Read Ibibiliya mu Shimakonde Imbodi Yaambi na dimbande dya Imbodi Yakala Malukushi 13 Bible Online

Malukushi 13 - Ibibiliya mu Shimakonde Imbodi Yaambi na dimbande dya Imbodi Yakala bible

Malukushi 13

¹Napanelo Yesu pashuma mwing'ande ya Nnungu nkwóda wake jumo andímwaulila kushidoni, “Mwalimu, lola majanga alalá mwamanyikangidile na ding'ande adilá kumanyikanga doni!”

²Yesu kushidoni, “Unkwona ding'ande adi ding'umene adi? Bai haliikala lijanga pashanya lijangamwagwe palikabamalegwa.”

³Yesu akaikala pashanya lishinga lyamilandi vya Ulivela livéle shalatoto naing'ande ya Nnungu, Patulu, Tiyagu, Nshuwau namu Andaleya kumudya kwagweka kushidoni,

⁴“Twaulila, vinu avi vilota kutandeka duvani? Shimanyikilo shani shilota kulilodya vinu avyo uti vivelé pepi na kuwikila popo?”[43]

⁵Nae kutwala kutunduvanga kuvaulila doni, “Lilaledye pakulota hanapagwe wakunduwanga.

⁶Vandaida vanu voe vatumila lina lyangu vaashidoni, ‘Nangu ni nene!’ Vovo vo, vandavaduwanga vanu voe.

⁷Mukaigwa ding'ondo na manyinyi ading'ondo mwenu hamunajope. Vinu avyo vindivaikila vitandeke kanji haunava shinu mwisho.

⁸Venentete vandatandana ing'ondo na venentetemwave, shilambo shindatandana ing'ondo na shilambomwagwe. Shindaumilila shindangenda mumautu akuvilingananga namomo indaumilila indala. Vinu avi uti ni shitunduvangilo tu shamauvilo akushuluwa.[44]

⁹“Mwenu lilaledye! Vanu vandamuukanavo mudikamati na muvitala vyakulipudidya vananshapa viboko. Kwamwaa wangu nangu mundaimila mushu mwavananangalaledi vamajimbo na mwavaumu kenga ushuda kwavanavo.

¹⁰Napanelo ukanava kuwika mwisho indivaikila ntenga wambone uvalangangigwe kwavenentete uti.

¹¹Vakantwala vamuukanavo nankamudya, hamunangaikange mulambela mwakujang'ulila. Sho shilóta kumwidila muwakati awo mwenu tangola shosho mwaa i mwenu múlota kutangola ila ni Imumu Wanashwe.

¹²Nkulumunu anankamudya nung'unumunu vampedye na tatamunu anatandela momo kwamwanamunu. Vana vandavavangedya vatatavave na vandavapedya.

¹³Mwenu mundavangadika na vanu uti kwamwaa wangu nangu kanji aijá álota kulipililila mpaka kumwisho, ajo andaambolegwa.

¹⁴“Mukona shakudabukanga shiídanavo kubamola shìimidile palyutu líkavaikidile,[45] munu áshomya amanye mana ake, napane avalá vavéle ku Yudeya vatukutile kumashinga.

¹⁵Ávele panda apumula hanatakatuke kwinjila nng'ande ndatwala shinu shoeshoe.

¹⁶Ávele kundila hanauje kuka kukaja ndatwala ikanju yake.

¹⁷Vapambale vakongwe valóta kuvanavo vitumbo na valóta kujang'edya mumaduva alo.

¹⁸Shwali pakulota vinu avyo havinatandeke muwakati washipwepwe.

¹⁹Mwaa mumaduva alo andapagwa mauvilo ainamuna íkanava kwaneka tangu kunantandi kukandyanga Nnungu shilambo mpaka nelo na haipagwa kavili.

²⁰Leka UMU akapungwile maduva alo hanapagwe ata munu jumo akambwalegwe kanji kwamwaa wavakutandalegwa vavatandwele nae, maduva lo, andipungula.

²¹Bai munu akamwaulila doni, ‘Mwenu, Klistu aju apa,’ kwali, ‘Avelé akulá,’ hamunankulupile.

²²Mwaa vandaumilila vaklistu vakushang'apa pamo na vakulava vakushang'apa. Vovo vo, vandatenda vimanyikilo na vyakutikinikanga kwambangidya vavaashadyange ikaulukika vakutandalegwa.

²³Napavedoni mwenu lilaledye! Nangu ninnaililidile kaladavo kwamwaa wavinu uti.

²⁴“Kanji napanelo mumaduva alo amwisho, ling'oto lyamauvilo lo, liduva lindadimba, mwedi hauvala,

²⁵dinondo kuwa ko dindagwanga na vyadimongo vyakuniania vindating'inigwa.[46]

²⁶Bai apo vandamwona Mwana Wamunu aaloka mumaundi na dimongo dyoe pamo na lishangelo.[47]

²⁷Kutwala nae andavatuma vanjelo avalá vauke vakavatwalange vakutandalegwa vake mudisemu nsheshe dyamushilambo kutunduvangila kumwisho kwake shilambo shapai mpaka kumwisho kwake shilambo shakuwa.

²⁸“Napanelo kwankungu lipundishe nkong'o au, paunaipukila mwenu mumanyinneu doni, shipondo shindiwika.

²⁹Namomo mukona vinu avyo vitandeka manyinneu doni, mwisho undiwika, uvé mo mmilango myenu.

³⁰Ninkumwaulila mwiu doni, vanu vaimbula ai havamalilika vinu avi vikanava kutandeka.

³¹Kuwa na pai kundapita ila malove angu mwiko hapita.

³²“Napane liduva lyene lyo na isaa, hapali ámanyite, ata vanjelo kuwa havamanyite, ata Mwana hamanyite ila ámanyite ni Atata bai.

³³Lilaledye, ava mevo! Mwenu hamumanyite wakati wamwisho duvani paulota kuwika.

³⁴Inkulinganana na munu ávenavo mwanda. Panauma pang'ande pake avapele madalaka vatumika vake kula munu na madengo ake anánnamulila nkúshunga-nnango ave mevo.

³⁵Napavedoni namwenu ava mevo mwaa hamumanyite wakati walota kuja nang'olo mwene ing'ande; inkuulukika kwali kuva lyulo, shilo shing'ati, kumatingatinga kwali lyamba.

³⁶Doni, ava mevo, akaida shingangala hanankodye mulele.

³⁷Vyanimwaulila mwenu avi, ninkuvaulila vanu uti kushidoni, ava mevo!”