Read Ibibiliya mu Shimakonde Imbodi Yaambi na dimbande dya Imbodi Yakala Lukashi 14 Bible Online

Lukashi 14 - Ibibiliya mu Shimakonde Imbodi Yaambi na dimbande dya Imbodi Yakala bible

Lukashi 14

¹Napanelo muliduva limo lyakupumula, Yesu akauke kwing'ande yanang'olo wamapalishayo ndalya shakulya, vanavo vashinannaledya pepi-pepi.

²Mwe! Popo po, kuwika mushu mwake Yesu munu jumo avénavo shilwele shakuvimbanga mili.

³Kutwala Yesu kuvaudya vamwalimu vadishaliya namu mapalishayo kushidoni, “Lipali lilamulo lyakumponia munu muliduva lyakupumula?”

⁴Vanavo kumalalanga. Yesu kunkamula munu aijá kumponia kutwala kumwaulila auke.

⁵Yesu kuvaudya kavili, “Apali munu pakati penu álota kunneka pakamumya ng'ombe wake kwali punda wake àgwilidile mulipondo muliduva lyakupumula?”

⁶Vanu uti do, vii.

⁷[26] Napanelo Yesu akavone vakulalikigwa vanji vatandola mautu akulitandya, nae andívakang'ela nkong'o aashidoni,

⁸“Munu akakulalika kushikukulu, haunaikale mulyutu lyakulitandya mwaa inkuululika kulalikigwa munu junji waishima wakukupunda wako.

⁹Kutwala mwene ánnalike mwenu mmanu mmavili kwida ndakwaulila wako po doni, ‘Tumuka apo umpishe aju!’ Undaumila kudyoni kuka ndaikala kunyuma-uti.

¹⁰Kanji vakakulalika, ikala lyutu lyakunyuma-uti kwambangidya mwene ákulalike paida po, akwaulile doni, ‘Nyangu, apa tumuka ukaikale mushu amulá.’ Davo po wako undapata lishangelo pamevo avanu uti valota kupagwa mulyutu alyo.

¹¹Mwaa, munu woewoe álitumbudya vanantaa dyoni na aijá álijandya vanantumbudya.”

¹²Kutwala kumwaulila aijá mwene ánnalike ndalya shakulya kushidoni, “Ukapanganianga shakulya kwali shikukulu, haunavalalike vabwadivako, vanung'unuvako kwali vakuluvako, valikola vako na ata vavavo vatajili; mwaa inkuululika vanavo kukuujidya vilava kutwala nshala wako kuva wowo.

¹³Kanji ukapanganianga shikukulu, valalike vamashikini, vakulamala, vákalola,

¹⁴undona undajaligwa mwaa vanavo havavenavo shakukuujidya vilava. Wako vandakulipa muliduva lyakudyuka vaishaliya.”

¹⁵Napanelo munu jumo aikéle namu Yesu akaigwe malove alo, nae kushidoni, “Andijaligwa munu álota kupata lyutu pandamu muutawala wa Nnungu.”

¹⁶Kanji Yesu kushidoni, “Munu jumo andítenda shikukulu kutwala kuvalalika vanu voe namene.

¹⁷Paliwikile liduva lyakulya shikukulu, nae kuntuma ntumika wake auke akavaulile vakulalikigwa kushidoni, ‘Vinu akulá uti vivele tayali, tuke!’

¹⁸Vanavo kula munu kutangola shake. Ntandi aju kushidoni, ‘Nangu ndishuma inundu ngulota nguke ndikalole; ninkujugwa samani!’

¹⁹Junji kushidoni, ‘Nangu ngushumilé ambi apa ding'ombe mwanu ngulota nguke ndikavalingangile kulima; ninkujugwa samani!’

²⁰Kutwala junji kavili kushidoni, ‘Nangu ngulombilé ambi apa, ako hangwida.’

²¹Ntumika kuja, kummalangangila nang'olo wake malove ala uti; tatamunu mwene ing'ande jo àshimwidye andímwaulila ntumika wake kushidoni, ‘Uma shipajelo upite uwena mudibalabala na mudindila dyapalikaja upita uvatwalanga vamashikini, vakulamala namu vákalola uvaidenavo.’

²²Ntumika kuja kumwaulila nang'olo wake kushidoni, ‘Nangu vyaungutumile vyo, nditandedya kanji mautu andiijalila.’

²³Nang'olo kumwaulila kavili ntumika wake kushidoni, ‘Wena mudibalabala na mudindila dyanyenje likaja upite uvakamulanga vanu uvaidenavo vaumbalanile

²⁴mwaa nangu ninkumwaulila doni, vanu vatuvalalike avalá hapali álota kwida ndalya shikukulu ashi.’ ”

²⁵Napanelo Yesu, imbumba yavanu ipita impalakela, nae andíshiliuka kwaulila doni,

²⁶“Munu akaida kwangu alota kungwoda nangu kanji akanamwiludyanga tatake, anyoke, ndyagwe, vanavake, vakuluvake kwali vanung'unuvake, valumbuvake na ata kwiludyanga shingumi shake, hava shinu nkwóda wangu.

²⁷Namomo munu ákanyukata nshalaba wake kutwala kungwoda, hava shinu nkwóda wangu.

²⁸Da nyani pakati penu akalota kudenga, ákanaikala shitandi kukumbukila vyalota kutumila pakulota amanye kenga vindatosha kwali mene?

²⁹Akanatenda davo, po palota kutunduvanga kudenga, akanamalila vanu uti pavamwona vandamweka

³⁰vaashidoni, ‘Munu aju andítunduvanga shana kudenga kanji gwo, mwenu, atatakadile.’

³¹Da umu shani ánatenda akalota kuntenda ing'ondo umumwagwe ávenavo vaing'ondo voe vakuwikila dyalupu ishilini vakuvapunda vake dyalupu kumi, ákanaikala shitandi kulalyanga shipinga shake akanava kuka kwing'ondo?

³²Akalalyanga, aanalela vyakunanopa, vamongo vàvele kushu avatuminneu vadyoko vake kuka ndapakanila ipagwe amani.

³³Napavedoni munu woewoe pakati penu ákalota kuleka vinu vyavenavo uti, hava shinu nkwóda wangu.

³⁴Munyu wo, wambone. Kanji wo munyu ukadalala ulota kutakila nyamani?

³⁵Wanavo haunamanyikanga muulongo na ata kwakutenda mboleya, vatwala vila kujaa bai. Aijá ávenavo matu, aigwe.”