Read Ibibiliya mu Shimakonde Imbodi Yaambi na dimbande dya Imbodi Yakala Malukushi 16 Bible Online

Malukushi 16 - Ibibiliya mu Shimakonde Imbodi Yaambi na dimbande dya Imbodi Yakala bible

Malukushi 16

¹Bai likadimbe liduva lyakupumula, Maliya wa ku Magadalena, Maliya anyoke Tiyagu pamo namu Shalome vandíshuma mauta akunung'angila pakulota vauke vakapake mili wake Yesu.

²Napanelo liduva litandi lyaishumana, lyamba linyeiku, kumanga kulangala, vanavo kuka kushonga.

³Pavashuka vashindaudyania vaashidoni, “Da lijanga livéle pannango pashonga apalá, atugang'alela nyani?”

⁴Napane pavaladile kwona lijanga vàgang'aladidye nnyenje, lijanga lyolyo lyo livele likumene namene.

⁵Vanavo vakainjila mushonga kutwala kumwona nnemba jumo àikele kunkanakono, àgwete ikanju yanashwe, vanavo kushushukanga doni.

⁶Nnemba jo kushidoni, “Hamunajope! Mwenu munnambela Yesu wa ku Nashaleti wavankamadile panshalaba. Nae andidyuka, apa hapali. Lola palyutu lyavannadídye.

⁷Kanji napane, wena mukavaulile vakwoda vake pamo namu Patulu kenga nae ankuka alangalela ku Galileya. Koko ko, mundamwona kenga mo mwamwaulidíle.”

⁸Bai vanavo vandyúma apalá pashonga vatukuta akuno vatatamela na kushanga. Vovo vo, havammalangidíle munu woewoe, vashindajopa. [

⁹[53]Yesu akadyuke liduva litandi lyaishumana lyamba linyeiku, munu ntandi kumuumililila avele Maliya wa ku Magadalena aijá wamuumídye majini saba.

¹⁰Jojo akauma kuka ndavavalangangila váshoodananavo, vanavo vàpagwite mushipalodi na mushililo.

¹¹Bai vanavo vakaigwe kenga Yesu mumi, nae andimwona, havakulupidíle.

¹²Napanelo ling'oto lyavinu avyo Yesu andívaumilila vakwoda vake vavili àvalalele munji vanavo vauka kwaludeya.

¹³Kutwala vanavo kuja kuka ndavavalangangila vavave, ata ive davo havakulupidíle.

¹⁴Muwakati unji kavili Yesu kuvaumilila avalá kumi na moja uti vàikalenge valya. Nae kutwala kuvashulanga kwamwaa waungakulupila wave na kunanopa kwamitima mwaa vo vangwéne àdyukile, havavakulupidíle.

¹⁵Napanelo Yesu andívaulila doni, “Wena mushilambo uti mupita mummalangangila kula munu ntenga wambone.

¹⁶Aijá álota kukulupila na kubatishwa, andaambwalegwa kanji ákakulupila, andaukumigwa.

¹⁷Avalá valota kukulupila vandavanavo vimanyikilo avi: kwamwaa wangu nangu vandakumulanga majini, vandatangola dinangodi dyaambi,

¹⁸vandakamula dinyoka kwali vakakumbila ishumu, hashipali shilota kuvatandeka, vandavavikila makono valwele kutwala vanavo kupona.”

¹⁹Napanelo UMU Yesu akamalile kutangola namu vanavo, nae po kutanduligwa kuka kuwa ndaikala kunkanakono kwake Nnungu.

²⁰Bai vakwoda vake vandyúmananga kuka vavalanganga ntenga wambone mumautu uti, UMU avapwashela na alodya ntenga awo kuva wiu kwamwaa wavimanyikilo víshoodana na ntenga awo.]