Read Ibibiliya mu Shimakonde Imbodi Yaambi na dimbande dya Imbodi Yakala Lukashi 10 Bible Online

Lukashi 10 - Ibibiliya mu Shimakonde Imbodi Yaambi na dimbande dya Imbodi Yakala bible

Lukashi 10

¹Vikapite avyo, UMU andívaalota vakwoda vanji sabini kuvatuma vavili vavili vauke valangalela mmakaja uti ashilota kupita nae

²kuvaulila kushidoni, “Mapuno avelé oe napane vamadengo vavelé padyoko nadoni njugwe mwene mapuno avatumidye vamadengo vanji mumapuno ake.

³Wenananga! Kanji lola, ninkuntumidya kenga mmangandolo shing'ati mavinji.

⁴Hamunanyukate iposhi, hamunanyukate lipeta, hamunanyukate vilatu na ndila mo, hamunatimatimange muntaa munu nandele.

⁵Paing'ande yoeyoe yamulota kuwikila, shitandi tangola doni, ‘Amani ipagwe paing'ande apa.’

⁶Paing'ande apo, akapagwa munu ávenavo amani, amani ayo inampata nae kanji akanapagwa, amani ai indamuujila mmene.

⁷Hamunapite mutanela ding'ande. Ikalanga paing'ande imo yoyo mulya na mukumbila ashilá shavalota kumupa vene mwaa mmádengo inimmaikila apate nshala.

⁸“Mulikaja lyoelyoe lyamuwika vanavo vampwashalela, shakulya shoeshoe shavamupa lyaa,

⁹valwele vaponie na muvaulile vanu doni, ‘Utawala wa Nnungu undimwikila.’

¹⁰Kanji pamuwika palikaja vanavo vaita kumpwashalela, wena mudyengo muushidoni,

¹¹‘Litutunga lyankaja amu litunamatidíle mmadodo ali, tunkumpumunila mmene. Ikala mumanya doni, utawala wa Nnungu undiwika.’

¹²Ninkumwaulila doni, muliduva lyaukumu venentete va ku Shodoma vandapata shaushanga shaangolo kuvapunda vanu valikaja alyo.

¹³Upambale wako Kolashimu! Upambale wako Beteshaida! Leka ku Tilu namu ku Shidoni àtandeke makango atandéke kwenu mwenu, vanavo doni vàlijugulenge kaladavo, valitaanga maguni, kulipakanga liu valilodya kulijugulanga kwamadambi ave.

¹⁴Napavedoni, vatilu namu vashidoni paukumu vandavang'unulangila padiki mevo kumpunda mwenu.

¹⁵Kushi wako Kapalanaumu, ulota ulikwedye mpaka kuwa? Bai vandakupandamwalela kumoka.

¹⁶“Munu ámwigwilila mwenu angwigwilila nangu, ámwita mwenu angwita nangu na ángwita nangu, amwita aijá ángutumididye.”

¹⁷Bai avalá sabini vandyúja na lipuwilo vaashidoni, “Nang'olo, palina lyako majini ni kutwishimu doni.”

¹⁸Yesu kushidoni, “Nangu ndimwona Shatwani agwa kuwa mwainaa yamoto.

¹⁹Lola, nangu ndimupa mwenu madalaka akuluvatila dinyoka, vinila na kumupa dimongo dyakutimbangila dimongo dyavamongo pashikantandeka shinu.

²⁰Mwenu hamunapuwange mwaa majini kumwishimu kanji puwanga mwaa mena enu andyandikigwa kuwa.”

²¹Muwakati wowo, Yesu andípuwanga namene kwaindila ya Imumu Wanashwe kutwala kushidoni, “Ninkukulambwalela Atata, UMU wakuwa na pai úpiidye vinu kwavanu vakumanya na vamang'amung'amu kutwala kuvalodya vanu vila. Ninkukulambwalela mwaa wako Atata utandalelé mwaulotalele.

²²Atata aningukamudya vinu uti. Hapali munu junji ámmanyite Mwana pakavele Atata na hapali ámmanyite Atata pakavele Mwana pamo namu aijá walota kummalangangila Mwana.”

²³Kutwala kuvashiliukila vakwoda vake kuvaulila vanavo gweka kushidoni, “Andijaligwa mevo aóna vinu vyamwona mwenu.

²⁴Ninkumwaulila doni, vakulava voe pamo na vaumu vashindalota vone vyamwona mwenu avi kanji havagwene na vashindalota vaigwe vyamwigwa mwenu avi kanji havaigwite.”

²⁵Mwe! Mwalimu jumo wadishaliya kutakatuka kunninga Yesu aashidoni, “Mwalimu, Ngutendé nyamani pakulota ngupate shingumi shíkamalilika?”

²⁶Yesu kushidoni, “Da mu Lilamulo mo, vaandiké nyamani? Paunashomya po wigwa dashi?”

²⁷Nae kushidoni, “Nnagwaledye UMU Nnungu wako na ntima wako uti, ungumi wako uti, dimongo dyako uti, ding'anong'ano dyako uti na nnagwaledye mujo kenga mo mwaulinagwaladyedya umwene.”

²⁸Yesu kutwala kushidoni, “Undijang'ula shana. Tandedya vyovyo vyo, uname.”

²⁹Kanji mwalimu wadishaliya pakulota alilodye kuvanavo ishaliya andímudya Yesu doni, “Shapo na nyangu jo ni wakwashi kavili?”[19]

³⁰Yesu kushidoni, “Munu jumo andyúma pa Yelusalemu kwalalela ku Yeliko; nindila kukodyanianavo vakwiva, vanavo kumuulanga uti vyagwéte, kunkanyalanga kuka kunneka àdilike.

³¹Kwakulolowananga nkúlangalalela-shadaka jumo kwalalela indila yoyo; akamwone munu aijá, nae nanyenje, shembe, shembe, ajo áuka jo.

³²Namomo mulawi jumo pawikile palyutu alilá akamwone, nanae, vee, kulyukila.

³³Kanji nshamaliya[20] jumo áshuka kwashuka, pawikile palyutu lyavéle munu aijá, akamwone andímwanangila shididi.

³⁴Anímmandika kumuukanga makana atanga mauta na ugwalwa wavyepo, kunkwedya mupunda wake kumuukanavo paing'ande yavajeni kutwala kumwangangalanga.

³⁵Palyamba lyake, andyúmya njuluku kumupa mwene ing'ande kumwaulila doni, ‘Mwangaikangile munu aju nimwene panguja shinu shoeshoe shalota kutumila, nangu ndakuujidya.’

³⁶Dashi, pakati pavanu ava vatatu, wakwashi waumwona kulilodya kuva muje munu wavankanyalénge vakwiva avo?”

³⁷Nae kushidoni, “Jo ámwanangidile shididi jo.” Kutwala Yesu kushidoni, “Bai wena ukatandele momo.”

³⁸Napanelo Yesu andyúkanavo mushu shimwanda shake pamo na vakwoda vake. Pavawikile palikaja limo, nkongwe jumo wavashinshema Malita kumpwashalela kwing'ande yake.

³⁹Jo Malita aju, andívanavo nung'une wavashinshema Maliya. Nae andíikala pepi na pamadodo amwe UMU amwigwilila shashitangola.

⁴⁰Kanji Malita ashinangaikangila mukutumika poe; nae kuka pavele Yesu ndamwaulila doni, “Nang'olo! Da inkukunagwela mwanetu kunguleka nangu ngukola madengo gweka? Mwaulile angupwashele!”

⁴¹UMU kushidoni, “Malita, Malita, shapo wako muntima mo unkwangaikangila vinu vyoe

⁴²kanji shilatégwa ni shinu shimo. Ni Maliya átandwele shinu asho shambone, hayululika kumpoka.”