Read Ibibiliya mu Shimakonde Imbodi Yaambi na dimbande dya Imbodi Yakala Malukushi 8 Bible Online

Malukushi 8 - Ibibiliya mu Shimakonde Imbodi Yaambi na dimbande dya Imbodi Yakala bible

Malukushi 8

¹Napanelo mumaduva lolo lo, imbumba yavanu yùmbalanidile kavili na paikavanavo shakulya, Yesu kuvashema vakwoda vake kuvaulila doni,

²“Vanu ava ninkuvaanangila shididi mwaa vankutwala maduva matatu vavelé namu nangu na havave shakulya.

³Napavedoni ndikavaulila vaukanange kuding'ande kwave vàdobile indala, inkuululika kudilikanga shing'ati indila mwaa vanji vo vaaleke kushu.”

⁴Vakwoda vake kushidoni, “Vanu ava pakulota kuvalisha munu apata pashi magung'u panalugwangwa apa?”

⁵Yesu kuvaudya, “Muvénavo magung'u mangapi?” Vanavo do, “Saba.”

⁶Yesu ankuvalamulila venentete vaikalange pai. Nae patwete magung'u saba alalá kunnambwalela Nnungu kumajanianga, andívapa vakwoda vake pakulota vavajavile venentete, vanavo kutandela momo.

⁷Namomo dindípagwa dindemba padyoko do, nae paalalidye andívaulila doni, “Nadyanavo, java.”

⁸Vanu uti kulya mpaka kwikuta. Makombo lo avele oe, makalala saba.

⁹Palyutu alyo vanu vavele dyalupu nsheshe, bai nae andívalaila.

¹⁰Napanelo nae andíkwelenneu mwingalava pamo na vakwoda vake kuka kwisemu ya ku Dalamanuta.

¹¹Mapalishayo vandímwidila Yesu kutunduvanga kujunganavo vanninga ntima vanjugwa alodye shimanyikilo shakwalakela kuwa.

¹²Nae akaisha ntima namene kutwala kushidoni, “Mwaa shani vanu vaimbula ai vangujugwa shimanyikilo? Ninkumwaulila mwiu doni, vanu vaimbula ai havalodya munu shimanyikilo shoeshoe.”

¹³Napanelo nae pavalakile, andíkwela mwingalava kuka litanda nkono unji.

¹⁴Vakwoda vake vandílivaliva kunyukata magung'u, mwingalava mo vavénavo ali, limo bai.

¹⁵Napanelo ashindavaduma aashidoni, “Lilaledye! Lishunge kwaing'ano yankukumuku wamapalishayo na umwe Elode!”

¹⁶Vanavo kutaukananga shivenevene vaashidoni, “Shamumwona kutangola davo po, mwaa wetu hatunyukete magung'u.”

¹⁷Yesu amanya shivéle mmitima myave kushidoni, “Mwaa shani munkutaukananga ing'ano yakumwova magung'u? Da hamunava kwigwa na kwanalela? Mitima vyenu vindinanopa?

¹⁸Mevo mwenu munkuvanavo kanji hamunalola shinu; matu munkuvanavo kanji hamunaigwa shinu. Da hamunakumbukila shinu?

¹⁹Pandivajavidile vanu dyelupu tano magung'u mwanu apalá, makombo muumbadidye makalala mangapi?” Vanavo do, “Kumi na mbili.”

²⁰“Kushi pandivajavidile vanu dyalupu nsheshe magung'u saba apalá, makombo lo muumbadidye makalala mangapi?” Vanavo do, “Saba.”

²¹Kutwala Yesu kushidoni, “Napanelo hamunava kwanalela?”

²²Vanavo vakauka ndawika pa Beteshaida. Pavawikile, vankumwidanavo kumwe Yesu munu jumo wakuputala mevo kunjugwangila ammikile makono.

²³Nae pankamwile nkono munu jo andímuukanavo kunyenje likaja, kunshunila mata mmevo, kummika makono kumudya, “Dashi unkwona shinu shoeshoe?”

²⁴Munu aijá pang'amwile mevo kushidoni, “Ninkuvona vanu vilinga-vilinga kenga milandi vinkuwena doni.”

²⁵Yesu kummika kavili makono kumevo nae akuno alola ndoo! Munu jo kupona vinu uti kwona shana.

²⁶Bai Yesu anínnamulila auke akapumule pang'ande pake amwaulila doni, “Nkaja mo, haunamwaulile munu.”

²⁷Napanelo Yesu pamo na vakwoda vake vandyúma kuka kumakaja a ku Shashaleya imwe Pilipo. Vàvele ndila nae andívaudya vakwoda vake kushidoni, “Da vanu vanguvalanganga nangu kuva nyani?”

²⁸Vanavo do, “Nshuwau Wakubatisha, vanji Liyashi, vanji kavili do nkúlava jumo pakati pavakulava.”

²⁹Nae kuvaudya vanavo, “Kushi na mwenu po, mulota kunguvalanganga nangu kuva nyani?” Patulu patwete kujang'ula kushidoni, “Wako Klistu.”[14]

³⁰Nae kutwala kuvaduma pakulota havanammalangange kwavanu.

³¹Napanelo Yesu andítunduvanga kuvapundisha vakwoda vake aashidoni, “Mwana Wamunu inimmaikila apate mauvilo oe; inimmaikila vamwite vanang'olo, vakulangalalela-shadaka vanang'olo pamo na vamwalimu vadishaliya, apele na muliduva lyantatu lyake adyuke.”

³²Malove alo nae ashitangola ngala kutwala Patulu kunshamela Yesu kwagweka kuntangalela.

³³Yesu pashiliwike kuvalola vakwoda vake, aníntangalela Patulu doni, “Tumuka mushu mwangu Shatwani! Wako haunakumbukila shinu mwakumbukilila Nnungu, ukumbukila mwavakumbukilila vanu.”

³⁴Bai nae kushema imbumba yavanu pamo na vakwoda vake kuvaulila kushidoni, “Munu akalota kungwoda nangu, alishukulu jo mwene anyukate nshalaba wake angwode.

³⁵Mwaa woewoe álota aposhe shingumi shake, andakatoka kanji woewoe álota akatoke shingumi shake mwaa wangu nangu na kwamwaa wantenga wambone, andaposha.

³⁶Da munu alota kupata wambone shani akapata shilambo uti kutwala kukatoka shingumi shake?

³⁷Da shinu shani shalota kuulula kumya munu abadilishe na shingumi shake?

³⁸Munu woewoe waimbula ai yakulavalava[15] na yakutega akangwanangila nangu dyoni na kwanangila malove angu, Mwana Wamunu momo andamwanangila dyoni paida mulishangelo lyatatake àvele pamo na vanjelo vakwilimyanga.”