Read Ibibiliya mu Shimakonde Imbodi Yaambi na dimbande dya Imbodi Yakala Lukashi 17 Bible Online

Lukashi 17 - Ibibiliya mu Shimakonde Imbodi Yaambi na dimbande dya Imbodi Yakala bible

Lukashi 17

¹Yesu kutwala kuvaulila vakwoda vake kushidoni, “Vyakunyata vitádya vanu kutega ngwengwe vindaumilila kanji apambale aijá álota kwidanavo vyakunyata avyo!

²Kudyanga munu ajo kumuungangila lijanga lyakwidopa paukoti kunjela mwimanga kuliko kuntadya kunkuvadya ndyoko ata pakavele jumo pakati pavadyoko ava.

³Shungana! Nung'unumunu akatega, ntangalele! Akalyambila, nnivalive.

⁴Akakutagela dimindi saba muliduva limo lyolyo, jojo jo akwidila dimindi saba aashidoni, ‘Ninkulyambila,’ nnivalive.”

⁵Vamyombe kutwala kumwaulila UMU kushidoni, “Twanjadyedya likulupililo!”

⁶UMU kushidoni, “Leka mùvenavo likulupililo lidikidiki vela mwaimbeju yanshupi, mukanditangalela nnandi wankwedu kushidoni, ‘Bubuka apa uke ukalipandikile kwimanga,’ wanavo kumwigwilila.

⁷“Wakwashi pakati penu ávenavo ntumika wake ánalimanga mala kwali ánashunga ding'ombe álota kutenda ntumika ajo akauja kundila kumwaulila doni, ‘Idinneu akuno tulye’?

⁸Da shitandi hanamwaulila doni, ‘Ngukandyangidya shakulya, likunjangile, ngutumikila pangulya, nikaikuta ling'oto ulye wako’?

⁹Da inkuululika nang'olo ajo kunnambwalela ntumika aju mwaa wakutandedya uti avilá vyantumile? Hayululika.

¹⁰Ata namwenu momo, mukatandedya avilá vyavantuma tangola doni, ‘Wetu tuvatumika vila túkave pashinu tutandadidyé vyo vivaikidíle tutandedye avi bai.’ ”

¹¹Napanelo Yesu pashuka ku Yelusalemu andípita pakati-pakati vilambo avi: Shamaliya namu Galileya.

¹²Akawike palikaja limo, vandímuukila vanu kumi vamalemba. Vanavo kwimilanga kushu

¹³kutangola pashanya po vashema vaashidoni, “Yesu, Nang'olo, twanangila shididi.”

¹⁴Yesu akavone, andívaulila doni, “Wenananga mukalilodye kwavakulangalalela-shadaka.” Bai vanavo vauka, mili vyave vyo, kutakata.

¹⁵Napanelo munu jumo pakati pave akalyone mili wake kutakata, andyúja atangola pashanya po amupa lishangelo Nnungu.

¹⁶Kutwala kugwilangila pamadodo pake Yesu annambwalela. Napanelo munu jojo jo, avele nshamaliya.

¹⁷Yesu kutwala kumudya, “Da hamutakete mmanu kumi? Kushi mwanu na nsheshe vo vavelé kwashi?

¹⁸Hapagwite ata jumo wakwida ndamupa lishangelo Nnungu ila jo mmidi aju bai?”

¹⁹Kutwala kumwaulila doni, “Takatuka uke likulupililo lyako, lindikuposha.”

²⁰Napanelo mapalishayo vamudya liduva lilóta kuwika utawala wa Nnungu, nae kujang'ula, “Utawala wa Nnungu haunaida na vimanyikilo vyakwaneka

²¹na ata hamwalota doni, ‘Au apa,’ kwali, ‘Aulá,’ mwaa wo utawala wa Nnungu wo, upali po pakati penu apa.”

²²Nae kutwala kuvaulila vakwoda vake kushidoni, “Unkwida wakati wamulota kunnagwela mwone kananga liduva limo vela pakati pamaduva a Mwana Wamunu kanji hamwona.

²³Vandamwaulila doni, ‘Alilá akulá,’ kwali ‘Ali apa,’ kanji hamunatumuke na hamunavode.

²⁴Mwaa mo mwamunanela kumeta kulangadya kuwa nkono au mpaka nkono unji, bai ni momo mwalota kuvalela Mwana Wamunu muliduva lyake.

²⁵Kanji shitandi inímmaikila auvauvange namene, aitigwe na vanu vaimbula ai.

²⁶“Mo mwavitandakalele mumaduva ake Noe, mumaduva ake Mwana Wamunu vindatandakela momo.

²⁷Mumaduva alo vanu vashindalya na vashindakumbila, vashindalombana na vashindaunga vitamo mpaka muliduva lyainjidile Noe mwingalava kutwala livambwe kwida kuvalya vanu uti.

²⁸Ilota kutandakela mo mwavitandakalele muwakati umwe Loti; vanu vashindalya na vashindakumbila, vashindashuma na vashindashulusha, vashindapanda na vashindadenga

²⁹kanji muliduva lyaumile Loti ku Shodoma, moto wakwalakela kuwa undíshuluka na lyoi lyakulakila lyoe momo lindíshuluka kutwala kuvalya vanu uti.

³⁰Muliduva lyalota kulilodya Mwana Wamunu ilota kutandakela momo.

³¹Muliduva alyo munu akava panda, vinu vyake vìvele nng'ande, hanainjile kuka ndatwala na akava kumala, hanaujile kukaja.

³²Nkumbukile ndya Loti jo.

³³Munu woewoe álota kugambela kuukanavo mushu shingumi shake andakatoka na álota kukatoka shingumi shake andaukanavo mushu.

³⁴Ninkumwaulila doni, muliduva alyo vanu vavili vàlele paigoli imo, jumo vanantwala junji kunneka.

³⁵Vanu vavili vandapagwa vatipula, jumo vanantwala junji kunneka.”

³⁷Kutwala vanavo kumudya, “Nang'olo, vilota kutandakela kwashi?” Nae kushidoni, “Po paulota kupagwa ntui, malembo andaumbalanila popo.”