Read Ibibiliya mu Shimakonde Imbodi Yaambi na dimbande dya Imbodi Yakala Lukashi 18 Bible Online

Lukashi 18 - Ibibiliya mu Shimakonde Imbodi Yaambi na dimbande dya Imbodi Yakala bible

Lukashi 18

¹Napanelo nae andíkong'a nkong'o avamanyiya vakwoda vake vashwalye ngwengwe pavakaujila kunyuma

²aashidoni, “Palikaja limo andípagwa nkúukumu ákashinjopa Nnungu na ákashimwishimu munu woewoe.

³Palikaja lyolyo momo kupagwa nkongwe jumo namwili; nkongwe ajo ngwengwe ashindamuukila nkúukumu nankanyilidya aashidoni, ‘Ngupa ishaliya kumili kwamongo wangu.’

⁴Nkúukumu andítwala wakati aita kumwangangola kanji mushu mwake andíkumbukila doni, ‘Ata ikava kenga nanjopa Nnungu na ata namwishimu munu

⁵kanji mwaa nkongwe aju ankungudingadinga namene, ndamupa ishaliya pakulota hanangutimbange kwida kwaida ngwengwe aku.’ ”

⁶UMU kavili kushidoni, “Dashi, mundigwa mwatandalele nkúukumu waungave-shaliya aju?

⁷Kushi Nnungu vakutandalegwa vake vannamadikíla shilo na mui vo, havapa ishaliya? Mwona kenga andatimatimanga kwavanavo?

⁸Ninkumwaulila ngala doni, nae andavapa ishaliya shipajelo kanji kushi Mwana Wamunu paida po, andakodya likulupililo mushilambo?”

⁹Nae kavili kukong'a nkong'o avaulila vanu váshilikulupila vo vene valyona kuva vaishaliya vavailudyanga vanu vanji:

¹⁰“Vanu vavili vandyúka kukushwali kwing'ande ya Nnungu. Jumo aju avele mpalishayo junji jo kuva nkúkatisha-ukodi.

¹¹Mpalishayo aju andíimila kutwala kushwali shintimatima doni, ‘Nnungu, ninkukulambwalela mwaa hanguvele kenga vanji; vakwiva, vakushonda, vaungave-ishaliya, vakulavalava na ata hanguvele kenga munu aju nkúkatisha-ukodi aju.

¹²Ndáunga dimindi mbili mwishumana na ndákupa likumi lyavinu uti vyangupata.’

¹³Kanji nkúkatisha-ukodi andíimila kushu na pakanyanyulila shilaka kuwa; nae ashindalikanyalanga pantima aashidoni, ‘Nnungu, ngwanangila shididi nangu ninkutega.’

¹⁴Ninkumwaulila doni, nkúkatisha-ukodi jo andyúja kuka kukaja Nnungu àmpele ishaliya kanji mpalishayo jo, ng'odo. Mwenu, munu álitumbudya, Nnungu anantaa dyoni kanji álijandya, Nnngu anantumbudya.”

¹⁵Vanu vashindavaukanavo vana vadikidiki kumwe Yesu pakulota avavikile makono; vakwoda vake vakavone vandívashulanga

¹⁶kanji Yesu kuvashamela kutwala kushidoni, “Valeke vadyoko vaide, hamunavaleye mwaa utawala wa Nnungu wavanu vavéle mwavadyoko.

¹⁷Ninkumwaulila mwiu doni, munu ákapwashalela utawala wa Nnungu kenga ndyoko, hainjila mwiko muutawala awo.”

¹⁸Kutwala nkútawala jumo muyuda kumudya Yesu kushidoni, “Mwalimu Wambone, ngutandelé mwashi pakulota ngupate shingumi shíkamalilika?”

¹⁹Yesu kumudya, “Mwaa shani ungushema wambone? Hapali wambone junji ni gweka Nnungu tu bai.

²⁰Wako undimanya malamulo ala: haunalavalave, haunabyae, haunaive, haunaumye ushuda waushwang'a na mwishimu tatako na anyoko.”

²¹Nae kushidoni, “Nangu malamulo ala ngutandandidyé kutunduvangila kushidyoko shangu.”

²²Yesu paigwite malove alo andímwaulila doni, “Shindikwijalila shinu shimo. Shulusha vyauvenavo uti, njuluku wo uvajavile vamashikini; undavanavo mali kuwa na wide ungwode.”

²³Kanji nae paigwite davo andívanavo shipalodi namene mwaa avele ntajiili nkumene.

²⁴Yesu pangwene munu ajo kuvanavo shipalodi shoe andítangola kushidoni, “Pandikamadyanga namene ntajili kwinjila muutawala wa Nnungu.

²⁵Shíkakamadyenge ni kupaleta ngamila palilanga lyakashinji kuliko kwinjila ntajili muutawala wa Nnungu.”

²⁶Kutwala vanu vaigwíte malove ala kushidoni, “Ikava davo nyani álota kwambolegwa?”

²⁷Kanji Yesu kushidoni, “Shinu shákaulula munu, Nnungu ankuulula.”

²⁸Patulu kushidoni, “Lola, wetu apa tundileka vyetu uti kutwala kukwoda.”

²⁹Yesu kushidoni, “Nangu ninkumwaulila mwiu doni, munu áleka vyake kwali ndyagwe kwali vanung'unuvake na vakuluvake kwali tatake kwali vanavake mwaa wautawala wa Nnungu,

³⁰aju andapata vyoe muwakati au na muwakati wída, kupata shingumi shíkamalilika.”

³¹Napanelo Yesu andívatwala avalá kumi na mbili kuvaulila kushidoni, “Mwenu, apa tunkwamboka kuka ku Yelusalemu; koko ko, vindatandeka vinu uti vyavaandike vakulava vimwámba Mwana Wamunu

³²kenga, vanankamudya kwavamidi kutwala vanavo kuntukananga, kumuvyanga, kunshunangila mata,

³³kunshapa viboko, vanampedya na muliduva lyantatu andadyuka.”

³⁴Kanji vamyombe havashimwigwa shana shashamba, mana amalove alo andílipiya; havashimanya shashilota kwamba Yesu.

³⁵Napanelo pavandike pa Yeliko, munu jumo wakuputala mevo andíikala nanyenje indila ajugwajugwa.

³⁶Nae akaigwe imbumba yavanu ipita, andyúdya víshitandeka

³⁷kutwala vanu kumwaulila doni, “Yesu wa ku Nashaleti ankupita.”

³⁸Napanelo nae kutangola pashanya po ashema aashidoni, “Yesu, Mwanagwe Daudi! Ngwanangila shididi!”

³⁹Kutwala vanu valangaladíle kunshulanga vamwaulila amalale kanji nae kuka tu mushu amamodya kutangola pashanya po, “Mwanagwe Daudi wako! Ngwanangila shididi!”

⁴⁰Yesu kwimila, kutuma vamwidenavo munu aijá. Akavandike, Yesu andímudya,

⁴¹“Da ulota ndikutandele mwashi?” Nae kushidoni, “Nang'olo, ngulota ngulole.”

⁴²Yesu kushidoni, “Lola! Likulupililo lyako lindikuponia.”

⁴³Munu jo muwakati wowo kulalenneu kutwala kumwoda Yesu apita amupa lishangelo Nnungu. Bai vanu uti vakone shitendo asho vaníntumbyanga Nnungu.