Read Ibibiliya mu Shimakonde Imbodi Yaambi na dimbande dya Imbodi Yakala Malukushi 5 Bible Online

Malukushi 5 - Ibibiliya mu Shimakonde Imbodi Yaambi na dimbande dya Imbodi Yakala bible

Malukushi 5

¹Bai vanavo vakaamboka vakawika litanda nkono unji lijimbo lyavagelasha.

²Napanelo Yesu pashulwike mwingalava, kumakabuli ko kwalakenneu munu jumo walijini nshapu kumwidila.

³Nae ashinama ko kumakabuli na jojo jo, ata kwaupingo hapali munu áshuulula kumunga kavili.

⁴Myanda vyoe vashindamunga upingo mmadodo na mmakono; mang'unyang'unya lo, ashindalundumulanga, vitali vyake kulumulanga na hapali áshimuulula kundabyadabyanga.

⁵Shilo na mui ngwengwe ashindapita akugwanga-kugwanga kumakabuli na kumashinga alibyaanga-byaanga majanga mumili.

⁶Napanelo nae apalá pangwene Yesu kwakushu kuntukutila kuka ndanguguvalila mushu mwake

⁷kutwala kutangola pashanya po aashidoni, “Wako Yesu mwanagwe Nnungu Wapashanya-uti, da wako namu nangu shako nyamani? Ninkukujugwa pamevo a Nnungu, haunangupe shaushanga.”

⁸Andíjugwa davo mwaa Yesu anínnamulila lijini jo doni, “Wako lijini nshapu, mumili mwamunu ajo, kuma!”

⁹Bai Yesu kumudya, “Lina lyako nyani?” Nae kushidoni, “Lina lyangu Imbumba mwaa tuvelé tuvoe.”

¹⁰Kutwala kunjugwangila Yesu pakulota hanavakumulange mulijimbo alyo.

¹¹Napanelo popo po, indípagwa iminga yadinguluve íshilya palishinga.

¹²Uti alalá majini anínjugwangila Yesu, “Tulamulila tuke kwavanguluve akulá tukavainjile!”

¹³Yesu kulamulilinneu, majini mashapu anavo kuumananga kuka ndaviinjilanga vanguluve; iminga yadinguluve íshiwikila shilinga shadyalupu mbili yo kupandamokela mwibondi kuka ndatitimilanga mmedi.

¹⁴Bai vanu váshishunga dinguluve adyo vandítukutanga kuka ndavalanganga kunjini na mmagwelu kutwala vanu kuumananga kuka ndalola shitendo asho shuumidíle.

¹⁵Pavavandike pavele Yesu kumwona aijá munu wamajini e avénavo imbumba yamajini àikele, àgwete inguvo, àvenavo ding'ano dyashimunu kutwala vanavo kujopa.

¹⁶Avalá vanu vagwéne vene shitendo asho, kuvavalangangila vanji shinu shintandéke aijá wamajini na kuvalanganga shivatandéke vanguluve

¹⁷kutwala vanavo kutunduvanga kunjugwangila Yesu aume mushilambo shave.

¹⁸Napanelo Yesu pashiinjila mwingalava aijá e avénavo majini ashinanjugwangila pakulota anneke vauke pamo.

¹⁹Yesu kwita kumwaulila doni, “Wena kukaja mpaka kwavakwenu; koko ko, vavalangangile vinu uti vyakutandalele UMU na mwakwanangilidile shididi.”

²⁰Bai nae andyúka kutwala kutunduvanga kuvalanganga ku Dekapolishi vinu uti vyatandile Yesu na vanu uti vashindashanga.

²¹Napanelo Yesu akakwela kavili mwingalava kwambokela litanda nkono unji. Popo po, iníntang'anedya imbumba yavanu apalá pavéle nanyenje litanda.

²²Mwenu! Kuwika apalá nanangalaledi washitala shakulipudidya walina Yailu. Nae pamwene Yesu andínguguvalila mmadodo mwake

²³kunjugwangila namene aashidoni, “Mwanangu nkongwe ndikidiki nnwele, ninkunnalela po pantima apa! Nadoni ninkukujugwa tuke ukammikile makono kwambangidya apone na ave mumi.”

²⁴Yesu kutwala kuka namu nae. Napanelo yo imbumba yavanu yo ishindamwoda na inshinya.

²⁵Popo po, andípagwa nkongwe jumo auwíle vyaka kumi na mbili ulwele úkavele wakumalala kutumila.

²⁶Nae andípita mmakono mwavamitela voe na kujanga vyake uti kanji haulwíle kupona; mauvilo andyúka mushu amamodya.

²⁷Bai kwoda andígwa shimbili shimwe Yesu, andyúka ndalijalanianga mwimbumba yavanu kumuukila Yesu kunyuma kwake kutwala kukwaa ikanju yake

²⁸mwaa ashikumbukila doni, “Wona ngukwaa padyoko vela ikanju yake ndapona.”

²⁹Bai nae myadi kuma ko kumalalinneu, kulyona mumili mwake mauvilo alalá kumalilika.

³⁰Yesu kumanyinneu kenga mo mumili mwake dipali dimongo dyumíle kutwala kushiliuka kulola imbumba kudya doni, “Nyani ákwaidye ikanju yangu?”

³¹Vakwoda vake do, “Wako unkwona imbumba yavanu indikushinya, unnambela dashi munu ákukwaidye?”

³²Kanji nae ashindamyangamyanga tu nnyenje mwake alota amwone munu átandile shitendo asho.

³³Nkongwe jo àmanyite ashilá shintandéke akuno ajopa na atatamela, anímmandika Yesu kuguguvala mushu mwake kutwala kummalangangila umwiu uti.

³⁴Yesu kutwala kushidoni, “Mwanangu, likulupililo lyako lindikuposha, wena kwaamani na pona shilwele shako!”

³⁵Napanelo Yesu akuno ankutangola, avalá vanu vake aijá nanangalaledi washitala shakulipudidya vandiwika kumwaulila nang'olo wave kushidoni, “Mwanavo jo andipela! Haunauke mushu undingadinga mwalimu jo.”

³⁶Yesu bila kutanana malove alo, amwaulidilé nanangalaledi jo kushidoni, “Haunajope, ila kulupila.”

³⁷Nae andíleya kumwoda munu woewoe ila antwete Patulu, Tiyagu namu Nshuwau nung'une Tiyagu.

³⁸Pawikile paing'ande kwona shijungulima shavanu na kuvona vanu valila namene na vatangadikanga.

³⁹Nae andiinjila nng'ande amulá kuvaudya, “Mwaa shani munkujungulikanga na munkulila? Mwana aju hanapela shinu alelé vila.”

⁴⁰Vanu apalá vakamwakanga. Napanelo nae kuvaumadyanga vanu uti nng'ande amulá kuntwala tatamunu, jujumunu pamo na avalá váalekenavo kuka mpaka pavéle mwana.

⁴¹Nae aninkamula kutwala kushidoni, “Talita kumi!” mana ake doni, “Ndyoko, nangu ninkukulamulila, takatuka!”

⁴²Ndyoko ávenavo vyaka kumi na mbili vyaulinga jo, kutakatukinneu kutunduvanga kuwena kutwala vanu kushanga namene-uti.

⁴³Yesu kuvaleya namene pakulota havanammanyie munu kutwala kuvalamulila vamupe ndyoko jo shakulya.