Read Ibibiliya mu Shimakonde Imbodi Yaambi na dimbande dya Imbodi Yakala Malukushi 15 Bible Online

Malukushi 15 - Ibibiliya mu Shimakonde Imbodi Yaambi na dimbande dya Imbodi Yakala bible

Malukushi 15

¹Napanelo lyamba linyeiku vanang'olo vavakulangalalela-shadaka, vanang'olo, vamwalimu vadishaliya pamo na ikamati uti yavayuda vandíikala nguguvale kutwala kumunga Yesu kumuukanavo kumwe Pilatu.

²Pilatu kumudya Yesu, “Wako umu wavayuda?” Yesu kushidoni, “Wako ni úvalanganga.”

³Bai vanang'olo vavakulangalalela-shadaka vashinantambudyanga vinu vyoe namene.

⁴Pilatu kumudya kavili mwanda unji, “Haunajang'ula shinu? Lola vinu vyoe vyavakutambudyanga.”

⁵Yesu nae hashipali shajang'wíle kuntadya Pilatu jo kushanga.

⁶Napanelo kula pashishiwika shikukulu, Pilatu ashindavaungulila nkúngwa jumo wavashinjugwa venentete.

⁷Bai andípagwa nkúngwa jumo walina Balabashi aungwídye pamo na vakalaumwagwe ve vavabyée vanu pamandamano akupinga.

⁸Nadoni imbumba yavenentete indímuukila Pilatu nanjugwa avatandele kenga mo mwanamaduva.

⁹Pilatu kutwala kuvaudya, “Mulota nimuungulile umu wavayuda?”

¹⁰Nae ashindamanya kenga vanang'olo vavakulangalalela-shadaka vaninkamudya Yesu kwake kwamwaa waing'ou.

¹¹Kanji napane vanang'olo vavakulangalalela-shadaka vo vandíkang'ela imbumba yavanu pakulota vanjugwe Pilatu avaungulile Balabashi.

¹²Pilatu kutangola navanavo kavili avaudya, “Napanelo mulota nintandele mwashi munu aju wamunshema umu wavayuda?”

¹³Vanavo kujunga pashanya po vaashidoni, “Nkamele panshalaba!”

¹⁴Pilatu nae kushidoni, “Mwaa wanyamani? Da shaukalau shani shatandile?” Kanji vanavo vashindamamodya kujunga pashanya po vaashidoni, “Nkamele panshalaba!”

¹⁵Bai Pilatu alota atendedye imbumba yavanu ivanagwele, andívaungulila Balabashi na akanshape Yesu viboko anínjaula vankamele panshalaba.

¹⁶Napanelo vaing'ondo vaníntwala Yesu kumuukanavo nng'ande mwananangalaledi walijimbo na popo po, vandívaimang'anianga vaing'ondo uti.

¹⁷Vanavo apalá vankungwadya ikanju yailangi yanshambalau, vankukandyanga lidaka lyamiva kungwadya mmuti

¹⁸kutwala kutunduvanga kumuudyanga vaashidoni, “Shikamu umu wavayuda.”

¹⁹Vashinankanyola mmuti na nkungulandi, vashinanshunila mata na vashinanguguvalila kutwala kulipudya kwake.

²⁰Ling'oto lyakumwiludyanga, vandímula ikanju yanshambalau yo kutwala kungwadya dinguvo dyake. Bai vaníntwala kumuukanavo panda likaja nankamela panshalaba.

²¹Napanelo munu jumo wa ku Shilene walina Simoni tatake Alishandale namu Lupu ashipita apo aaloka kwaludeya, vanavo vanínnamulila anyukate nshalaba.

²²Bai vanavo vaníntwala Yesu kumuukanavo palyutu lya Gologota kwakuvalangangila mana ake lyutu lyashivanga.

²³Napanelo vandímupa vinyu yavataíle mila kanji nae hakumbidíle.

²⁴Vanavo apalá vankunkamela panshalaba, vankujavananga dinguvo dyake vatenda shimwavi pakulota vamanye shakupata kula munu.

²⁵Napane indíwika satatu yalyamba, vanavo kunkamela panshalaba.

²⁶Pamuti pake vandyándika malove ankanidyo amwamba nae doni, “UMU WAVAYUDA.”

²⁷Vandívakamela vakwiva vavili pamo namu nae, jumo kunkanakono junji kunshanda.

²⁸[50]

²⁹Vanu váshipita apo vashindamwabalanga vaapukunianga myuti vaashidoni, “Wako únabamola ing'ande ya Nnungu kutwala kudenga mumaduva matatu,

³⁰liposhe gwegwe umwene na shuluka panshalaba po bai.”

³¹Namomo vanang'olo vavakulangalalela-shadaka pamo na vamwalimu vadishaliya vashindamwabwalanga vatangola shivenevene vaashidoni, “Vanji andivaposha kanji kuliposha mwene hanaulula shinu!

³²Ashi aju, Klistu, Umu Wavanaishilaeli! Bai ashuluke panshalaba pakulota twone na tukulupile.” Namomo avalá vavakamadíle pamo namu nae vashinantukana.

³³Napanelo kutunduvangila sasita yamui mpaka satisa yalyulo, shilambo uti shindíinjila shii.

³⁴Bai paiwikile satisa Yesu andíkugwa pashanya po aashidoni, “Eloi, Eloi, lama sabakitani?” mana ake, “Nnungu wangu, Nnungu wangu, mwaa shani uningwambukanga?”[51]

³⁵Napanelo vanu vanji ve vapagwíte apo, pavamwigwite atangola davo vanavo kushidoni, “Mwigwilile! Anshema Liyashi.”

³⁶Munu jumo pakati pave kutukuta kuka ndashuvika shipande shaivonu muulimu kutwala kupambya munkungulandi kuka nankumbidya Yesu akune atangola doni, “Nneke! Leka tulole ikava kenga Liyashi jo andaida nanshuluwa panshalaba.”

³⁷Bai Yesu patangwele pashanya po andíjaa shingumi

³⁸kutwala inguvo yamwing'ande ya Nnungu ailá kupapuka kuma kushanya mpaka pai.[52]

³⁹Napanelo nang'olo wavaing'ondo e aimidíle mushu mwake Yesu, paigwite shikutilo na mwajaidile shingumi Yesu, andítangola kushidoni, “Munu aju mwiu avele mwanagwe Nnungu.”

⁴⁰Namomo popo po, vandípagwa vakongwe vàimilenge kushu valola. Pakati pave vanji vo vavele ava: Maliya wa ku Magadalena, Maliya anyoke nnemba ndikidiki Tiyagu namu Yoshe pamo namu Shalome.

⁴¹Yesu àvele ku Galileya vakongwe ava vashindamwoda na vashinantumika. Namomo vakongwe vanji voe ve vaukíle namu nae ku Yelusalemu vandípagwa mulyutu alyo.

⁴²Napanelo liduva lilota lidimbe, kwoda livele liduva lyakulipanganianga pakulota liwike liduva lyakupumula,

⁴³Yoshe wa ku Alimateya munu wakwishimika mwikamati yavayuda kanji nanae momo ashindalindila utawala wa Nnungu, andímuukila Pilatu pakajugulanga shinu nanjugwa mili umwe Yesu.

⁴⁴Pilatu kutwala kushushukanga paigwite kenga Yesu andijaa tayali shingumi. Nae kunshema nang'olo wavaing'ondo kumudya ikava kenga mwiu Yesu andíjaa tayali shingumi.

⁴⁵Pilatu paigwite shana malove amwe nang'olo wavaing'ondo, nae anínnamulila Yoshe akatwale mili wake Yesu.

⁴⁶Bai Yoshe andíshuma ishanda yakunamikanga kusha mili umwe Yesu panshalaba kwavilidyanga na ishanda yo kutwala kuka ndavika mushonga shavapakaídye mulijanga. Akavike, andíingiliya lijanga kuka ndadiva pannango washonga.

⁴⁷Napanelo Maliya wa ku Magadalena pamo namu Maliya anyoke Yoshe vandyóna lyutu alyo lyavavikíle mili umwe Yesu.