Read Ibibiliya mu Shimakonde Imbodi Yaambi na dimbande dya Imbodi Yakala Malukushi 4 Bible Online

Malukushi 4 - Ibibiliya mu Shimakonde Imbodi Yaambi na dimbande dya Imbodi Yakala bible

Malukushi 4

¹Napanelo mumwanda unji kavili Yesu andítunduvanga kupundisha àvele nanyenje litanda. Popo po, imbumba ing'umene yavanu iníntang'anedya mpaka kuntadya nae kukwela mwingalava kwikala kunyamela padyoko kumedi kuleka imbumba yavanu ìvele kumwangu.

²Nae ashindavapundisha vinu vyoe kwadindila dyamikong'o kenga avi,

³“Tela matu mwigwe! Nkúlima jumo andyúka ndamwadilila imbeju yake yaulende.

⁴Pashimwadilila, kupagwa igwilidile nanyenje indila kutwala vyuni kwida ndadadalanga.

⁵Inji kugwilila paulongo wapashanya lijanga lyakulitandika kutwala kumalenneu mwaa ulongo wo hauvéle woe.

⁶Likakamele liduva nnandi wo kunyala kutwala kujuma mwaa dinyija hadilitavalakadíle.

⁷Inji kavili kugwilila paulongo wanashilanga, paimadile nanae nashilanga akamele nnandi wo kubyaika kutwala mene kupa vyepo.

⁸Napanelo imbeju inji kugwilila paulongo walutuba, yanavo yo kukonda kukulumuka kutwala kupa vyepo, lipata limo salasini, linji sitini na linji lyo miya.”

⁹Kutwala kavili kuvaulila doni, “Munu akavanavo matu akwigwidya, aigwe!”

¹⁰Napanelo Yesu àvele gweka yake, vakwoda pamo na avalá kumi na mbili vandímuudyangidya mana amikong'o avyo.

¹¹Nae kushidoni, “Mwenu apa vanintadya mumanye vipii vyautawala wa Nnungu, vanu vanji vákapagwite nkati, vanavo kula lilove linkuvaidila kwamikong'o

¹²pakulota “ ‘Valola avi, vandona kanji havaanalela, vaigwa avi, vandaigwa kanji havamanya shaambíka Leka ikave davo vakandishiliuka kutwala kulivalivigwa madambi ave.’ ”[7]

¹³Kutwala Yesu kuvaudya, “Da mwenu hamunamanya shinu mana ankong'o au? Ikava davo po mulota kumanya dashi mana amikong'o vinji uti?

¹⁴Bai nkúlima, apanda lilove lya Nnungu.

¹⁵Imbeju kugwilila nanyenje indila, vankuva vanu vapwashaléla lilove lipandígwa; vanavo muwakati wowo wavaigwa lilove, Shatwani kwidinneu ndaukula lilove lyavapandile mmitima myave.

¹⁶Namomo imbeju kugwilila paulongo wapashanya lijanga lyakulitandika, vankuva vanu vaigwilíla lilove lya Nnungu kutwala kupwashalalenneu na lipuwilo

¹⁷kanji kwamwaa úkave wakuvanavo dinyija, lilove lyo lipagwa muwakati padyoko mwaa vikavakodya vyamapipili kwali kupapatigwa kwamwaa walilove, vanavo vandájaika.

¹⁸Vanji ni vapandígwa munashilanga. Vanavo ni avalá vaigwilíla lilove

¹⁹kanji mangaikangilo awakati au, lung'unuku lwamali na lwavinu vinji, avyo vindáinjila ndashinya lilove mpaka kutadya mene kupa vyepo.

²⁰Napanelo imbeju kugwilila paulongo walutuba, vankuva vanu vaigwilíla lilove kupwashalela kutwala kupa vyepo salasini, sitini na miya.”

²¹Yesu kutwala kuvaudya doni, “Da itaa vanákaledya kutwala likalala kwinikidya kwali kuukanavo mulyungu igoli ndavika? Mene! Vakaledya pakulota vavike pashinu pakwaneka.

²²Hashipali shinu shashipii shíkavele shakulota kwaulika na hashipali shinu shilipiídye shíkavele shakulota kuumilila kulangele.

²³Munu akavanavo matu akwigwidya, aigwe.”

²⁴Kutwala kuvaulila doni, “Vikila kuntima vinu vyamwigwa avi! Shipimo shosho shamulalyangidya mwenu vinu vyamwigwa, namwenu shipimo shosho vanannalyangidya na yadavo vanamwanjadyedya

²⁵mwaa munu ávenavo vanamwanjadyedya na aijá ákavenavo ata sho shavenavo sho, vanampoka.”

²⁶Yesu kavili kushidoni, “Utawala wa Nnungu unkulinganana na kenga munu panamwadilila imbeju muulongo;

²⁷mui kwali shilo kulala kwali kutakatuka imbeju ako kumela na kukulumuka. Mwavitandakela mwene bila kumanya

²⁸mwaa wo wene ulongo wo ni útandedya vinu vipe; shinantandi kwipukila mamba kwatika mai kutwala mai lo kutandeka.

²⁹Po pavitandakanga po, munu jo atwalinneu shipula shake kupita aenga mwaa wakati wamapuno undiwika.”

³⁰Kutwala kavili kushidoni, “Utawala wa Nnungu tulandaniange na nyamani kwali tutumile nkong'o shani pakulota tuvalangange shana?

³¹Uvelé kenga imbeju yanshupi; pavapanda idikidiki kupunda dimbeju uti dipandíka muulongo

³²kanji vakapanda yanavo kumela kukulumuka kutwala kuva nnandi ukumene kupunda milandi vinji kulijava dinavi shana na vyuni vyakuniania kudenga vyanda vyave mulyuku mo.”

³³Bai nae atumila mikong'o vyoe kenga avyo ashindapundisha lilove lya Nnungu kwodana na mo mwavashuululila kwigwilila.

³⁴Hashitangola na vanu bila kutumila mikong'o kanji pashipagwa na vakwoda vake gweka uti ashindavavalangangila mana ake.

³⁵Napanelo muliduva lyolyo liduva lyenda kukudimba Yesu andívaulila vakwoda vake kushidoni, “Twamboke tuke litanda nkono unji.”

³⁶Vanavo kuleka dimbumba dyavanu popo kuka ndainjila mwingalava yavéle Yesu kumuukanavo; namomo dingalava dinji dinímpalakela.

³⁷Bai mo mulitanda ni kulipuka shimbunga, napanelo mawimbi ankwinjila mwingalava na medi mwingalava mo kuumbala.

³⁸Yesu avele kunyuma ingalava andílala lwono àijamidile litandiko lyakumuti. Bai vanavo kumwimulanga kutwala kushidoni, “Mwalimu, da kupela aku kwatupalanga tuvanu, haunajugulanga shinu?”

³⁹Nae akatakatuka kushulanga shimbunga na kutangalela litanda lyo kushidoni, “Limaladye! Haunapikitange!” Imepo kumalala kutwala pashinu po kumalalika do, kimyaa!

⁴⁰Nae kuvaudya vakwoda vake kushidoni, “Mwaa shani mwenu munkujopa namene? Da hamunava kuvanavo likulupililo?”

⁴¹Bai vanavo vandíjopa doni kutwala kuudyania shivenevene vaashidoni, “Da aju nyani átenda ata mpaka imepo na litanda kumwigwilila?”