Read Ibibiliya mu Shimakonde Imbodi Yaambi na dimbande dya Imbodi Yakala Malukushi 9 Bible Online

Malukushi 9 - Ibibiliya mu Shimakonde Imbodi Yaambi na dimbande dya Imbodi Yakala bible

Malukushi 9

¹Kutwala kavili kushidoni, “Ninkumwaulila mwiu doni vapali vanu vanji popo apa, vanavo mwiko havapela vakanava kwona utawala wa Nnungu wida na dimongo.”

²Akapite maduva sita, Yesu akantwala Patulu, Tiyagu namu Nshuwau kuvaukanavo kushinu kwagweka kulishinga lyakukulumuka. Koko ko, nae kujalukanga pamevo pave;

³dinguvo dyake kuva dyanashwe na dyakushenga namene, kushwalela kwákaulula nkúshapa woewoe wamushilambo ashi kuwisha shilinga asho.

⁴Popo po kwaneka Liyashi, Musha vatangola namu Yesu.

⁵Patulu kutwala kumwaulila Yesu kushidoni, “Labi, ni shambone mwatupagwididye pashinu apa, leka tukandyange mautu matatu akwikala limo lyako, linji limwe Musha na linji live limwe Liyashi.”

⁶Nae hashimanya shashitangola mwaa vovo vo vashindajopa.

⁷Bai kutwala kushuluka lyundi kuwa kuvainikidya, mo mulyundi mo kwigwinika lidi litédoni, “Aju ni mwanangu waninnagwaledya! Jojo jo mwigwilile!”

⁸Kwashingangala vakalalyange nyenje mwave vanu vo vavagwene vyo, ngwee kumwona jo Yesu aju gweka na vanavo.

⁹Napanelo pavashishuluka mulishinga Yesu andívaleya havanammalangangile munu vinu vyavagwene mpaka palota kudyuka Mwana Wamunu pakati pavakupela.

¹⁰Bai vanavo vandípiyanga ing'ano ayo vaudyania shivenevene mana akudyuka aku pakati pavakupela.

¹¹Nadoni vakwoda vake vandímudya, “Mwaa shani vamwalimu vadishaliya vankushidoni, ‘Ivaikidilé Liyashi ave ntandi kwida?’ ”[16]

¹²Yesu do, “Mwiu paida Liyashi, andapanganianga vinu uti. Kanji mwaa shani indyandikigwa imwamba Mwana Wamunu doni, ‘Inimmaikila auvauvange vinu vyoe na ailudyangigwe’?

¹³Nangu apa ninkumwaulila doni, Liyashi jo andida na jojo jo, vanintenda uti vyavalatile kwodamwaa indyandikigwa imwamba nae.”

¹⁴Napanelo vanavo pavawikile pavavéle avalá vakwoda vanji vandyóna imbumba ing'umene yavanu ivatang'anadidye na vamwalimu vadishaliya vataukananganavo.

¹⁵Imbumba po paingwene Yesu indyángaikanga kutwala kuntukutila kuka ndamuudyanga.

¹⁶Nae kuvaudya vamwalimu vadishaliya, “Da mwenu mutaukananganavo nyamani?”

¹⁷Munu jumo mwimbumba mo patwete kulijang'ulidya kushidoni, “Mwalimu, ndimwidanavo mwanangu kwako wako, nae ankuvanavo lijini ántaa ububu.

¹⁸Lijini aju pashinu poepoe panankodya, anángwiidya pai, nkanywa mo kutuka shulu akuno akwishakwishanga meno na andájuma do, go. Ndivajugwa vakwoda vako pakulota vankumulange kanji vanavo vanintatakela.”

¹⁹Yesu do, “Shasho! Mwenu mmanu mmaimbula íkakulupila! Da nangu ndapagwa namu mwenu mpaka duvani? Nannaga mwenu mpaka duvani? Bai pane mwidenavo akuno ndyoko jo!”

²⁰Vanavo kumwidanavo. Napanelo lijini po pangwene Yesu aníntainneu shalala ndyoko jo, ndyoko kugwa kunneka agalagata pai na atuka shulu nkanywa.

²¹Yesu kumudya tatake mwana, “Shitendo ashi shinditwala wakati woe tangu shintunduvange?” Tatamunu kushidoni, “Tangu shidyoko shake.

²²Nomomo myanda vyoe anánjela pamoto na mmedi alota ammyae. Napanelo ukaulula kutenda shinu shoeshoe, twanangila shididi, tupwashela!”

²³Yesu kushidoni, “Ukaulula? Vinu uti vinkuululika kwa aijá ákulupila.”

²⁴Tatamunu kutangalenneu pashanya po aashidoni, “Nangu ninkukulupila ila ngupwashela kutema ungakulupila wangu.”

²⁵Napanelo Yesu pagwene iminga yavanu yumbalanila anínshulanga lijini nshapu jo kushidoni, “Wako lijini bubu na úkaigwa, nangu ninkukulamulila kuma mumili mwandyoko aju na haunainjile kavili!”

²⁶Lijini akuno akuta kungwiya ndyoko jo na dimongo kuma kunneka ndyoko àlele kenga andipela mpaka kuvatadya vanu kushidoni, “Alo, andipela!”

²⁷Yesu kanji kunkamula ndyoko jo nkono kuntakatuwa kutwala ndyoko jo kwimila.

²⁸Bai Yesu painjidile nng'ande vàvele gweka vakwoda vake vandímudya doni, “Da mwaa shani wetu hatuulwile kunkumulanga lijini jo?”

²⁹Nae kushidoni, “Lijini wakuva doni ankuululika kukumulangigwa kwaindila yakushwali bai.”

³⁰Vanavo vandyúma palyutu alyo kupitila ku Galileya. Napanelo Yesu hashilota vanu vammanye pavele

³¹mwaa ashindavapundisha vakwoda vake kushidoni, “Mwana Wamunu vanannimya kunkamudya kumakono kwavanu, vanavo vanampedya, ling'oto lyakupela, muliduva lyantatu lyake andadyuka.”

³²Vakwoda vake havashigwa shashamba vanavo vashindajopa kumudya.

³³Bai vanavo vandíwika ku Kapalanaumu. Napanelo àvele paing'ande andívaudya vakwoda vake kushidoni, “Da mwenu ndila amulá mushitaukananga nyamani?”

³⁴Vanavo kummalalanga mwaa vashipita vataukananga vammanye nyani nang'olo pakati pave.

³⁵Yesu kwikala kuvashema avalá kumi na mbili kuvaulila doni, “Munu akang'ang'anikila ave ntandi andava wamwisho na andava ntumika wavanu uti.”

³⁶Nae antwete ndyoko ndikidiki kumwimidya shing'ati shave kunkamula kushidoni,

³⁷“Munu woewoe ámpwashalela mwana ndikidiki kenga aju palina lyangu nangu, angupwashalela nangu; woewoe ángupwashalela nangu i do angupwashalela nangu gweka, ankumpwashalela momo aijá ángutumididye.”

³⁸Napanelo Nshuwau andítangola kushidoni, “Mwalimu, tungwené munu akumulanga majini palina lyako, wetu kunneya mwaa nae hashitwoda wetu.”

³⁹Yesu kushidoni, “Mene, mukananneye. Hapali munu álota kutenda makango palina lyangu, jojo jo kuulula kungutangalenneu kunyata

⁴⁰mwaa munu ákatuvangedya ankupagwa upande wetu.

⁴¹Ninkumwaulila mwiu doni, aijá álota kumupa luwene lwamedi mukumbila palina lyangu nangu kwamwaa wakuva mwenu mmake Klistu, mwiko munu ajo hakatoka shinu kupata lidaka lyake.

⁴²“Munu woewoe akantadya kukuvala ndyoko jumo pakati pavadikidiki ava vangukulupila nangu, kudyanga munu ajo kumuungila lijanga lyakwidopa pang'ulo kutwala kunjela mwimanga.

⁴³“Nkono wako ukakutadya ukuvale, lumula. Kudyanga kwinjila mushingumi ùlamele kuliko kuvanavo makono uti mavili kutwala kuka kushena kumoto úkadimika.

⁴⁴[17]

⁴⁵Lidodo lyako likakutadya ukuvale, lumula. Kudyanga kwinjila mushingumi ùlamele kuliko kuvanavo madodo uti mavili kutwala kukujela kushena.

⁴⁶[18]

⁴⁷Liu lyako likakutadya ukuvale, usha. Kudyanga kwinjila muutawala wa Nnungu na liu limo kuliko kuvanavo mevo uti mavili kutwala kukujela kushena,

⁴⁸kushinu “ ‘kwákawa shong'o wave na moto úkadimika.’[19]

⁴⁹Mumanye kenga kula munu vanantakila munyu na moto.[20]

⁵⁰Munyu, wambone kanji ukadalala ulota kuujidya dashi kavili kuva munyu? Mwenu avanavo munyu mmili myenu na avanavo amani munu na munumwagwe.”