Read Ibibiliya mu Shimakonde Imbodi Yaambi na dimbande dya Imbodi Yakala Lukashi 20 Bible Online

Lukashi 20 - Ibibiliya mu Shimakonde Imbodi Yaambi na dimbande dya Imbodi Yakala bible

Lukashi 20

¹Napanelo muliduva limo Yesu àvele mwing'ande ya Nnungu avapundisha venentete na avavalangangila ntenga wambone, vandímwidila vanang'olo vavakulangalalela-shadaka, vamwalimu vadishaliya pamo na vanang'olo

²ndamudya doni, “Twaulila ako! Wako vinu avi utenda kwamadalaka shani kwali madalaka ene akupelé nyani?”

³Nae kushidoni, “Nanangu ndamudya. Ngwaulila,

⁴ubatisho umwe Nshuwau walakadilé kuwa kwali kwavanu?”

⁵Vanavo kutangola shivenevene vaashidoni, “Tukaashidoni walakadilé kuwa, nae andaashidoni, ‘Kanji mwaa shani hamunkulupidile?’

⁶Namomo tukaashidoni, ‘Walakadilé kwavanu,’ venentete uti vandatwamanga majanga mwaa vanavo vaninkulupila Nshuwau kuva nkúlava.”

⁷Bai vanavo vanínjang'ula kushidoni, “Hatumanyite kwawalakadile ubatisho awo.”

⁸Kutwala Yesu kushidoni, “Bai nanangu hanimwaulila madalaka angutandela vinu avi.”

⁹Napavedoni Yesu andívakang'ela venentete nkong'o au, “Munu jumo andílima lishamba lyake lyamilandi vyavyepo[33] kutwala kuvakodisha vakulima, mwene kuka kushilambo shinji ndaikala maduva oe namene.

¹⁰Pauwikile wakati wakupuna, mwene lishamba aníntumidya ntumika wake kwavakulima akatwale lipungu lyake lyavyepo vyamulishamba kanji vakulima munu ajo kunkanyalanga kunkumulanga makonodavo.

¹¹Nae kuntuma ntumika junji, vanavo kunkanyalanga, kuntukananga na kunkumulanga makonodavo.

¹²Kuntuma wantatu nanae ajo vanavo kummyaa kutwala kunkumulanga yadavo.

¹³Napanelo mwene lishamba, ‘Nduu! Ngutandelé mwashi? Idavo, leka nintumidye mwanangu wapantima na waninnagwaledya namene nakapanji nae pavamwona, vandamwishimu.’

¹⁴Kanji vakulima po pavangwene, vandyáulanila kushidoni, ‘Aju ni jojo wavalota kunkamudya lyala ali. Mmanemba! Idananga akuno tummalidye kwambangidya lyala ali live lyetu.’

¹⁵Bai vanavo vandíngang'alangila kunyenje lishamba kutwala kummalidya. Napanelo mwene lishamba alota kuvatandela mwashi vanu avo?

¹⁶Nae andavaukila vanu avo ndavatanalanga kutwala lishamba lyo, kuvapa vanu vanji.” Bai venentete pavaigwite malove alo kutwala kushidoni, “Shonde hainave davo.”

¹⁷Kanji Yesu andívalola ndoo! Kutwala kushidoni, “Da shavaandikidile doni ni nyamani, ‘Lijanga lyavaitile vakudenga, lyolyo lyo lindyuka ndava lijanga shii lyakudangela’?[34]

¹⁸Munu woewoe álota kugwilila palijanga alyo, andatamakanga na walilota kungwilila jo, andakandikanga.”

¹⁹Napanelo vamwalimu vadishaliya na vanang'olo vavakulangalalela-shadaka vashindalota vamwinjilinneu mwaa vandímanya shalowa kenga nkong'o awo ushivakumbyanga vanavo kanji vashindavajopa venentete.

²⁰Napavedoni vanavo vandítunduvanga kumwodaoda. Vandívatumidya vanu valitende kenga vanu shii kumbe vàvele vyaleko pakulota vampatikaniange mulilove lyakuma nkanywa mwake vakankamudye kumadalaka na utawala umwe gavana.

²¹Nadoni vanavo vandímudya kushidoni, “Mwalimu, wetu tundimanya shana kenga wako unkutangola vinu viu na unkupundisha shana; haunatangola shinu ulola ing'ope kanji unkupundisha kwaumwiu indila yalota Nnungu.

²²Napanelo twaulila! Ni shambone nkati mulilamulo lyetu kunnipa Shashali ukodi [35] kwali mene?”

²³Nae amanya avi shinankulaba shave andívajang'ula kushidoni,

²⁴“Ngulodya dinali imo. Da muyela ai ipisha na namakong'o vimwe nyani?” Vanavo kushidoni, “Vimwe Shashali.”

²⁵Yesu kutwala kushidoni, “Bai vimwe Shashali, mwing'e mwene Shashali na vimwe Nnungu, mwing'e mwene Nnungu.”

²⁶Napavedoni vanavo havapatíle lilove lyakunkanidyanga pamevo avenentete, vandíshanga majang'ulidi ake na vandímalalanga.

²⁷Kutwala shipinga shamashadukayo vanu vánaashidoni hakupali kudyuka kwavakupela kwida ndamudya Yesu

²⁸kushidoni, “Mwalimu, Musha anditulakela lilamulo lyandike doni, nkulumunu akapela anneka ndyagwe ákave mwana, nung'unumunu ainjile ding'ande pakulota ammalakele vana wakujala.[36]

²⁹Napanelo vandípagwa vanung'unumunu saba vashitumbo shimo; ntandi kulomba kutwala kupela akanava kummaleka mwana.

³⁰Kwida wambili kwinjila ding'ande,

³¹kwatika wantatu mpaka kumalilika uti vanung'umunu saba avalá vainjila ding'ande kanji uti kupalanga pavakammaleka mwana na namwili ajo

³²kutwala kumwisho kwake nanae namwili jo kupela.

³³Napanelo kushi muliduva lyakudyuka vanu lyo, mwene namwili aju shana alota kuva wakwashi ikava kenga vanu saba ava uti vaninnomba?”

³⁴Yesu kushidoni, “Vanu vawakati au ni valombána

³⁵kanji avalá vavóna Nnungu kuvaikila vapate mautu muwakati wída na mukudyuka pakati pavakupela, vanavo havalombana.

³⁶Vovo vo, havapela kavili valota kuva kenga vanjelo vake Nnungu ni vanavake Nnungu, vana valóta kwalakela mukudyuka kwavakupela.

³⁷Ata jo Musha jo, mwing'ano ailá yapagwíte nae palyukutu líshikalela moto, panshamile UMU kuva Nnungu umwe Abulaamu, Nnungu umwe Ishaki na Nnungu umwe Yakobo, andilodya doni vakupela vankudyuka.

³⁸Mwenu, Nnungu aju hanava shinu Nnungu wavakupela kanji wavangumi mwaa kwake nae vanu ava uti vangumi.”

³⁹Kutwala vamwalimu vanji vadishaliya kushidoni, “Mwalimu, undijang'ula shana.”

⁴⁰Nadoni vanavo havavenavo ntima wakumudya kavili shinu shinji.

⁴¹Napanelo Yesu andívaudya kushidoni, “Inkuululika dashi vanu kutangola doni, Klistu mwanagwe Daudi?

⁴²Da shi Daudi anditangola mulibuku lyake lya Dimu aashidoni, ‘UMU andimwaulila Nang'olo[37] wangu doni, “Ikala kunkanakono kwangu

⁴³mpaka nangu ndivavike vamongo vako vave likukwa lyakuvika madodo ako.” ’[38]

⁴⁴Napanelo ikava kenga Daudi nae po anshema kuva Nang'olo wake, ilota kuva dashi kavili kuva mwanagwe?”

⁴⁵Akuno venentete vamwigwilila, Yesu andívaulila vakwoda vake kushidoni,

⁴⁶“Lilaledye namene na vamwalimu vadishaliya ivanagwéla kupita vawena vàgwete mikwakwala, ivanagwéla vavaudyange na ishima ing'umene namene muumbala, ivanagwéla kwikala muviteng'u vitandi muvitala vyakulipudidya, ivanagwéla kwikala mumautu shii mmikukulu

⁴⁷na vapita vavalyangila vanamwili vyavo valishang'apila kuva vanu shii vatenda delee, pakushwali. Vovo vo, vandapata ukumu yakujowa kupunda apo.”