Read Ibibiliya mu Shimakonde Imbodi Yaambi na dimbande dya Imbodi Yakala Lukashi 2 Bible Online

Lukashi 2 - Ibibiliya mu Shimakonde Imbodi Yaambi na dimbande dya Imbodi Yakala bible

Lukashi 2

¹Napanelo mumaduva alo Shashali Agustu andyúmya lilamulo lyakulota vanu uti vavilambo víshilangalalegwa na Loma valyandikishe.

²Shaandika ashi shivele shitandi; shosho sho shitandeke muwakati wavele Kilinu gavana wa ku Shiliya.

³Nadoni vanu uti vandyúka ndalyandika kanji kula munu ashuka ndalyandika kwave.

⁴Napanelo Yoshe dadavo andyúma ku Galileya palikaja lya pa Nashaleti kwambokela ku Yudeya kuka kwavo Daudi ku Beteleemu mwaa Yoshe avele washipinga shaudukulu umwe Daudi.[3]

⁵Ako nae aukile kukulyandikisha; andyúka pamo namu Maliya nkongwe wantamadíle kunnomba, jo Maliya aju àvele na shitumbo.

⁶Vàvele ko ku Beteleemu, Maliya kumwikila liduva lyakushuluwa

⁷kutwala kummaleka mwana nnume wakulijedya. Nae kunkulunganga mwinguvo kunnadya mushombo shakulyela vanyama mwaa shumba shavajeni havapatíle lyutu lyakulala.

⁸Napanelo koko ko vandípagwa vakushunga-dinyama váshishunga vipinga vyave shilo kwilanga.

⁹Bai akaaneka apalá njelo wa Nnungu, lishangelo limwe UMU kuvatang'anedya vanavo ni kujopa doni.

¹⁰Kanji njelo kushidoni, “Mwenu, hamunajope! Ngwigwa, nangu ngwidinavo ntenga wambone vila au ulóta kwidanavo lipuwilo likumene kwavenentete ava uti.

¹¹Nelo apa kwavo Daudi andivalekwa mwamboli kwamwaa wenu mwenu; Klistu, UMU.

¹²Ashi shindava shimanyikilo shenu: pamuka, munankodya mwana vànkulungenge mwinguvo na vànnadidye mushombo shakulyela vanyama.”

¹³Kwashingangala kwanakenneu imbumba yavakuwa ìlyunganienge namu njelo jo vantumbyanga Nnungu kushidoni,

¹⁴“Lishangelo livelé namu Nnungu kushanya-uti; amani namu vanu mushilambo, vanu vovo vavatanene mwene Nnungu.”

¹⁵Vanjelo avalá vakanyamange kuka kuwa, vakushunga-dinyama vandyáulanila kushidoni, “Takatukanga tuke ku Beteleemu tukalole vitandéke vyatwaulidile UMU avi.”

¹⁶Vanavo shipajelo kuka kunkodya Maliya namu Yoshe, mwana àlele mushombo shakulyela vanyama.

¹⁷Vakamwone, vandyáulanga dyabali dyamwana ajo dyavapatíle.

¹⁸Vanu uti váshigwa vyavashivalanganga vakushunga-dinyama, vashindashanga

¹⁹kanji Maliya vinu avyo ashindavika muntima na ashindakumbukila.

²⁰Bai avalá vakushunga-dinyama vandyúja vamupa lishangelo na vanshiba Nnungu mwaa wavinu uti vyavaigwite na vyavagwene kwodana na mo mwavaigwididye.

²¹Paliwikile liduva lyanane, liduva lyakunkumula mwana vanavo vandímupa lina lya Yesu, lina lyampéle njelo wa Nnungu anyoke akanava kunnyakulila.

²²Napanelo Maliya namu Yoshe, ukavawikile wakati wakulyushanianga ushapu kwodana na Lilamulo lyake Musha,[4] vanavo vandímuukanavo mwana ku Yelusalemu nankamudya UMU.

²³Vanavo vanínkamudya UMU kwodana na Lilamulo lyake UMU liishidoni, “Kula mwana nnume ntandi kuvalekwa, mwapulile UMU.”

²⁴Namomo vandyúka ndatenda shadaka shilamulilígwa mu Lilamulo lyake UMU liishidoni, “makanda mavili amadeya nnume na nkongwe kwali makanda mavili avang'unda nnume na nkongwe.”

²⁵Napanelo ku Yelusalemu ko, andípagwa nang'olo jumo wavashinshema Shimiyau; nang'olo aju avele munu waishaliya na wakunjopa Nnungu. Nae ashindalindila kupambadyangigwa kwavanaishilaeli[5] na Imumu Wanashwe andípagwa namu nae.

²⁶Jo Imumu Wanashwe andímwaulila Shimiyau doni, hapela akanava kumwona Klistu wake UMU kuntumidya.

²⁷Napanelo muliduva limo, Shimiyau alangalalegwa na Imumu Wanashwe andyúka kwing'ande ya Nnungu kutwala vatatamunu pavamwidinavo nunu Yesu vantende shivaikidíle vantende kwodana na Lilamulo,

²⁸Shimiyau anínnyukata nunu mmakono kuntumbyanga Nnungu aashidoni,

²⁹“UMU, uninneka ntumika wako aukilé mu amani kenga mwautangaladile.

³⁰Mwaa nangu ndyona kwambola kwako

³¹kwaupanganienge pamevo pavanu uti;

³²lilangadyo lilóta kuvalangadya vamidi[6] na lyakuvapa lishangelo venentete vako vanaishilaeli.”

³³Tatamunu namu jujumunu kutwala kushanga mwaa wamalove áshitangaleka amwamba mwana.

³⁴Bai Shimiyau andívaalaliya na kumwaulila jujumunu Maliya kushidoni, “Mwana aju alota kuva shambyombyo shakuvatadya vanaishilaeli vanji vagwe, vanji vatakatuke; alota kuva shimanyikilo shilóta kunyatilika na vanu.

³⁵Kwaupande wako wako lyambila lindakupulinganianga muungumi. Andatadya makumbukililo avo alipiídye alilodye ngala.”

³⁶Napanelo andípagwa nkúlava jumo nkongwe walina Ana mwanagwe Panuweli walikola lyavanaasheli. Nkongwe aju andíkangapala. Mushali shake andílombwa vyaka saba kutwala ntwagwe kupela

³⁷kunneka nae mushinamwili. Jojo jo avele liputa wavyaka samanini na nsheshe vyashingumi na hashuma mwing'ande ya Nnungu antumikila shilo na mui nkati mukunga na kushwali.

³⁸Napanelo nkongwe aju muwakati wowo, nae kulyumilidya kutwala kunnambwalela Nnungu na kutunduvanga kuvalanganga ing'ano yamwana ajo kwavanu uti váshilindila kwambolegwa kwa Yelusalemu.

³⁹Maliya namu Yoshe pavamalidile kutandedya uti kwodananavo Lilamulo lyake UMU, vandyújila ku Galileya kuka mpaka kwavo ku Nashaleti.

⁴⁰Bai mwana jo ashindakulumuka, ashindang'amukanga avanavo limanyilo lyoe na litananilo lyake Nnungu lishandapagwa kwake nae.

⁴¹Bai tatamunu na jujumunu kula mwaka vashindauka kushikukulu sha Pasaka ku Yelusalemu.

⁴²Napanelo mwana jo akawishe vyaka kumi na mbili vyashingumi, muwakati wa Pasaka kenga mwanamaduva vanavo vandyúka ku Yelusalemu.

⁴³Shikukulu shikapite, vanavo pavashuja ndyoko jo andíikala koko kanji vanavo havashimanya

⁴⁴vona kenga nae apali mumwanda muvipinga vyavanu vanji, vandíwena mwanda waliduva limo kutwala kutunduvanga kunnambela mwavalikola na mwavanedi.

⁴⁵Kwodamwaa havangwéne, vanavo vandyújila ku Yelusalemu kuka nannambela.

⁴⁶Napanelo akapite maduva matatu, vanavo vanínkodya àikele mwing'ande ya Nnungu shing'ati vamwalimu avaigwilila vyavashitangola na avaudya vyakuvaudya.

⁴⁷Vanu uti váshimwigwilila, vashindashanga ding'ano dyake na mwavashivajang'ulila.

⁴⁸Tatake na anyoke pavangwene, vandíshanga kutwala jujumunu kushidoni, “Mwanangu, mwaa shani unditutenda davo? Shapo lola, nangu pamo na tatako tundidumbadumba tukulambela.”

⁴⁹Nae kushidoni, “Mushingulambalela eshi? Hamunamanya shinu doni nangu ininguvaikila ngupagwe mwing'ande imwe Atata?”

⁵⁰Kanji vanavo havashigwa shana shashivatangalela.

⁵¹Nae andyúja shalumo namu vanavo kuka ku Nashaleti; tatamunu namu jujumunu nae ashindavaishimu. Napanelo jujumunu vinu avi uti ashindavika muntima.

⁵²Bai Yesu ashindakulumuka mulimanyilo, mulitananilo lyake Nnungu na lyavanu.