo dyave mwindila, vanji kwanganga dinavi dyamilandi kupita valadyanga ndila.

⁹Vanu váshuka mushu na váshaloka panyuma vashindapita vatangola pashanya po vaashidoni, “Ashibike!” “Aalaligwe áida palina limwe UMU!”[26]

¹⁰“Walaligwe utawala wída watatagwetu Daudi!”[27] “Kushibika kupagwe kushanya-uti!”

¹¹Bai Yesu andíinjila pa Yelusalemu kukinneu ndainjila nng'ande ya Nnungu. Nae andílalyanga shana kula shinu kanji kwodamwaa wakati undípita andyúma namu avalá kumi na mbili kuka ku Betaniya.

¹²Palyamba lyake pavashuma pa Betaniya Yesu kunkola indala.

¹³Akone kwakushu nnandi uvéle mwankuju[28] ùvele na mamba ake, nae kuka ndalola nakapanji andona shinu shoeshoe. Pavandike hagwene shinu ila akodidye mamba mwaa hauvele wakati wakupa vyepo.

¹⁴Bai nae andítangalela nnandi awo kushidoni, “Kwako wako mwiko, halya munu kavili vyepo.” Malove alo, vakwoda vake vashindaigwa.

¹⁵Vanavo vankuwika pa Yelusalemu. Yesu painjidile mwing'ande ya Nnungu andítunduvanga kuvakumulanga vanu váshishumidyanga na váshishumanga vinu, kugang'alanga dimesha dyavakushenji-njuluku na dikiti dyavanu váshishumidyanga ding'unda.

¹⁶Nae ashindaleya munu kunyukata shinu shanshulushu mwing'ande ya Nnungu

¹⁷na ashindapundisha aashidoni, “Da havaandike, ‘Ing'ande yangu indashamegwa ing'ande yakushwalidya venentete uti’?[29] Kanji mwenu munditenda kuva shivava shavakwiva.”[30]

¹⁸Malove alo, vanang'olo vavakulangalalela-shadaka pamo na vamwalimu vadishaliya vashindaigwa. Vanavo vashindalambela dindila dyakummalididya mwaa vashinanjopa kwoda vanu uti vashindashanga mapundisho ake.

¹⁹Pauwikile wakati wayalyulo vanavo vandyúma panjini po.

²⁰Napanelo lyamba lyake vapita pannandi po ndakodya ujumile kutunduvangila dinyija.

²¹Patulu kukumbukila kutwala kumwaulila Yesu, “Labi, lola nnandi wautaile dilana wo, undijuma.”

²²Yesu kushidoni, “Mwenu, Nnungu nkulupile.

²³Ninkumwaulila mwiu kenga munu woewoe átangalela lishinga ali doni, ‘Bubuka apa uke ukalijele mwimanga,’ atangola bila kwambambidyanga muntima mwake, akulupila kenga vyatangwele vindátandeka, vindatandakela mo mwatangaladile.

²⁴Napavedoni ninkumwaulila, uti vyamulota kujugwa kwaindila yakushwali kulupila kenga mundipata nadoni vindakutandakela momo.

²⁵Pamushwali, shikapagwa shinu muntima mwako na munumwavo, nnivalive pakulota Tatagwenu ávele kuwa nanae annivalive kupujungula kwenu.”

²⁷Vanavo vankwinjila kavili pa Yelusalemu. Napanelo Yesu apita awanawananga mwing'ande ya Nnungu, vandímwidila vanang'olo vavakulangalalela-shadaka, vamwalimu vadishaliya pamo na vanang'olo

²⁸kutwala kumudya, “Vinu avi unkutenda kwamadalaka shani? Da madalaka ene lo autandela vinu avi akupelé nyani?”

²⁹Yesu kushidoni, “Nanangu ndamudya shinu shimo mukangujang'ula, nanangu madalaka angutandela vinu avi, ndamwaulila.

³⁰Da ubatisho umwe Nshuwau walakadilé kuwa kwali kwavanu? Ngujang'ula!”

³¹Vanavo kwaulanila shivenevene vaashidoni, “Tukaashidoni, ‘Walakadilé kuwa,’ nae andatudya, ‘Mwaa shani hamunkulupidile?’

³²Ata tukaashidoni, ‘Walakadilé kwavanu…’ ” Vanavo vashindavajopa venentete mwaa venentete vashindamwamini Nshuwau kuva nkúlava.

³³Bai vanínjang'ula, “Wetu hatumanyite.” Yesu kutwa kushidoni, “Ata nanangu momo hanimwaulila madalaka angutandela vinu avi.”