Read Ibibiliya mu Shimakonde Imbodi Yaambi na dimbande dya Imbodi Yakala Lukashi 1 Bible Online

Lukashi 1 - Ibibiliya mu Shimakonde Imbodi Yaambi na dimbande dya Imbodi Yakala bible

Lukashi 1

¹Nang'olo Teopilo, vanu voe vandívanavo ntima wakwimyanga shana namene vinu vitandéke pakati petu

²kenga mwavatuvalangangidile avalá vo vavéle kutunduvangila kunantandi mashuda vagwéne vene na vatumika valilove.

³Napanelo nanangu yadavo, pangulambadile kumanya shana vinu uti kutunduvangila kunantandi, ininguvaila ngwandike nikupangila shana

⁴kwambangidya uvenavo uwakika kwavinu vyavakupundishidye.

⁵Muwakati umwe Elode umu wa ku Yudeya, andípagwa nkúlangalalela-shadaka jumo walina Shakaliya wamushipinga shavakulangalalela shavanaabiyashi.[1] Ndyagwe Shakaliya nanae avele wamushipinga shaudukulu umwe Aloni,[2] lina lyake Lishabeti.

⁶Bai vanu vavili ava uti vavele vaishaliya pamevo pake Nnungu. Vanavo vashindanama bila makosha mumalailililo uti na malamulo ake UMU.

⁷Kanji vanu vovo vo havavenavo vana mwaa Lishabeti avele nkongwe ákavaleka na uti ava vandíkangapalanga.

⁸Muliduva limo Shakaliya andípagwa akola madengo kenga nkúlangalalela-shadaka paing'ande ya Nnungu mwaa ivele ishumana yashipinga shake.

⁹Napanelo kenga lidyavalelo lyavakulangalalela-shadaka vandítenda nningo wakuntandola munu; nningo au kungwilila Shakaliya ainjile mwing'ande imwe UMU akatutumidye lubani.

¹⁰Pauwikile wakati wakututumidya lubani, imbumba yavanu uti ivele panda ishwali.

¹¹Nng'ande mo Shakaliya andímwona njelo wake UMU àimidile kunkanakono kwake alutali lwavashitutumyangidya lubani.

¹²Nae akamwone njelo aijá andíshushukanga na kujopa namene.

¹³Kanji njelo andímwaulila kushidoni, “Shakaliya, haunajope! Myembe vyako vindiigwinika. Napavedoni jo ndyavo Lishabeti jo, anammaleka mwana nnume na wako unanshema lina lya Nshuwau.

¹⁴Wako indakunagwela namene na undapuwanga namomo vanu voe vandapuwanga pakuvalekwa mwana ajo

¹⁵mwaa jojo jo, UMU anankulupila namene. Nae hakumbila shinu ugwalwa wakuma muvyepo na ata shinu shoeshoe shakwambalwisha. Imumu Wanashwe andapagwa namu nae kutunduvangila ata mo mmunda mwanyoke.

¹⁶Jojo jo andavatadya vanaishilaeli voe vamuujile UMU, Nnungu wave.

¹⁷Nae andauka mushu mwake nkati mwimumu na kwadimongo dimwe Liyashi ndashinjiulila mitima vyavatatamunu kuvana, kuvashinjiulila vákaligwa kwalimanyilo lyavaishaliya kwambangidya avapanganiange venentete vakumpwashalela shana UMU.”

¹⁸Kutwala Shakaliya kumudya njelo kushidoni, “Ata nangu malove ako lo ndakulupila? Shapo ngwona nangu pamo na ndyangu uti tundikangapalanga!”

¹⁹Njelo kushidoni, “Wako! Nangu Gabuliyeli ngúpagwa pamo na Nnungu, unkwigwa? Nditumigwa ngwide ngutangole namu wako ndikuvalangangila ntenga wambone vila au.

²⁰Bai hautangola, undava ububu mpaka muliduva lyavilota kutandeka vinu avi mwaa haukulupidile vinu vyanguvalenge vilóta kutandeka muwakati uvaikidíle.”

²¹Napanelo venentete ve vavéle panda vanninda Shakaliya aume mwing'ande ya Nnungu amulá, vakamwone kutima vanavo kushanga.

²²Nae paumidile panda hashuulula kutangola na munu. Vanavo kumanyinneu doni, mo nng'ande mo, shipali shagwene. Nae ashitangola vila na makono na andyúka mushu ava vi bubu.

²³Bai akamalilike maduva ake akutumika, nae andyújila kwing'ande yake.

²⁴Napanelo upitilé wakati padyoko tu, Lishabeti nkongwe ndya Shakaliya kwimita. Akaimite, kutwala kwikala nng'ande myedi mwanu alipiyapiyanga aashidoni,

²⁵“Vinu avi angutandilé UMU. Nae maduvano aningutanana kwambangidya anguushaniange dyoni kwavanu.”

²⁶Napanelo vikapite myedi sita, njelo Gabuliyeli Nnungu kuntuma auke kunjini umo wa ku Galileya wavashishema Nashaleti

²⁷kwamwali jumo ntete we wantamadíle nnemba jumo kunnomba walina Yoshe walikola limwe Daudi. Mwali aju vashinshema Maliya.

²⁸Múntenga akawike pavele nkongwe aijá atédoni, “Mashala ako wako útananigwidye. UMU avelé namu wako!”

²⁹Maliya akaigwe malove alo, andíitukanga namene kutwala kulyudya shintimatima kushidoni, “Shuudyangidi ashi shuudyangidi shani?”

³⁰Kanji njelo kushidoni, “Maliya, haunajope! Wako Nnungu andikutanana.

³¹Lola! Undaimita kummaleka mwana nnume kutwala kumupa lina lya Yesu.

³²Jojo jo andava nang'olo. Vananshema mwanagwe Wapashanya-uti. Mwana ajo, UMU Nnungu anantakatuwidya shiumu shanakulumunu Daudi.

³³Andavatawala venentete vake Yakobo muvyaka víkamalilika; utawala wake hauva na mwisho.”

³⁴Maliya kunjang'ula njelo jo doni, “Da shinu ashi shilota kuvalela mwashi nangu nikanava kummanya nnume?”

³⁵Njelo do, “Andakushulukila Imumu Wanashwe na dimongo dyake Wapashanya-uti dindakwinikidya. Nadoni jo mwana waulota kummaleka jo, vananshema Wakwilimyanga, Mwana wa Nnungu.

³⁶Lola! Ata jo nkuluvo Lishabeti àkangapele avi, andiimita shitumbo shamwana nnume. Jo wavashinshema ákavaleka jo, ambi apa ankuvanavo shitumbo shamyedi avi, sita.

³⁷Mwaa Nnungu pake po, hashipali shinkamadyangídya.”

³⁸Kutwala Maliya kushidoni, “Elo, ntumwa nkongwe umwe UMU, apali apa; vingutandeke kenga mo mwautangaladile mo.” Bai nae akatangole davo, njelo andínyema.

³⁹Napanelo mumaduva lolo Maliya andítakatuka kuka shipajelo kumashinga panjini umo wa ku Yuda.

⁴⁰Akawike, andíinjila nng'ande mwake Shakaliya kutwala kumuudyanga Lishabeti.

⁴¹Lishabeti paigwite lidi lyake Maliya, mmunda mwake mwana kupikita namene, Lishabeti kunnangalalela Imumu Wanashwe

⁴²kutwala kwatuka kutangola aashidoni, “Wako ni wakwalaligwa pakati pavakongwe na waulota kummaleka momo, andyalaligwa.

⁴³Da yaleké dashi anyoke UMU wangu kwida nangulola nangu?

⁴⁴Undimanya? Nangu pangwigwite lidi lyako unguudyanga, mwana mmunda mwangu amu andipikitinneu mwaa wakupuwanga.

⁴⁵Undijaligwa mwaa wako undikulupila vyavakwaulidile vilóta kutandeka vyalakela kumwe UMU.”

⁴⁶Napanelo Maliya kushidoni, “Ungumi wangu unkuntumbyanga UMU,

⁴⁷imumi yangu kulitamangila UMU Nnungu mwamboli wangu.

⁴⁸Nae andyona kwiludyangika kwankongwe ntumwa wake. Mwenu! Kutunduvangila ambi apa, vanu vadimbula uti vanangushema wakwalaligwa

⁴⁹mwaa Wadimongo-Uti aningutandela vikumene; lina lyake lindiilimyanga.

⁵⁰Ankuvaanangila shididi avalá vanjópa, vanu vaimbula ai kwida imbula ai.

⁵¹Nae anditenda vikumene na nkono wake; andivamwadilikanianga vaimbeve mumakumbukililo ammitima vyave.

⁵²Andivashuluwa vakutawala muviteng'u, kuvakwedya vakavalangigwa.

⁵³Andiviikutiya vyambone vákave pashinu, vatajili kuvakumulanga shing'alang'ala.

⁵⁴Animpwashela Ishilaeli ntumika wake akumbukila shididi shake

⁵⁵kenga mo mwalivikidile kwatatagwetu Abulaamu pamo na udukulu wake wamushu uti.”

⁵⁶Bai Maliya andíikanavo Lishabeti kenga myedi mitatu doni kutwala kuujila kwave.

⁵⁷Napanelo Lishabeti likamwikile liduva lyake lyakushuluwa, anímmaleka mwana nnume.

⁵⁸Vashitanonomwagwe pamo na vakwave vakaigwe doni UMU andimwanangila shididi Lishabeti, vandípuwanganavo namene.

⁵⁹Muliduva lyanane vanavo kuntwala mwana aijá kuka nankumula likumbi. Napanelo valota vansheme lina lya Shakaliya lina lyolyo lyatatake,

⁶⁰jujumunu kushidoni, “Mene! Mwana aju lina lyake Nshuwau.”

⁶¹Vanavo, “Aba! Nkwenu shani walina ali?”

⁶²Kutwala kumudya tatamunu vatangola na makono lina linnagwadíle vansheme mwanagwe.

⁶³Tatamunu kujugwa libau kwandika doni, “Lina lyake Nshuwau.” Vanu uti kushanga.

⁶⁴Muwakati wowo ikanywa imwe Shakaliya kuunguka, lulimi kungaluka kutangola antumbyanga Nnungu.

⁶⁵Kutwala vashitanonomwagwe uti kujopa. Dyabali adi, dindíigwinika mushilambo uti shamashinga sha ku Yudeya.

⁶⁶Vanu uti váshiigwanga dyabali adyo vashindakumbukila mmitima vyave vaashidoni, “Mwana aju alota kuva kenga nyani?” Mwaa mwiu vashindona doni dimongo dimwe UMU dipali namu nae.

⁶⁷Napanelo tatamunu Shakaliya alangalalegwa na Imumu Wanashwe andyáulanga ntenga wake Nnungu aashidoni,

⁶⁸Atumbyangilike UMU Nnungu wa ku Ishilaeli mwaa andida na andivaambola venentete vake.

⁶⁹Nkati muudukulu umwe Daudi ntumika wake, andimuumidya wadimongo wakuposha wetu wetu

⁷⁰kenga mo mwatangaladile kwaindila yavakulava vakwilimyanga vakala

⁷¹kwida ndatwambola kwavamongo vetu na kumakono kwauti avalá vatunyatíla.

⁷²Nadoni andilodya shididi shake shalivikile kwavatatavetu, andikumbukila imbodi yake yakwilimyanga

⁷³yakulilapa kwalilapile kwatatagwetu Abulaamu

⁷⁴kwambangidya tùvele mukuposhegwa kumakono kwavamongo vetu, tuntumikile patukajopa

⁷⁵tunama pamevo pake mukwilimyanga na mwishaliya mumaduva uti ashingumi shetu.

⁷⁶Napanelo unnemba wako undashamegwa unkúlava wake Wapashanya-uti mwaa undalangalela upita unkandyangidya UMU dindila dyake.

⁷⁷Undavatadya venentete vake vamanye kwambola kwaindila yakulivalivigwa madambi ave

⁷⁸kwamwaa washididi shalilotelo lyamuntima limwe Nnungu wetu shitwidíla paituvalila Yana yúma kushanya

⁷⁹ivalangadye avalá vapágwa mushii na mukupela na itulangalalele mwindila yaamani.

⁸⁰Bai mwana jo andíkulumuka na kunanopa mwimumu. Ashindanama mulilangalanga lyashimbweshe mpaka muliduva lyalyumilididye kwavanaishilaeli.