Read Ibibiliya mu Shimakonde Imbodi Yaambi na dimbande dya Imbodi Yakala Malukushi 7 Bible Online

Malukushi 7 - Ibibiliya mu Shimakonde Imbodi Yaambi na dimbande dya Imbodi Yakala bible

Malukushi 7

¹Napanelo Yesu vandímwidila mapalishayo pamo na vamwalimu vanji pakati pavamwalimu vadishaliya vakwalakela ku Yelusalemu

²kutwala vovo vo kuvona vakwoda vanji vamwe Yesu valya na makono mashapu kwamwaa mene kunavanga medi kwayadi yave.

³Mapalishayo pamo na vayuda uti havanalya bila kunavanga medi kwayadi yave, vanavo vananawanga nyamani, yadi yavanyakala.

⁴Pavanauja kumautu aumbala vakananavanga medi kwayadi yave, havanalya shinu. Namomo vankunanawanga diyadi dinji dyoe kenga mwakuukangila diwene, vitumba na vyombo vinji vyavitali.

⁵Napanelo mapalishayo avalá na vamwalimu vadishaliya vandímudya Yesu kushidoni, “Mwaa shani vakwoda vako havanaodedya shinu yadi yavanyakala, vankulya mmakono mùvenavo ushapu?”

⁶Yesu kushidoni, “Nkúlava Ishaiya andivalanganga shana vyamushu amwamba mwenu mmanu mmamalambi aashidoni, “ ‘Venentete ava vangwishimu po pakanywa apa, ila ntima wave uvelé kushu namu nangu.

⁷Kwangu nangu vanavo vankulipudya bule, vapundisha kenga mapundisho shii malamulo avanu vene.’[10]

⁸Mwenu munkuleka lilamulo lya Nnungu munanawanga nyamani, yadi yavanu.”

⁹Kutwala kavili kushidoni, “Mwenu ngwengwe munkulambela dinamuna dyambone dyakukwapela lilamulo lya Nnungu mwambangidya munanawange yadi yenu.

¹⁰Musha anditangola kushidoni, ‘Mwishimu tatako na anyoko,’[11] na ‘Munu woewoe álota kumwiludyanga tatake na anyoke, vampedye,’[12]

¹¹kanji mwenu munkukwepa. Munkwona kenga munu akamwaulila tatake kwali anyoke doni, ‘Inudyo yoeyoe yanishilota nimwing'e ailá, ayo ni Kolibaa’ (Kolibaa, mana ake inudyo[13]),

¹²bai mwenu munkunneya munu ajo kuntandela shinu shoeshoe tatake kwali anyoke.

¹³Amu ni mwamuputangila mwenu lilove lyake Nnungu kanji kwamwaa wayadi yenu yamupundishania. Namomo munkutenda vinu vinji vyoe vyakuva kenga avi.”

¹⁴Napanelo Yesu andíshema kavili imbumba yavanu kutwala kushidoni, “Mwenu uti ngwigwilila na ngwigwa shana.

¹⁵Hashipali shinu shalakéla panda kumwinjila munu shuulúla kuntaa ushapu ila shintáa ushapu ni ashilá shúma mumunu.

¹⁶Munu ávenavo matu akwigwidya, aigwe.”

¹⁷Napanelo akanyeme paimbumba apalá, painjidile nng'ande, kwamwaa wankong'o aulá vakwoda vake kumudya.

¹⁸Nae kushidoni, “Da namwenu momo hamunamanya shinu? Da hamunamanya shinu kenga shinu shapanda shiinjíla mumili mwamunu hashuulula kuntaa ushapu?

¹⁹Hashinantaa ushapu mwaa hashinamwinjila muntima, shanavo shuka muliu kutwala ling'oto kunya.” Yesu patangwele davo ashimanyiya kenga vyakulya uti hashipali shivénavo ushapu.

²⁰Nae kuka mushu aashidoni, “Ashilá shúma mumunu ni shintáa ushapu.

²¹Ni muntima wamunu múma makumbukililo akunyata; kulavalava, kwiva, kubyaa, kulanavo nkongwe ákavele wako,

²²liu, ukalau, ushwang'a, kutaduka, ing'ou, kwabola, kulyona na imbeve.

²³Vyaukalau avi uti vyuma muntima mwamunu; ni vyovyo vintáa ushapu.”

²⁴Napanelo Yesu andyúma palyutu alyo kuka kwisemu yananyenje mwake likaja lya Tilu. Koko ko, nae awika paing'ande imo ashilota alipiyange kanji haiyululíke.

²⁵Bai nkongwe jumo ávenavo mwanagwe namako, namako jo ávenavo lijini nshapu, akaigwe vantambulanga Yesu, nae kumuukila kungwilangila mmadodo mwake.

²⁶Nkongwe jo avele mmidi wa ku Shilopoinike; napanelo anínjugwa Yesu pakulota ankumulange lijini mumili mwamwanagwe.

²⁷Yesu kumwaulila doni, “Shitandi valeke vana valye mpaka vaikute mwaa hashinava shambone kutwala shakulya shavana kuvajalela vang'avanga.”

²⁸Nkongwe jo kushidoni, “Elo UMU kanji ata vo vang'avanga vo, vandálya dingalamwamwa dyashakulya shavana digwilangíla mwina imesha.”

²⁹Yesu kushidoni, “Po paujang'wile davo po, twala mwanda uke, lijini jo, tayali andyuma mumili mwamwanavo mo.”

³⁰Bai nkongwe pawikile kukaja kunkodya mwanagwe àlele paigoli, lijini jo àmuumile tayali.

³¹Napanelo Yesu andyúma mwisemu ayo yananyenje mwake likaja lya Tilu kupita ku Shidoni kuka mpaka kulitanda lya Galileya apitila shilambo sha Dekapolishi.

³²Vanu vankumwidanavo kumwe Yesu munu jumo ákaigwa na walutata vankunjugwangila ammikile makono.

³³Nae pamuumidye mwimbumba yavanu, andímuukanavao kwagweka kunjela vyala kumatu na kunkamulangila mata mululimi.

³⁴Paladile kuwa, andísha ntima aashidoni, “Epataa!” Yani, “Shimuka!”

³⁵Kumatu ko kudiuka, lulimi lyo kungaluka na kutunduvanginneu kutangola shana.

³⁶Yesu andívaleya havanammalangangile munu kanji kila mwashivalaedya vanavo vashindamamodya kummalanganga.

³⁷Vashindashanga kupunda apo vaashidoni, “Uti vinu ankutenda shana, ankutadya mpaka vákaigwa vaigwe na vabubu vatangole.”