Read Ibibiliya mu Shimakonde Imbodi Yaambi na dimbande dya Imbodi Yakala Malukushi 14 Bible Online

Malukushi 14 - Ibibiliya mu Shimakonde Imbodi Yaambi na dimbande dya Imbodi Yakala bible

Malukushi 14

¹Akuno àbakidile maduva mavili pakulota kuwika Pasaka na shikukulu shamagung'u ákavele nkukumuku, vanang'olo vavakulangalalela-shadaka na vamwalimu vadishaliya vashindalambela dindila dyakushang'apa pakulota vankamule Yesu vammyae.

²Vanavo vashindatangola vaashidoni, “Haunave wakati washikukulu mwaa inkuulukika venentete kutenda mandamano akupinga.”

³Bai nae àvele ku Betaniya, àikele pandamu nng'ande mwake Simoni aijá wamangundula, kuwika nkongwe jumo ànyukete ishupa yamauta akunung'angila ambone-uti aúka njuluku woe. Nkongwe ishupa yo kutumbula kutwala kumiminila mauta mmuti mwake Yesu.

⁴Napanelo vanji ve vapagwíte mulyutu alyo vandíshanga, “Mauta ala mwaa shani ankujaikanga pashikapali?

⁵Akandyululika kushulushika kupunda dinali dimiya nnatu[48] kuvajavila vákavele pashinu.” Nadoni vanavo vashinantangadikanga.

⁶Kanji napanelo Yesu kushidoni, “Nneke. Mwaa shani munkumwangaishanga? Nae aningutandela shinu shambone.

⁷Mwenu ngwengwe munkupagwa pamo na vákavele pashinu; mukalota munkuulula kuvatandela wambone wakati woewoe. Napane nangu hangupagwa ngwengwe namu mwenu.

⁸Nae atandilé shaulwile. Apakilé kaladavo mauta mumili wangu apanganianga mashiko angu.

⁹Ninkumwaulila mwiu doni, kula kushinu kwavalota kuvalanganga ntenga wambone mushilambo amu, namomo vinu vyatandile nkongwe aju vandavalanganga kenga kumbukumbu kwake nae.”

¹⁰Kutwala Yudashi Shikaliyote, jumo pakati pa avalá kumi na mbili kuvaukila vanang'olo vavakulangalalela-shadaka pakulota avakamudye Yesu.

¹¹Bai vanavo vakamwigwe, vandípuwanga namene kutwala kulivika kunnipa njuluku. Nadoni nae andítunduvanga kulambela dindila dyakuvakamudidya.

¹²Napanelo muliduva litandi lyashikukulu shamagung'u ákavele nkukumuku pavashinshinda ngandolo wa Pasaka, vakwoda vake Yesu vandímudya kushidoni, “Ulota Pasaka ai tukakupanganiangidye kwashi ulye?”

¹³Yesu kutwala kuvatuma vakwoda vake vavili kuvaulila kushidoni, “Wena kunjini. Koko ko mundakadyania na munu jumo ànyukete shilongo shamedi, mwode

¹⁴mpaka paing'ande yalota kwinjila. Mwenu mwaulile mwene ing'ande jo doni, ‘Mwalimu ankudya, “Shumba shangu shangulota kulyela Pasaka na vakwoda vangu shakwashi?” ’

¹⁵Nae anannangudya nshana wakulyandaula shana úvenavo vyombo uti, bai mwenu panganianga popo po.”

¹⁶Napanelo vakwoda vake vakauke nkaja mo vandíkadyedya kenga mo mwavaulidile. Bai vanavo vandípanganianga Pasaka.

¹⁷Pauwikile wakati wayalyulo, Yesu andyúka pamo na vakwoda vake kumi na mbili.

¹⁸Napanelo vàvele pandamu valya, Yesu andítangola kushidoni, “Ninkumwaulila mwiu doni, munu jumo pakati penu álya namu nangu, anangulimya.”

¹⁹Vanavo vandítunduvanga kuvanavo shipalodi kula munu amudya nae doni, “Da nangu?”

²⁰Kutwala Yesu kushidoni, “Ni jumo pakati penu mwenu kumi na mbili, munu álidya pamo namu nangu mundamu.

²¹Ninkumwaulila mwiu doni, Mwana Wamunu andaukila kenga mo mwavaandikidile vamwamba nae, napane aijá munu álota kunnimya Mwana Wamunu, munu ajo apambale! Kudyanga jojo jo, hanavalekwe.”

²²Napanelo pavashilya, Yesu andítwala ligung'u kwalaliya kumajanianga kuvapa vakwoda vake aashidoni, “Twala mulye. Au ni mili wangu.”

²³Namomo andítwala luwene kunnambwalela Nnungu kuvapa vakwoda vake vanavo uti kukumbila.

²⁴Kutwala kushidoni, “Avi ni myadi vyangu, myadi vyaimbodi vilóta kuvajaikila vanu voe.

²⁵Ninkumwaulila mwiu uti doni, mwiko hangukumbila kavili ugwalwa au wavyepo mpaka muliduva alyo lyangulota kukumbila muutawala wa Nnungu.”

²⁶Bai vakamalile kwimba lwimu vandyúmananga kuka kulishinga lyamilandi vya Ulivela.

²⁷Napanelo Yesu andívaulila vakwoda vake kushidoni, “Mwenu uti munangwambukanga mwaa vandyandika doni, “ ‘Nammyaa nkúshunga kutwala dingandolo kumwadilikananga.’[49]

²⁸Napane pangudyuka po, ndalangalela kuka ku Galileya.”

²⁹Patulu kutwala kushidoni, “Ata ikava kenga vavangu uti vandakwambukanga, nangu mene!”

³⁰Yesu kushidoni, “Ninkukwaulila mwiu doni, shilo sho shanelo ashi, ng'uku akanava kukangavela myanda mivili, wako unangukana myanda mitatu.”

³¹Patulu nae kulitaukanga na dimongo aashidoni, “Ata ikaulukika kupela namu wako, mwiko handikukana.” Namomo vanji avalá uti kutangalela momo.

³²Napanelo vanavo vankuwika palyutu lyavashema Geteshemani. Yesu ankuvaulila vakwoda vake kushidoni, “Mwenu ikalanga apa nangu mwanda ndashwali.”

³³Nae ankuntwala Patulu, Tiyagu namu Nshuwau kutunduvanga kwangaikanga na kumwida matuva

³⁴kutwala kushidoni, “Ungumi wangu unkuvanavo shipalodi shakutadya kupela. Mwenu ikalanga popo apa na mupimile.”

³⁵Nae kuka mushu padiki doni, kugwa kuunama pai kutwala kushwali pakulota wakati wída, ikaululika kwake nae haunamwike.

³⁶Napane kushidoni, “Aba, Atata, vinu uti wako unkuulula. Nyemya luwene alu pamili pangu ila haunatende mwangulatela nangu, tenda mwaulatela wako umwene.”

³⁷Bai Yesu kuujila kwavakwoda vake ndavakodya vàlalenge lwono kutwala kumwaulila Patulu kushidoni, “Simoni, da unkulala? Hauvé dimongo dyakupimila ata isaa imo?

³⁸Pimila na shwali pakulota hamunainjile mukutubigwa. Mwiu imumu inkuva tayali, mili ni udabadabenge.”

³⁹Nae kutwala kuka kavili ndashwali aujidya malove lolo matandi.

⁴⁰Paujite kuvakodya kavili vàlalenge mwaa mevo ave andíidapelwa na lwono na havashimanya shakunjang'ula.

⁴¹Paidile mwanda wantatu kuvaulila kushidoni, “Munkulala na munkupumula mpaka ambi? Panditosha! Napanelo wakati undiwika. Mwenu! Mwana Wamunu vaninnimya vankamudya kumakono kwavakutega.

⁴²Takatukanga tuke! Mwenu, aijá wakungulimya jo ankwida!”

⁴³Napanelo Yesu akuno atangola, Yudashi aijá wamushipinga sha avalá kumi na mbili kwidinneu na imbumba yavanu vànyukatenge maambila na dilungu. Vanavo vatumigwidye na vanang'olo vavakulangalalela-shadaka, vamwalimu vadishaliya na vanang'olo.

⁴⁴Nadoni nannimya andívapa shimanyikilo aashidoni, “Aijá wangulota kumwambatila ni jojo, nkamulinneu mumukenavo munshunga.”

⁴⁵Yudashi pawikile kukinneu kumwe Yesu ndaashidoni, “Labi!” Kutwala kumwambatila.

⁴⁶Bai vanu avalá vanínkamula Yesu kumunga.

⁴⁷Napanelo munu jumo e aimidíle popo, kwalamolenneu lyambila lyake kumyaa ntumika wake nkúlangalalela-shadaka nkumene kunnumula lyatu.

⁴⁸Yesu kutwala kushidoni, “Kenga nkalau shamwida na maambila pamo na dilungu kwida nangukamula?

⁴⁹Kula liduva ngushipagwa namu mwenu mwing'ande ya Nnungu ngupundisha, ata hamunguungile. Napane avi uti ni pakulota Maandiko awikile popo.”

⁵⁰Bai vakwoda vake uti vanínneka kutwala kutukutanga.

⁵¹Napanelo popo po, andípagwa nnemba jumo áshipita amwoda Yesu àjambele likuba tu. Vanavo kunkamula,

⁵²nae kujaa likuba lyo kutukuta matakudavo kuka.

⁵³Napanelo Yesu vandímuukanavo kumwe nkúlangalalela-shadaka nkumene kulyutu lyavakadyaniénge vanang'olo vavakulangalalela-shadaka, vanang'olo pamo na vamwalimu vadishaliya.

⁵⁴Patulu andímwoda Yesu kwakushu mpaka ndainjila mulugwani lumwe nkúlangalalela nkumene kutwala kwikala pamo na vakushunga kujota moto.

⁵⁵Bai vanang'olo vavakulangalalela-shadaka pamo na ikamati uti, vashindalambela ushuda wakulota kummalididye Yesu kanji havapatíle.

⁵⁶Vanu voe vashindaumya ushuda waushwang'a vammalanganga Yesu kanji ata wo ushuda wave, haushigwiníka.

⁵⁷Bai vanji vandítakatuka kumya ushuda waushwang'a vaashidoni,

⁵⁸“Wetu tundimwigwa munu aju aashidoni, ‘Nangu ndabamola ing'ande ai ya Nnungu yavadangile na makono kutwala nangu kudenga inji kwamaduva matatu kanji i namakono.’ ”

⁵⁹Ata kwaushuda awo, haushigwiníka.

⁶⁰Napanelo nkúlangalalela-shadaka nkumene andítakatuka kumudya Yesu kushidoni, “Da hashipali shakujang'ula vyavakutambudyanga avi?”

⁶¹Nae kumalala. Halipali lilove ata limo lyajang'wíle kutwala nkúlangalalela nkumene kumudya kavili, “Da wako Klistu, aijá Mwanagwe Wakwalaligwa?”

⁶²Nae kushidoni, “Elo, nangu ni nene. Bai mwenu mundamwona Mwana Wamunu àikele kunkanakono kwake Wadimongo-uti aida mumaundi kuwa.”

⁶³Nkúlangalalela nkumene kutwala kupapulanga dinguvo dyake kushidoni, “Shapo tulambela ushuda shani kavili?

⁶⁴Da mwenu shi mundimwigwa akupulu, napane mwona dashi?” Vanu uti vandimuukumu kenga inimmaikila apele.

⁶⁵Vanji pakati pave kutunduvanga kunshunangila mata, kumwinikidya kumevo, kunkoma kutwala kumudya, “Valanga, akukanywelé nyani?” Nadoni vakushunga vaníntwala kupita vankanyola malatuma.

⁶⁶Napanelo Patulu àikele mulugwani pai, ntumika jumo mwali umwe nkúlangalalela-shadaka nkumene kuwika.

⁶⁷Pangwene Patulu ajota moto, anínnola kutwala kushidoni, “Nawako momo undípagwa pamo namu Nnashaleti Yesu.”

⁶⁸Patulu kutwala kukana aashidoni, “Nangu nammanya shinu. Ata sho shautangola sho, hangumanyite.” Bai nae kutumuka kuka ndaimila pannango.

⁶⁹Napanelo jo ntumika aijá andímwona kavili Patulu, nae kuvaulila vanu vapagwíte apo kushidoni, “Aju nanae, wamushipinga shosho.”

⁷⁰Patulu nae kukana kavili. Bai muwakati padyoko vanu vapagwíte apo, vandímwaulila kavili kushidoni, “Mwiu uti, wako wamushipinga shosho mwaa gwegwe, ungalileya.”

⁷¹Napane Patulu kutunduvanga kulitaa dilana na kulilapa aashidoni, “Nangu nammanya shinu munu aju wamumwamba mwenu aju.”

⁷²Ng'uku kukangavalenneu mwanda wambili kutwala Patulu kukumbukila malove e amwaulidíle Yesu doni, “Akanava ng'uku kukangavela myanda mivili, wako unangukana myanda mitatu.” Bai Patulu andíkamulila kumuti kulila.