Read Ibibiliya mu Shimakonde Imbodi Yaambi na dimbande dya Imbodi Yakala Lukashi 13 Bible Online

Lukashi 13 - Ibibiliya mu Shimakonde Imbodi Yaambi na dimbande dya Imbodi Yakala bible

Lukashi 13

¹Muwakati wowo, vandípagwa vanu vammalangangidíle Yesu ing'ano yavagalileya; vagalileya avo Pilatu andívabyaa vatenda shadaka shakutaa moto, myadi vyavo kwanganikana namu myadi vyavanyama vashadaka.

²Kutwala Yesu kushidoni, “Da mwenu mwona kenga vagalileya avo pakupela davo vavele vakutega kuvapunda vagalileya vanji uti?

³Bai mene! Kanji mwenu mukanalijugulanga madambi enu mundapalela mo mwavapalalele vanavo.

⁴Ata avalá vanu kumi na nane livagwalaléle libodo lya ku Shilowamu kutwala kupalanga, mwona kenga vavele vakutega vakumamodya kuvapunda vayelusalemu vanji uti?

⁵Bai mene! Kanji mwenu mukanalijugulanga madambi enu mundapalela mo mwavapalalele vanavo.”

⁶Kutwala kulunda kukong'a nkong'o au, “Undípagwa nkungu wapandíle munu jumo mulishamba lyake lyamilandi vyavyepo;[25] paukile ndalola vyepo, hakadidye shepo ata shimo.

⁷Nae kumwaulila munu áshilaledya lyala alyo kushidoni, ‘Wako, ndiilanianga vyaka vitatu ngwida ndalola vyepo munnandi au kanji hangunakodya. Lumula. Mwaa shani udive lyutu muulongo amu?’

⁸Nkúlaledya kushidoni, ‘Nang'olo lindila mwaka au yadavo pakulota nangu ngwimbange nanyenje yake ngutaange mboleya.

⁹Ukapa vyepo, mwambone kanji ukanapa, undalamulila valumule.’ ”

¹⁰Muliduva limo lyakupumula, Yesu andípagwa apundisha mushitala shakulipudidya.

¹¹Mwe! Mo mushitala mo kupagwa nkongwe avénavo lijini lyauwíle vyaka kumi na nane ákashuuduka.

¹²Yesu akamwone anínshema kutwala kushidoni, “Namwana, undyambolegwa mushilwele shako!”

¹³Anímmikila makono, nkongwe jo kuudukinneu kutwala kumupa lishangelo Nnungu.

¹⁴Nanangalaledi wamushitala ashanga mwaa wakuponia Yesu muliduva lyakupumula, nae andyáulila imbumba yavanu kushidoni, “Apali maduva sita avaikidíle kukola madengo; mumaduva lolo lo, idananga vamponie kanji muliduva lyakupumula ali, um, mene.”

¹⁵UMU kutwala kushidoni, “Mmanu mmashinankulaba mwe! Apali munu pakati penu ákananshimulila ng'ombe wake kwali punda wake muliduva lyakupumula kuka nankumbidya medi?

¹⁶Kushi nkongwe aju mwanagwe Abulaamu wamuungile Shatwani vyaka kumi na nane, haimmaikidile kumwambola mukungwa muliduva lyakupumula?”

¹⁷Yesu akatangole doni, andívataa dyoni vamongo vake uti kanji venentete vandípuwanga mwaa wavitendo vyalishangelo vyashitandedya nae.

¹⁸Kutwala Yesu kavili kushidoni, “Utawala wa Nnungu ngulandaniange na nyamani na uvelé mwanyamani?

¹⁹Uvelé mwaimbeju yanshupi yapandile munu mulyala lyake; yanavo kumela, kukulumuka, kulijava dinavi kutwala vyuni vyakuniania kudenga vyanda mudinavi dyake.”

²⁰Kavili kushidoni, “Utawala wa Nnungu ngulinganiange na nyamani?

²¹Uvelé mwankukumuku watwete nkongwe jumo kutaa mudipishi nnatu dyaunga kutwala unga uti kukukumuka.”

²²Yesu andyúka mushu na shimwanda sha ku Yelusalemu apita atanela mmakaja makumene na madikidiki apundisha.

²³Kutwala munu jumo kumudya Yesu kushidoni, “Da nang'olo, vanu vakupwashegwa valota kuva padyoko?” Nae kushidoni,

²⁴“Likanyilidye kwambangidya mwinjilile pannango udikidiki mwaa ninkumwaulila doni, vanu voe vandalota vainjile kanji havaulula.

²⁵Tatamunu mwene ing'ande palota kutakatuka kushima nnango, mwenu mundapagwa panda na mundatunduvanga kutaa odi muushidoni, ‘Nang'olo, nang'olo, tushimulila!’ Nae ananjang'ula doni, ‘Nangu mwenu hanimmanyite kwamwaloka.’

²⁶Kutwala mwenu kulingangila kushidoni, ‘Shasho! Wetu tundilya na kukumbila shalumo namu wako na kavili gwegwe undipita upundisha mudyengo dyetu.’

²⁷Kanji nae andatangola doni, ‘Ngwigwa, nangu hanimmanyite kwamwaloka! Ngunyema apa mwenu uti mútenda vinu vyakunyata.’

²⁸Pamumwona Abulaamu, Ishaki, Yakobo namu vakulava uti vàvele kuutawala wa Nnungu, mwenu vàngang'aladidye panda, popo po mundalila na mundatuka shulu.

²⁹Vandaaloka vanu kwalyuma liduva, kwalyuka liduva, kushanya na kwina shilambo kutwala kupata mautu pandamu muutawala wa Nnungu.

³⁰Igwa shana, pakati pavamwisho vanji vandava vatandi na pakati pavatandi vanji vandava vamwisho.”

³¹Muwakati wowo atangola vandíwika mapalishayo kumwaulila kushidoni, “Tila uke! Mwaa Elode ankukupapata akubyae.”

³²Yesu kushidoni, “Wena mukamwaulile nansheto ajo doni, ‘Nangu apa, nelo na lunduno ninkukumulanga majini na kuvaponia valwele; ntondo kwinuka.

³³Kanji ata ikava davo ininguvaikila nelo, lunduno mpaka ntondo nguwene nguka ku Yelusalemu mwaa nkúlava haimmaikidile apalele panda Yelusalemu.’

³⁴Boo, Yelusalemu! Yelusalemu! Wako úvabyaanga vakulava na úvaamanga majanga avalá vavakutumididya! Dimindi dyoe ndilingangila kuvautamila vanavako kenga mwanavautamililila ng'uku vanavake kanji mwenu mene kulota.

³⁵Lola, ing'ande yenu indava lidembe na nangu ninkumwaulila doni, hamungwona kavili mpaka muwakati wamulota kutangola doni, ‘Aalaligwe aijá áida palina limwe UMU.’ ”