Read Ibibiliya mu Shimakonde Imbodi Yaambi na dimbande dya Imbodi Yakala Lukashi 16 Bible Online

Lukashi 16 - Ibibiliya mu Shimakonde Imbodi Yaambi na dimbande dya Imbodi Yakala bible

Lukashi 16

¹Namomo Yesu andívaulila vakwoda vake kushidoni, “Andípagwa munu jumo ntajili namene avénavo munu jumo wankamudídye vinu vyake. Napanelo ntajili jo, vandímwaulila kushidoni, ‘Munu wako jo, vyako kujaanga.’

²Nae kunshema wankamudidye aijá kumudya, ‘Da vyandikwigwanga avi kushidashi? Ngupa ishabu yakushunga kwako mwaa wako hauva shinu kavili wakukamulila vyangu.’

³Wankamudidye aijá do nduu, ‘Ngutandelé mwashi? Nang'olo wangu ankungumya mukushunga; kulima hanguulula, kupita ngujugwajugwa ngwona dyoni!

⁴Idavo, ndimanya shakutenda pakulota vakangumya mukushunga ngupate pakuwikila.’

⁵Nae kuvashema jumo-jumo vanu vavénavo madeni kwanang'olo wake kutwala kumudya ntandi, ‘Wako nang'olo wangu akudai nyamani?’

⁶Munu jo kushidoni, ‘Mangandingo miya amauta akulya.’ Mmádengo kutwala kushidoni, ‘Twala sheti shako shaudeni, shipajelo wandike amusini.’

⁷Kumudya junji, ‘Wako akudai nyamani?’ Nae kushidoni, ‘Maguni miya angano.’ Mmádengo kushidoni, ‘Twala sheti shako wandike samanini.’

⁸Kutwala nang'olo aijá kuntumbyanga wankamudidye aijá waungave-shaliya mwaa waujanja wake. Bai amu ni momo, vanu vawakati au vankuvanavo ujanja washinamidyo shave kuvapunda vanu valilangadyo mushinamidyo shave.

⁹“Nangu ninkumwaulila doni, panga dimbodi kuwa mutumila mali aungave-ishaliya pakulota mushu mo akamalilika, vanavo kuwa ko, vampwashalele.

¹⁰Ánakulupilika muvinu vidikidiki anákulupilika muvinu vikumene; waungave-ishaliya muvinu vidikidiki hanava waishaliya muvinu vikumene.

¹¹Shapo pakushi mwenu hamunakulupilika shinu mumali aungave-ishaliya, nyani álota kunkulupila muumwiu?

¹²Ikava kenga hamunakulupilika shinu muvinu víkave vyenu, nyani álota kumupa vyenu mmene?

¹³Hapali ntumika áulula kuvatumikila vanang'olo vavili, inkuululika kunnyatila jumo kunnagwaledya junji kwali kuntumbyanga jumo kumwiludyanga junji. Hayululika kuntumika Nnungu na kutumikila mali.”

¹⁴Bai mapalishayo vanu vakunagwaledya njuluku pavaigwite malove ala, vandímwiludyanga.

¹⁵Yesu kutwala kushidoni, “Mwenu ni mmanu múlivika kuva vaishaliya kwavanu kanji Nnungu andimanya mitima vyenu. Vinu vyavona vanu kuva vyamana, Nnungu pake po ona kuva vyakudabukanga.

¹⁶Lilamulo na Vakulava vindyaloka vitawala mpaka wakati umwe Nshuwau. Kutunduvangila apo, ntenga wambone wautawala wa Nnungu unkuvalangangigwa na kula munu álikanyilidya ankwinjila.[27]

¹⁷Mwenu kanji shinu shíkakamadyenge ni kulambaleka kuwa na pai kuliko kulambaleka lumbalukila lwa Lilamulo.

¹⁸“Kula munu ánneka ndyange kutwala kunnomba nkongwe junji munu aju ankulavalava; ata aijá ánnomba nkongwe wavannakile ankulavalava.

¹⁹“Andípagwa munu jumo ntajli áshigwalanga dinguvo dyamana; munu aju kula liduva ashindalya na ashindaikuta go-go-go.

²⁰Pannango pake ashindapagwa munu mmashikini walina Lashalu wavilonda vyoe mumili.

²¹Nae ashindalota alye dyangenga díshigwilangila pai pandamu wantajili, ata vang'avanga vashinannamba muvilonda.

²²Napanelo mmashikini aju kupela, vanjelo vake Nnungu kuntwala kumuukanavo kumwe Abulaamu; nanae ntajili kupela kutwala kunshika.

²³Ntajili àvele kumoka andíng'amula mevo akuno auvauvanga kumwona Abulaamu kushu, Lashalu àvele namu nae.

²⁴Ntajili kutwala kushema, ‘Atata Abulaamu, ngwanangila shididi! Ntume Lashalu jo adabidye shala mmedi aide angudidimidye mululimi mwaa ninkupata mauvilo makumene namene mmoto mwanguvele amu.’

²⁵Kanji Abulaamu kushidoni, ‘Mwanangu, kumbukila mushingumi shako undipata vinu vyambone kenga momo Lashalu mushingumi shake kupata vyakunyata. Ambi apa Lashalu ankupagwa mukupambadyangigwa, wako kupagwa mumauvilo.

²⁶Tuleke apo, kwatuvele wetu na kwamuvele mwenu pakati apa pavele lipondo likumene namene líkaululika kupita munu wakuno kwida ako na wako kwida akuno.’

²⁷Ntajili kushidoni, ‘Ikava davo, bai ninkukujugwa untume auke kwing'ande imwe atata.

²⁸Ninkuvanavo vanung'unuvangu mwanu vangulota auke akavaumidye ushuda kwambangidya vanavo havanaide momo mulyutu ali lyamauvilo.’

²⁹Abulaamu kushidoni, ‘Ako apali Musha na Vakulava; valeke vaigwilile vyovyo vyo.’

³⁰Ntajili kushidoni, ‘Mene wako atata Abulaamu. Leka àukile munu ádyukile pavakupela ndatangonavo, vanavo vakandilijugulanga.’

³¹Kanji Abulaamu kushidoni, ‘Vakanamwigwilila Musha na Vakulava ata pakaukile munu ádyukile pavakupela, havashambegwa.’ ”