Read Ibibiliya mu Shimakonde Imbodi Yaambi na dimbande dya Imbodi Yakala Lukashi 19 Bible Online

Lukashi 19 - Ibibiliya mu Shimakonde Imbodi Yaambi na dimbande dya Imbodi Yakala bible

Lukashi 19

¹Yesu nkaja mu Yeliko apitile vila ndila.

²Napanelo mulikaja lyolyo lyo, andípagwa munu jumo wavashinshema Shakeu. Nae avele nanangalaledi wavakukatisha-ukodi na avele ntajili.

³Jojo jo, ashindalota amwone Yesu mwavalalele kanji haishululika kumwona mwaa andíipika na vanu vandíinjipa.

⁴Bai nae andítukutila mushu ndakwela munnandi[29] pakulota amwone Yesu mwaa Yesu ashuka shalatoto lyutu lyolyo.

⁵Yesu pawikile apalá paladile muwa andímwona Shakeu nae kushidoni, “Shakeu! Shuluka shipajelo mwaa nelo ininguvaikila ngupumulilile paing'ande pako.”

⁶Shakeu kushulukinneu kumpwashalela Yesu na lipuwilo lyoe.

⁷Kutwala vanu uti pavagwene davo kutangadikanga vaashidoni, “Kumanya dashi kulitenda shijeni kwankútega!”

⁸Kanji Shakeu andítakatuka kumwaulila Yesu kushidoni, “Nang'olo ngwigwa, nangu ndatwala inushu yamali angu ndivape vamashikini; ata akapagwa munu wanimwividile shake, ndamuujidya nimwanjadyedya myanda nsheshe.”

⁹Yesu kushidoni, “Nelo paing'ande apa kundimwikila kwambolegwa mwaa munu aju momo avelé mushipinga shaudukulu umwe Abulaamu.

¹⁰Mwaa Mwana Wamunu aidilé ndavalambela na ndavaposha vajaíke.”

¹¹Napanelo vanu vamwigwilila pashitangola, Yesu andíjilika avakang'ela nkong'o mwaa wakuvandika pa Yelusalemu na vanu vashona kenga utawala wa Nnungu undawikinneu.

¹²Nadoni andítangola kushidoni, “Andípagwa munu jumo walikola lyashiumu atwéte mwanda kuka kushilambo shakushu vakankamudye shiumu ling'oto auje.

¹³Akanava kuka, nae andívashema vatumika vake kumi kuvajavila njuluku kutwala kuvaulila doni, ‘Tandela mishulushu mpaka panguja.’

¹⁴Kanji vanu vakushilambo shake vashinannyatila. Nadoni vandívatuma vanu vamuukile vakatangole doni, ‘Hatutamwa kututawala munu aju.’

¹⁵Bai munu aijá paujite ling'oto lyakunkamudya shiumu, andítuma vanshamele vatumika vavapéle njuluku avalá pakulota amanye shapatile kula munu munshulushu wake.

¹⁶Kumwidila ntandi kushidoni, ‘Nang'olo, njuluku wako waungupéle, undyanjadyeka dimindi kumi.’

¹⁷Nae kushidoni, ‘Shambone namene! Wako ni untumika shii. Ikava kenga undikulupilika kuvinu vidikidiki, undavanavo madalaka amakaja makumene kumi.’

¹⁸Kwida wambili kushidoni, ‘Nang'olo, njuluku wako undyanjadyeka dimindi mwanu.’

¹⁹Ajo kumwaulila kushidoni, ‘Wako undavanavo madalaka amakaja mwanu.’

²⁰Kwida wantatu kushidoni, ‘Nang'olo njuluku wako wo au, twala, nangu ndyútika mulilesho;

²¹nishindakujopa mwaa wako ni umunu wakudingadinga, undátwala shinu shaukakandidye na undánang'ena paukapandile.’

²²Kanji nang'olo kushidoni, ‘Wako ni untumika wakubanga namene! Ndakuukumu kwodananavo avilá vyauvalangenge wako umwene. Namwiu, wako undímanya shana doni nangu ni nimunu wakudingadinga, walukwinnyango na ngunanang'ena pandikapandile.

²³Kanji napanelo mwaa shani hauvikile njuluku wangu kubengi pakulota nimwene panguja ngutwale njuluku wangu na ashilá shanjadyéke?’

²⁴Nae kuvatuma vanu vapagwíte apo kushidoni, ‘Tendi ako, mpoke njuluku wavenavo wo mumupe áanjadidye dimindi kumi jo.’

²⁵Kanji vanavo kushidoni, ‘Aba! Nang'olo, nae ankuvanavo dyela dyanjadyéke dimindi kumi.’

²⁶Nae kushidoni, ‘Ninkumwaulila doni, munu ávenavo vanamwanjadyedya kanji ákavenavo ata sho shavénavo padyoko sho, vanampoka.

²⁷Napanelo vamongo vangu vákashilota nangu nguve ni umu wave vo, vaidenavo apa muvatanalange nangu nivona.’ ”

²⁸Yesu akatangole malove ala nae andyúkanavo mushu mwanda aamboka alodya ku Yelusalemu.

²⁹Pavandike pa Betepashi na pa Betaniya, palishinga lyavashema Lyamilandi Vyaulivela, andívatuma vakwoda vake vavili

³⁰kushidoni, “Wena kulikaja livéle mushu! Pamwinjila nkaja mo, munankodya mwana wapunda akanava kunkwela munu vàmuungangidile; mwenu muungule mumwidenavo!

³¹Munu woewoe akamudya shamumuungulila, mwenu mwaulile doni, ‘Nang'olo ankunnota.’ ”

³²Vakwoda vakauke, vandíkodya mo mwatangaladile Yesu.

³³Napanelo pavashimuungula mwana wapunda aijá vene kuvaudya, “Da nnyama jo mumuungulila eshi?”

³⁴Vanavo kushidoni, “Nang'olo ankunnota.”

³⁵Bai vanavo vaníntwala kumuukanavo kumwe Yesu. Pavawikinavo, vaníntandikanga dinguvo dyave pashanya kuntwala Yesu kunkwedya.

³⁶Napanelo Yesu pashuka vanu vashindatwala dinguvo dyave kutandika mwindila.

³⁷Pavavandike pa Yelusalemu, paibondi ya Lishinga Lyamilandi Vyaulivela, imbumba yavakwoda vake ishindapuwanga na ishinantumbyanga Nnungu vajunga pashanya po mwaa wamakango uti avagwene na

³⁸vashindatangola doni, “Aalaligwe Umu áida palina limwe UMU! Amani ipali kuwa, lishangelo kushanya-uti!”[30]

³⁹Napanelo mapalishayo vanji valijalaniénge mwimbumba vandímwaulila Yesu kushidoni, “Mwalimu, vatangalele vakwoda vako!”

⁴⁰Nae kushidoni, “Ninkumwaulila doni, ata ava vakamalala kanji majanga lo andanyonya.”

⁴¹Napanelo pawikile pashengo, bai pagwene likaja alilá andílilangila

⁴²aashidoni, “Ajaa shonde! Wako Yelusalemu, kwalala dashi leka nawako ùmanyite padyoko vela shinu shilóta kukupa amani nelo apa! Kanji gwo, bai, shindilipiya.

⁴³Undakuwikila wakati wavalota vamongo vako kukutang'anedya kukudangela lingongo kutwala kukushinya kula kushinu.

⁴⁴Vanavo vandakubamola pamo na vanavako vauvénavo nkaja mwako; havakulakela lijanga lìikele pashanya lijangamwagwe mwaa wako haumanyite wakati wakwidilile Nnungu.”

⁴⁵Napanelo Yesu akainjile mwing'ande ya Nnungu andívakumulanga vanu váshishumidyanga vinu nng'ande amo

⁴⁶avaulila doni, “Indyandikigwa doni, ‘Ing'ande yangu nangu ni ing'ande yakushwalidya,’[31] kanji mwenu mundipindulanga kutenda shivava shavakwiva!”[32]

⁴⁷Kula liduva nae ashindapundisha mwing'ande ya Nnungu. Napanelo vanang'olo vavakulangalalela-shadaka, vamwalimu vadishaliya pamo na vanang'olo vavenentete vashindalambela mwakummyaila

⁴⁸kanji havashipata dindila dyakummyaila mwaa venentete uti vandítitimila mukumwigwilila.