Read Ibibiliya mu Shimakonde Imbodi Yaambi na dimbande dya Imbodi Yakala Malukushi 12 Bible Online

Malukushi 12 - Ibibiliya mu Shimakonde Imbodi Yaambi na dimbande dya Imbodi Yakala bible

Malukushi 12

¹Napanelo Yesu andítunduvanga kutangola na vanavo atumila mikong'o aashidoni, “Munu jumo andílima lishamba lyamilandi vyavinyu kutwala kudangela lingongo, kwimba shima shakuminyangila vyepo na kudenga libodo lyakulepa; kuvakodisha vakulima mwene kutwala mwanda kuka.

²Pauwikile wakati wakupuna, nae kuntumidya ntumika jumo kwavakulima vo akatwale isemu yavyepo vyamulishamba lyake.

³Vanavo kunkamula, kunkanyalanga, kunneka auka makonodavo.

⁴Nae kuntumidya ntumika junji; vanavo kumbandulanga mmuti na kuntukananga.

⁵Kuntumidya kavili junji; ajo vanavo kumpedya. Nae kuvatumidya vanji voe; vanavo, vanji kuvakamanga, vanji vo kuvapedya.

⁶“Napanelo andíijalila munu jumo e avele mwanagwe washinnagwaledya mwene. Bai kumwisho kwake aníntumidya jojo jo aashidoni, ‘Apa mwanangu aju vandamwishimu!’

⁷Kanji avalá vakulima vandyáulanila shivenevene vaashidoni, ‘Aju ni jojo walota kunkamudya lishamba. Idananga akuno tummalidye kwambangidya lishamba live lyetu.’

⁸Nadoni vanavo vanínkamula kumpedya kutwala kunjela kunyenje lishamba.

⁹Napanelo mwene lishamba jo alota kutandela mwashi? Nae andaida ndavabyanga uti vakulima avo kutwala lishamba lyo kuvapa vanu vanji.

¹⁰Da mwenu hamushamidye Maandiko ala, “ ‘Vakudenga lijanga lyavaitile lyo, lindyuka ndava lijanga lyapalitununa.

¹¹Átandile davo ni UMU, ni vinu vyamakango kwetu wetu.’ ”[32]

¹²Napavedoni vanavo vashindalambela dindila dyakunkamulila mwaa vandímanya kenga nkong'o awo, ashivakang'ela vanavo. Kanji kwodamwaa vashindajopa imbumba yavenentete, vanínneka kutwala kuukananga.

¹³Napanelo vandívatuma mapalishayo vanji pamo na vanu vashipinga shimwe Elode vauke vakampatikaniange mumalove ake.

¹⁴Vanavo kumuukila kutwala kushidoni, “Mwalimu, wetu tundimanya shana kenga wako ni umunu waumwiu úkananapela mumaoni avanu mwaa haunalola ing'ope yamunu kanji unkupundisha kwaumwiu indila yalota Nnungu. Napanelo ni shambone nkati mulilamulo lyetu kunnipa Shashali ukodi[33] kwali mene? Wetu po, tunkuulula kulipa kwali mene?”

¹⁵Nae amanya avi shinankulaba shave, andívajang'ula kushidoni, “Mwaa shani munkungulinga? Ngupa yela[34] imo ngulole!”

¹⁶Vanavo kwidanavo ndamupa kutwala nae kuvaudya, “Da ing'ope ai imwe nyani na namakong'o aju umwe nyani?” Vanavo kushidoni, “Shashali.”

¹⁷Kutwala Yesu kushidoni, “Vimwe Shashali, mwing'e mwene Shashali na vimwe Nnungu, mwing'e mwene Nnungu.” Bai vanavo vashinanshanga.

¹⁸Napanelo mashadukayo, vanu vánaashidoni hakupali kudyuka kwavakupela, vanímmandika Yesu kutwala kumudya,

¹⁹“Mwalimu, Musha atwandikidilé doni, nkulumunu akapela anneka namwili bila kummalakela mwana, nung'unumunu ainjile ding'ande pakulota ammalakele vana wakujala.[35]

²⁰Nadoni vandípagwa vanung'unumunu saba vashitumbo shimo. Ntandi jo kulomba kutwala kupela kwabila kummaleka mwana.

²¹Kwida wambili kwinjila ding'ande nanae kupela bila kummalekela nkongwe jo mwana. Kwatika wantantu nanae kutandakela momo.

²²Vanung'umunu ava uti saba hapali hammaleke mwana. Kumwisho kwake nanae nkongwe jo kupela.

²³Napanelo kushi muliduva lyakudyuka vanu lyo nkongwe ajo mwene alota kuva wakwashi pakati pavalume avo? Mwaa vanu avo uti vaninnomba!”

²⁴Kutwala Yesu kushidoni, “Shitadídye mwenu muduwangike da i mwaa mwenu me kumanya Maandiko na ata dimongo dyake Nnungu?

²⁵Mwenu, pavalota kudyuka vanu mukupela, hakupali kulomba na kulombwa kanji uti valota kuva kenga vanjelo kuwa.

²⁶Kwamwaa wakudyuka vanu, da hamushamidye mulibuku limwe Musha pavele palyukutu?[36] Popo po, Nnungu atédoni, ‘Nangu ni Nnungu umwe Abulaamu, Nnungu umwe Ishaki na Nnungu umwe Yakobo.’[37]

²⁷Nadoni nae hanava shinu Nnungu wavakupela, ni Nnungu wavangumi. Mwenu mundiduwangika namene!”

²⁸Napanelo mwalimu jumo pakati pavamwalimu vadishaliya andívandika kwigwilila shavashitaukananga. Bai nae pagwene kenga Yesu andivajang'ula shana, andímudya kushidoni, “Pakati pamalamulo uti, lilamulo shani likumene lipundíle anji uti?”

²⁹Yesu kushidoni, “Lilamulo likumene lipundíle anji ni ali, ‘Igwa wako Ishilaeli! UMU Nnungu wetu, nae ni jumo tu bai!

³⁰Nnagwaledye UMU Nnungu wako na ntima wako uti, ungumi wako uti, ding'anong'ano dyako uti na dimongo dyako uti.’[38]

³¹Lyambili ni ali, ‘Nnagwaledye mujo kenga mo mwaulinagwaladyedya wako umwene.’[39] Hapali malamulo anji makumene akupunda ala mavili.”

³²Munu jo kutwala kushidoni, “Shambone namene Mwalimu! Unditangola viu pautédoni, Nnungu avelé jumo bai hapali junji kavili wakumpunda nae.

³³Namwiu kunnagwaledya Nnungu na ntima wako uti, makumbukililo ako uti, dimongo dyako uti na kunnagwaledya mujo kenga mo mwaulinagwaladyedya wako umwene kunkuvanavo mana makumene kuliko vyadaka na vyadaka vyakutikinyuki-uti.”

³⁴Bai Yesu pangwene munu jo kujang'ula na limanyilo andímwaulila kushidoni, “Wako hauvé kushu na utawala wa Nnungu.” Nadoni kutunduvangila apo hapali munu áshilyalaveka kumudya shinu shoeshoe.

³⁵Napanelo Yesu akajang'ule, akuno apundisha mwing'ande ya Nnungu andyúdya doni, “Ivenavo mana shani vamwalimu vadishaliya pavaashidoni, ‘Klistu, mwanagwe Daudi?’

³⁶Jo mwene Daudi alangalalegwa na Imumu Wanashwe atédoni, “UMU andimwaulila Nang'olo[40] wangu doni, ‘Ikala kunkanakono kwangu mpaka nangu ndivavike vamongo vako kumaulu kwako.’ [41]

³⁷Napanelo ikava kenga jo mwene Daudi ankunshema Klistu kuva Nang'olo wake,[42] ilota kuululika dashi kavili nae kuva mwanagwe?” Nadoni imbumba ing'umene yavanu ailá ishimwigwilila na lipuwilo.

³⁸Yesu pashipundisha ashitangola doni, “Lilaledye na vamwalimu vadishaliya! Vanavo kuvanagwela namene kugwala mikwakwala muumbala vaudyangigwe na ishima,

³⁹muvitala vyakulipudidya kwikala muviteng'u vyamushu na muvikukulu kuvanagwela mumautu aishima.

⁴⁰Vanavo vyavanamwili vankulyanga na mukushwali mo, vandátima do jii kanji ni kulikulukuwa tu bai. Vovo vo vandapata ukumu yakujowa kupunda apo.”

⁴¹Napanelo Yesu andíikala mushu lishanduku lyashadaka. Nae ashilola imbumba yavanu mwavashijalela njuluku mulishanduku na kuvona vatajili voe vajela njuluku woe.

⁴²Bai popo po, kwida namwili jumo ákave pashinu ndajela dishingo mbili dyakunyambikanga.

⁴³Nae kuvashema vakwoda vake kuvaulila kushidoni, “Ninkumwaulila mwiu doni, namwili aju ákave pashinu, nae ni ájadile poe mulishanduku lyashadaka kuvapunda vanu vanji uti.

⁴⁴Vanu vanji vo vaumidyé padyumbele, nae aumidyé paungapata wake kujela uti shavenavo na kujela uti shingumi shake.”