Read Ibibiliya mu Shimakonde Imbodi Yaambi na dimbande dya Imbodi Yakala Lukashi 11 Bible Online

Lukashi 11 - Ibibiliya mu Shimakonde Imbodi Yaambi na dimbande dya Imbodi Yakala bible

Lukashi 11

¹Napanelo Yesu àpagwite mulyutu limo ashwali; painwike, nkwóda wake jumo andímwaulila kushidoni, “Nang'olo, tupundisha kushwali kenga mwavapundishididye Nshuwau vakwoda vake mo.”

²Yesu kushidoni, “Mukalota kushwali, kaashidoni, “ ‘Atata, lina lyako liilimyangike. Utawala wako wide.

³Tupa shakulya shetu shanelo.

⁴Tulivaliva madambi etu mwaa nawetu tunánnivaliva woewoe átutagela. Haunatulangalalele mukutubigwa.’ ”

⁵Nae kavili kushidoni, “Tuke tulole, munu jumo pakati penu kuvanavo mbwadigwe; napanelo munu aju kumuukila mbwadigwe ajo shilo shing'ati ndamwaulila doni, ‘Nyagwe, ngukapesha magung'u matatu

⁶mwaa aninguwikila njeni kwing'ande kwangu na nangu hanguvenavo shakulya shakumupa,’

⁷kutwala mbwadigwe jo kunjang'ula àvele mo nng'ande doni, ‘Haunangudingadinge. Nangu ing'ande ndijela nkong'o. Panguvele apa ndilala na vanavangu; hanguulula kutakatuka kwida ndakupa magung'u lo.’ Dashi inkuululika kunjang'ula davo?

⁸Mene, ninkumwaulila doni, ata akanatakatuke kuka ndamupa mwaa wakuva mbwadigwe kanji mwaa wakulota hanapate dyoni, andatakatuka kuka ndamupa kula shinu shalota.

⁹“Napavedoni nangu ninkumwaulila doni, “Jugwa mundapata, lambela mundona, taa odi mundapita;

¹⁰kula munu ájugwa anápata, álambela anóna na átaa odi, anápita.

¹¹Da tatamunu shani apa, ánatenda mwanagwe akanjugwa ligung'u nae kumupa lijanga, akanjugwa yomba nae kumupa nyoka

¹²kwali akanjugwa lii nae kumupa shinila?

¹³Bai ikava kenga mwenu mmanu mmakalau munkumanya kujaula vinu vyambone kuvapa vanavenu, Atata nimpomo nae kuwa ko, ananjaula Imumu Wanashwe kuvapa avalá vanjúgwa.”

¹⁴Napanelo Yesu anínkumulanga lijini bubu mumili mwamunu jumo. Lijini jo paumile bubu kutunduvanga kutangola, imbumba yavanu ni kushanga doni.

¹⁵Kanji vanu vanji pakati pave kushidoni, “Aju ankukumulanga majini kwalilamulo limwe Beelishebuli nang'olo wave majini.”

¹⁶Vanji pakulota kunninga vanínjugwa alodye shimanyikilo shakwalakela kuwa.

¹⁷Kanji Yesu amanya makumbukililo ave, andívaulila kushidoni, “Shilambo shoeshoe shavabyaananga shivenevene, shinábamoka na valikola vapwatána shivenevene, likola lyave linátimbikanga.

¹⁸Shatwani akalitenda ing'ondo jo mwene, utawala wake ulota kuka dashi mushu? Ninkutangola davo mwaa mwenu po munkushidoni nangu ninkukumulanga majini kwalilamulo limwe Beelishebuli!

¹⁹Kanji napane ikava kenga nangu ninkukumulanga majini kwalilamulo limwe Beelishebuli, kushi vakwoda venu vankukumulanga kwalilamulo limwe nyani? Ikava davo mwenu vovo vo, vandava vakuukumu venu.

²⁰Kanji ikava kenga nangu ninkukumulanga majini kwadimongo dyake Nnungu, bai utawala wa Nnungu unimpata bai.

²¹Munu wadimongo, wakulipanganianga shana na mabyanilo ake, akalaledya vinu vyapaing'ande pake; vinu avyo, vipagwa mu amani.

²²Kanji akamwidila munu junji wadimongo wakumpunda nae antenda ing'ondo antema, anámpoka mabyanilo ashilikulupilila na kunteka mateka.

²³Nadoni woewoe ákalyunganienge namu nangu, ankunguvangedya na woewoe ákakungaila namu nangu, ankumwadila.

²⁴“Mwenu, lijini nshapu akauma mumili mwamunu, anápita adumbadumba kushimbweshe alambela pashinu pakwikala. Akanakodya aashidoni, ‘Leka nguujile kwing'ande yangu kwangumile.’

²⁵Pawika, anákodya ing'ande yo vàpyailenge na vinu vàvikenge shana;

²⁶nae kuja kuka ndavashema majini anji saba akumamodya kubanga kumpunda nae. Vanavo kuka ndamwinjila munu ajo kwikalanga kutwala shinamilo shamunu aju muwakati awo, kuva shakumamodya kunyata kupunda shitandi.”

²⁷Bai nae akatangole malove ala, nkongwe jumo wamwimbumba kutangola namene kushidoni, “Andijaligwa nkongwe ákuvaleke na kukujang'edya.”

²⁸Kanji Yesu kushidoni, “Vamamodye namene kujaligwa avalá vaigwilíla lilove lya Nnungu na kuvikila kuntima.”

²⁹Napanelo imbumba nnyenje mwake Yesu ishindaanjadyeka kutwala nae kavili kushidoni, “Vanu vaimbula ai vakalau. Ashii vajugwa shimanyikilo shakwalakela kuwa! Kanji havona shimanyikilo ila shimwe Janashi bai.

³⁰Mo mwavalalele Janashi shimanyikilo kwavanenive, nanae Mwana Wamunu andava shimanyikilo kwavanu vaimbula ai.

³¹Paukumu umu nkongwe wakwina shilambo andatakatuka pakati pavanu ava kuvavalanganga kenga vankuvanavo makosha. Nae andyáloka kushinu kushu kwida ndaigwilila mapundisho ake Shalomoni kanji mwenu, ápagwite apa aju ni nang'olo namene kumpunda Shalomoni.

³²Vanenive yadavo paukumu vandatakatuka pakati pavanu vaimbula ai kutwala kuvaukumu mwaa pavaigwite kuvalanganga kwantenga kumwe Janashi vanavo vandíjugulanga. Mwenu, ápagwite apa aju ni nang'olo namene kumpunda Janashi.

³³“Hapali munu ánatenda akakaledya itaa kwinikidya kwali kuvika pashinu pakulipiya kanji avika pashinu pakwaneka kwambangidya vanu vainjila nng'ande mo vone kulangala.

³⁴Kwaupande wenu mwenu, liu ni itaa iinjídya lilangadyo mumili wenu. Liu likanava lingumi, mili uti undávanavo shii; likava lingumi, mili uti undávanavao lilangadyo.

³⁵Napavedoni lalyanga shana ikava kenga lilangadyo livéle mumili wenu halinava shinu shii.

³⁶Ikava kenga mili wenu uti unkuvanavo lilangadyo paukavanavo shii nkono unji, popo po mili awo uti undávanavo lilangadyo kenga painammulikila mwenu itaa lilangadyo lyake.”

³⁷Napanelo Yesu akuno atangola kwaloka mpalishayo jumo kunnalika kwing'ande kwake akalye shakulya. Nae kuka kwinjila nng'ande kwikala pandamu.

³⁸Mpalishayo kutwala kushanga namene mwaa wakumwona Yesu pakanavanga medi pandamu paikéle.

³⁹Kanji UMU kushidoni, “Mwenu mmapalishayo muukanga diwene na midamu panda gweka kanji nkati mo mundyumbalanga kushonda na ukalau.

⁴⁰Mmanu mmakupuwanikanga davo mwe! Da ákandyenge panda havele jojo ákandyenge nkati?

⁴¹Laledya shana vinu vyammitima vyenu kenga mo mwamunanaliyangidya shadaka shakuvapa vamashikini, mundona mwiu mundava mmakutakata.

⁴²“Mupambale mwenu mmapalishayo! Mwenu mumya likumi lyavinu uti vyakulunganga dimbogwa kuleka linagwaledyo kwa Nnungu na kutandedya vyaishaliya. Kudyanga pamukatandadidye vinu avi pamukailudyanga vinji.

⁴³Mupambale mwenu mmapalishayo! Mwenu múnagwaledya kwikala mumautu akulikwedya amuvitala vyakulipudidya na múnagwaledya namene kumuudyanga na ishima ing'umene muumbala.

⁴⁴Mupambale mwenu! Mwenu múvele kenga vyonga vigwalalidíle vanu kupita valuvatanga pashanya pavakamanya shipagwíte mulyutu alyo.”[21]

⁴⁵Kutwala mwalimu jumo pakati pavamwalimu vadishaliya kushidoni, “Mwalimu, pautangola davo po nawetu unkutuliula.”

⁴⁶Yesu kushidoni, “Mupambale namwenu mmamwalimu vadishaliya! Mwenu múvalamulila vanu valitike vyambumba víkaululika kulitika, mmene pamukadabunya ata padiki.

⁴⁷Mupambale mwenu! Múpita muumbanga vyonga vyavakulava vavabyénge vanakuluvenu.

⁴⁸Mwenu ni mmashuda múungidile nkono vitendo vyavanakuluvenu; vanavo vandibyaa mwenu kuumbila vyonga.

⁴⁹Nimomo mwalitangaladile Limanyilo lya Nnungu doni, ‘Ndavapalakadyedya vakulava na vamyombe, vanji vandavabyaa vanji vo kuvapapata,’

⁵⁰kwambangidya vanu vaimbula ai vadaigwe myadi vyavakulava vyavajénge kutunduvangila kunantandi shilambo.

⁵¹Vandadaigwa kutunduvangila myadi vimwe Abeli[22] mpaka myadi vimwe Shakaliya[23] wavamyaidile mwing'ande ya Nnungu pakatipakati akuno ku alutali ako kulyutu lya Nnungu. Ninkumwaulila ngala doni, myadi avyo Nnungu andavadai vanu vaimbula ai.

⁵²Mupambale mwenu mmamwalimu vadishaliya! Múpiidye mungulilo walimanyilo; mmene hamwinjidile na ata avalá váshilota kwinjila, mundivadivilila.”

⁵³Bai Yesu akamalile kutangola malove alo, vamwalimu vadishaliya namu mapalishayo vashinannyatila na vashinanshinya

⁵⁴vannumbata vapate nkanidyo kumili kwake.