Read Ibibiliya mu Shimakonde Imbodi Yaambi na dimbande dya Imbodi Yakala Malukushi 3 Bible Online

Malukushi 3 - Ibibiliya mu Shimakonde Imbodi Yaambi na dimbande dya Imbodi Yakala bible

Malukushi 3

¹Napanelo Yesu andíinjila kavili mushitala shakulipudidya na momo mo andípagwa munu jumo wakudidimanga nkono.

²Mo mushitala mo, vashinannaledya namene valota vamwone ikava kenga anamponia munu ajo muliduva lyakupumula pakulota vapate nkanidyo wakunkashalidya.

³Bai Yesu andímwaulila munu wakudidimanga nkono jo kushidoni, “Imila shing'ati ashi!”

⁴Kutwala kuvaudya kushidoni, “Da muliduva lyakupumula lilamulo linkutuleka tutandedye vyambone kwali vyakunyata? Kuposha shingumi kwali kumalidya?” Vanavo kumalalanga do, vii!

⁵Akavalole vanu uti vantang'anadídye avalá kwashitundi akuno àvenavo shipalodi shoe kwamwaa wakunanopa mitima vyave, nae kumwaulila munu jo doni, “Nyalodya nkono wako!” Nae kunyalodya kutwala nkono kuujila kuva ungumi.

⁶Bai mapalishayo vandyúmananga kuka ndalyunganianga namu vashipinga shimwe Elode kumulya shemba Yesu valambela dindila dyakummalididya.

⁷Napanelo Yesu andínyema pamo na vakwoda vake kuka kulitanda na imbumba yavagalileya indímwoda koko pamo na

⁸vanu voe vakwaloka ku Yudeya, ku Yelusalemu, ku Idumeya, vakwalakela nkono unji wa Yudani na nanyenje likaja lya Tilu namu Shidoni; kumwoda mwaa wakwigwinikanga vinu uti vyashitenda nae.

⁹Kwamwaa wakuumbalanila vanu, Yesu kuvaulila vakwoda vake vampanganiangidye ingalava pakulota vanu vo havananshinye

¹⁰mwaa akavaponie vanu voe valwele vanji vashindagang'alananga vakanyilidya avakwae.

¹¹Vanu vamajini mashapu ngwengwe pavashimwona Yesu, majini lo ashindanguguvalila kutwala kukugwa pashanya po aashidoni, “Wako Umwana wa Nnungu.”

¹²Kanji Yesu ashindashulanga namene majini pakulota hanamwaulange ngala.

¹³Napanelo Yesu andíkwela palishinga limo kutwala kuvashema vanu vavalatile mwene, vanavo kumwidila.

¹⁴Nae kuvatandola kumi na mbili vovo vo kuvavika kuva vamyombe pakulota vapagwe namu nae na avatume vapite vavalanganga ntenga wa Nnungu

¹⁵na vavenavo madalaka akukumulangila majini.

¹⁶Vanu kumi na mbili avo vavele ava: Simoni wampéle nae lina linji lya Patulu

¹⁷kwatika Tiyagu na nkulumunu Nshuwau vanavake Shebedeu vavapéle nae lina linji lya Bowanelisheshi yani vanaing'uva

¹⁸kwida Andaleya, Pilipo, Balutolomeu, Mateu, Tome, kwatika Tiyagu mwanagwe Alupeu kwida Tadeu ndaida Simoni wa ku Kanaa

¹⁹kumalilila Yudashi Shikaliyote jojo ánnimidye Yesu.

²⁰Napanelo Yesu andíinjila nng'ande mwake kutwala kuumbalanila kavili imbumba yavanu mpaka popo Yesu na vakwoda vake ata litala lyakulyela shinu mene kuvapagwidya.

²¹Valikola vake pavaigwite vandímuukila vakankamule vamuukenavo kukaja mwaa vashitangola doni, “Nae andipungukanga.”

²²Vamwalimu vadishaliya vaalakadíle ku Yelusalemu vashindatangola doni, “Munu aju anintawala Beelishebuli; jojo ankukumulanga majini kwalilamulo limwe jo nang'olo wave majini jo, Beelishebuli.”[6]

²³Napavedoni Yesu andívashema kutwala kutangonavo kwamikong'o aashidoni, “Ilota kuululika dashi Shatwani kulikumulanga jo mwene?

²⁴Utawala woewoe ukalijavanienge kutwala kubyaananga shivenevene, utawala awo hamunapagwe munji ni kutimbikanga tu bai.

²⁵Vanalikola vakalijavanienge kutwala kutandana ing'ondo shivenevene, likola alyo hamunapagwe munji ni kutimbikanga tu bai.

²⁶Napavedoni Shatwani akalijavanienge kutwala kulitenda ing'ondo jo mwene, nae hamunampagwidye mwakuka mushu apagwa, akanditimbikanga.

²⁷I mwanavo! Da apali munu wakwinjila gwamba nng'ande mwamunu wadimongo pakulota kwiva mali ake? Mene, shitandi antuntila dimbuu mwene jo kutwala kukunga uti vyanng'ande.

²⁸Ninkumwaulila mwiu uti doni, vanu vandalivalivigwa madambi ave pamo na kukupulu kwave uti

²⁹kanji munu álota kunkupulu Imumu Wanashwe halivalivigwa, nae andavanavo likosha lyashimadambi shíkamalilika.”

³⁰Bai Yesu andítangola davo mwaa vashitangola doni, “Munu aju ankuvanavo lijini nshapu.”

³¹Napanelo anyoke pamo na vanung'unuvake vandíwika mulyutu alyo; vavele po panda po vandítuma vavashamele.

³²Mo nng'ande mo, vandíikalanga vanu voe vantang'anedidye kutwala vanu kumwaulila doni, “Nang'olo, anyoko, vanung'unuvako pamo na valumbuvako vapali panda po, vandákulota.”

³³Nae kuvaudya, “Ajala na vanung'unuvangu ni vakwashi?”

³⁴Bai akavalole vanu vantang'anedídye nae kushidoni, “Mwenu, ajala na vanung'unuvangu ni ava vavéle apa

³⁵mwaa munu woewoe átenda mwalatela Nnungu, munu aju ankwitika kuva mwanetu, numbwangu na ni ajala.”