Read Ibibiliya mu Shimakonde Imbodi Yaambi na dimbande dya Imbodi Yakala Lukashi 12 Bible Online

Lukashi 12 - Ibibiliya mu Shimakonde Imbodi Yaambi na dimbande dya Imbodi Yakala bible

Lukashi 12

¹Napanelo pavishitandeka vinu avyo, vanu makumi manga vandyúmbalanila mpaka kutadya kuluvatananga kutwala Yesu kuvashiliukila vakwoda vake kuvaulila kushidoni, “Lilaledye! Hamunapakalange nkukumuku wamapalishayo yani shinankulaba.

²Hashipali shinu shavapiidye shilóta hashinaumilile kulangele na hashipali shinu shavagwadyagwadyenge shilóta hashinamanyike.

³Shinu shoeshoe shaulota kutangalela pashii vanu vandaigwa mui liduva livala na shaulota kunyinyitila kushumba shindavalangangigwa panantutuvilo.

⁴“Nangu mwenu mmavangu ninkumwaulila doni, hamunanjope munu ábyaa mili kutwala mene kuvanavo munji mwakuntandela

⁵kanji ninkumwaulila nyani ávaikidile munjope; njope aijá ávenavo madalaka ánatenda akampedya munu kuntwala kunjela kushena. Mwiu jojo jo, njope!

⁶Da vanu havanashumidya vyuni mwanu na dishingo mbili? Bai Nnungu vovo vo, hapali ata jumo wannivaliva.

⁷Ata wo ugwimbu wammyuti vyenu wo, Nnungu andimanya ishabu yake. Mwenu hamunajope mwaa munkuvanavo mana makumene kupunda vyuni vyoe!

⁸“Ninkumwaulila doni, munu woewoe álota kulivalanganga kuva wangu pamevo pavanu, Mwana Wamunu momo anammalanga kuva wake pamevo avanjelo vake Nnungu.

⁹Kanji aijá álota kungukana pamevo avanu, nanangu nankana pamevo avanjelo vake Nnungu.

¹⁰Munu álota kuntangola kunyata Mwana Wamunu, analivalivigwa; kanji álota kunkupulu Imumu Wanashwe, halivalivigwa ata padyoko vela.

¹¹Mwenu vakamuukanavo kuvitala vyakulipudidya, kwavakutawala na kwavamadalaka, hamunangaikange mulambela mwakulishililididya na mwakutangalela

¹²mwaa muwakati wowo, Imumu Wanashwe anampundisha mwakutangalela.”

¹³Napanelo munu jumo pakati paimbumba yavanu andímwaulila Yesu kushidoni, “Mwalimu, mwaulile nkulwangu angujavile vinu uti vyalakile atata papadile.”

¹⁴Yesu kushidoni, “Wako! Da nangu angwalweté nyani kuva nkúukumu kwali nkújavanianga pakati penu?”

¹⁵Kutwala kwaulila imbumba yavanu kushidoni, “Lilaledye! Lishunge kwaing'ano yaliu mwaa shingumi shamunu hashivele muumbala wavinu.”

¹⁶Akavakang'ela apalá nkong'o au, “Munu jumo ntajili andílagwedya namene mulyala lyake.

¹⁷Nae, ‘Nduu, ngutandelé mwashi? Ngutae pashi vilyo vyangu?’

¹⁸Kutwala kushidoni, ‘Idavo, ndimanya mwakutandela. Ndaadulanga makuta angu ala, ngudenge anji makumene ngutae vilyo uti na vinji vyangu vyambone.

¹⁹Ling'oto ndaulila ungumi wangu doni, “Wako Ungumi! Napanelo undivanavo vyambone vyakutosha kutumila vyaka vyoe. Napavedoni pumula, lyaa, kumbila na puwanga.” ’

²⁰Kanji Nnungu kushidoni, ‘Wako undipungukanga! Shilo sho shanelo ashi ndakupoka ungumi wako! Panikupoka po, kushi vinu vyaukandyenge vyo, vyanyamani?’

²¹Shinu ashi shinkulandananga na munu álikungailila mali kanji akavele ntajili pamevo a Nnungu.”

²²Yesu kutwala kuvaulila vakwoda vake kushidoni, “Hamunaangaikangile shingumi shenu kwa ashilá shamulota kulya na ata mili vyenu kwa ashilá shakulota kugwadya.

²³Mwaa shingumi ni shinu shikumene kupunda shakulya na mili ni shinu shamana kupunda dinguvo.

²⁴Valole shana vanashove vo; vanavo havanapanda ata havananang'ena, havavenavo makuta ata vidimbi kanji Nnungu ankuvalisha. Kushi mwenu, hamuvenavo mana makumene kupunda vyuni?

²⁵Apali munu pakati penu ánaulula kwangangola kula shinu, ávele tayali kwanjadyedya padyoko vela shingumi shake?

²⁶Ikava kenga vinu vidikidiki nyenda avi vinkunnema kutandedya, mwaa shani munkwangaikangila vinji?

²⁷Lola shana maukutu adinduva mwakulumukila mo; vyanavo havinakola madengo, havinalikandyangidya dinguvo kanji ninkumwaulila doni, Shalomoni na lishangelo lyake uti hagwalidile kupunda vyanavo.

²⁸Kanji ikava kenga Nnungu ankunemya maukutu amadíle mumwitu alindíla muliduva lyake kujalegwa pamoto; kushi mwenu, mmanu mmalikulupililo lidikidiki, Nnungu annemya kupunda apo?

²⁹Mwenu hamunalambele shakulya na ata shakukumbila. Hamunajugulange.

³⁰Venentete uti vamushilambo vankwangaika valambela vinu avyo namwenu momo Tatagwenu andimanya kenga vinu avyo, munkulota.

³¹Shitandi kanji angaikangila utawala wa Nnungu; vinu avyo uti momo Nnungu andamupa.

³²“Hamunajope mwenu mmakwoda vangu mwaa Tatagwetu ininnagwela kumupa utawala wake.

³³Shulushanga uti vyamuvenavo njuluku wo, muvape vamashikini! Likandyangidye mapeta ákapapukanga na mali ákapunguka kuwa; kwanavo nkwíva hanapita na ushwa haupali.

³⁴Po panapagwa mali enu, ntima wenu upagwa popo.

³⁵“Likunjangile dinguvo dyenu na kaledya ditaa dyenu.

³⁶Tenda kenga mwavanatandela vanu vánaikala mevo vannindila nang'olo wave áukile kushikukulu shashitamo pakulota pauja ako kutaa kwene odi, vanavo vanshimulilinneu.

³⁷Vandijaligwa vatumika avo valóta kuvakodya nang'olo wave vàvele mevo pauja. Nangu ninkumwaulila mwiu doni, nae andagwalangila pakulota avatumike kutwala kuvaikadyanga pandamu kwida ndavatumika.

³⁸Nang'olo wave akawika shilo shing'ati kwali kumatingatinga, vandijaligwa vatumika avo valota kuvakodya vàvele mevo!

³⁹Manya doni, tatamunu mwene ing'ande leka àmanyite wakati walota kwida nkwíva, akananneke nkwíva ajo atema ing'ande.

⁴⁰Nadoni ikalanga mevo mwaa Mwana Wamunu andaida shingangala.”

⁴¹Kutwala Patulu kumudya, “Nang'olo, nkong'o au utukang'alele wetu gweka kwali watuvanu uti?”

⁴²UMU kushidoni, “Da wakwashi wavankamudidye wakukulupilika na wading'ano wammikile nang'olo wake kuva nanangalaledi wapaing'ande pake wakuvapa vamadengomwagwe shakulya muwakati uvaikidíle?

⁴³Andijaligwa ntumika walota kunkodya nang'olo paida atandedya momo.

⁴⁴Ninkumwaulila mwiu doni jojo jo, nang'olo anammika kuva munu wakulaledya vyake uti.

⁴⁵Kanji ntumika jojo akaashidoni, ‘Nang'olo wangu ankutima kuja,’ kutwala kuvakamanga vatumikamwagwe valume na vakongwe, kutunduvanga kulyanga gwamba na kwambalwa,

⁴⁶nang'olo wake ntumika jo andaida muliduva na muwakati wakalindila kutwala kumupa shaushanga shikumene ampambanianga mushipinga shavanu vákakulupila.[24]

⁴⁷“Napanelo ntumika ámanyite malotelo anang'olo wake kanji aikala vila na pakatandedya vilotéka, vananshapa viboko vyoe namene.

⁴⁸Kanji aijá ákashimanya malotelo anang'olo wake kanji akowa likosha livaikidíle vanshape, vananshapa viboko padyoko. Nadoni munu woewoe wavampele vinu vyoe, vanandai vyoe na wavankamudidye vinu vyoe, vanandai vyakupunda apo.

⁴⁹“Nangu ngwidilé ndakong'a moto mushilambo shapai. Kwalala dashi kwona moto awo utumbulwike tayali!

⁵⁰Ninkuvanavo ubatisho unguvaikidíle ngubatishwe, napane kutumbula dashi vingushanona muntima ata mpaka utandeke.

⁵¹Da mwenu mwona kenga nangu ngwidinavo amani mushilambo? Um! Mene, ninkumwaulila ngala doni, ngwidinavo umongo.

⁵²Kutunduvangila ambi apa, vanu mwanu vapaing'ande imo vandaapukananga, vatatu vandaungana kuvilingananganavo vavili na vavili vandaungana kuvilingananganavo vatatu.

⁵³Tatamunu na mwanagwe nnume vandavilingananga, jujumunu na mwanagwe nkongwe vandavilingananga, navyalamunu na navyalagwe vandavilingananga.”

⁵⁴Kutwala momo kwaulila imbumba yavanu kushidoni, “Pamunona lyundi lyalakela kwalyenda liduva lidimbya mwenu mutangalenneu kushidoni ‘Andatonya medi,’ namwiu kutonya.

⁵⁵Namomo pamunona imepo yakwalakela kwina shilambo ipunga mwenu muushidoni, ‘lilota kwida litukuta,’ namwiu kutandakela momo.

⁵⁶Mmanu mmashinankulaba mwe! Mwenu munkumanya kwaulangila vimanyikilo vyamushilambo na vyakuwa kanji mwaa shani hamunaulula shinu kwaulangila wakati au watuvele?

⁵⁷“Mwaa shani hamunaamuwa shinu mwemwe mmene avilá vivaikidíle kutenda?

⁵⁸Akuno uka namu waukashenienavo kumwe nkútawala, likanyalidye kwigwanianavo shing'ati indila. Ikanava davo andakuutangidya kumwe nkúukumu, nkúukumu jo kukuwisha kumwe nkúshunga na nkúshunga kukujela nkalaboshi.

⁵⁹Ninkukumanyiya ngala doni, nkalaboshi amo hauma ng'odo paukanava kulipanga njuluku mpaka idoshi.”