Read Ibibiliya mu Shimakonde Imbodi Yaambi na dimbande dya Imbodi Yakala Lukashi 21 Bible Online

Lukashi 21 - Ibibiliya mu Shimakonde Imbodi Yaambi na dimbande dya Imbodi Yakala bible

Lukashi 21

¹Napanelo Yesu andílalyanga kutwala kuvona vatajili vajela njuluku mulishanduku lyashadaka,

²namomo kumwona namwili ákave pashinu nanae ajela njuluku wake padyoko namene mulishanduku lyolyo.

³Yesu kutwala kushidoni, “Mwiu, nkongwe aju ni ájadile poe kuvapunda vanu avalá uti

⁴mwaa vanu vanji uti vajadilé vatwala padyumbele kanji nkongwe aju muungave-pashinu wake aumididyé uti vyavénavo.”

⁵Napanelo vanji valambwalela ing'ande ya Nnungu mwavadangadile na majanga akumanyikanga na mwavanamadidye na vinu vyashadaka vyavashimuumidya Nnungu, Yesu andívaulila doni,

⁶“Uti vyamwona avi, lindawika liduva lyakubamalegwa pavakaleka lijanga lìikele pashanya lijangamwagwe.”

⁷Vanavo kumudya, “Mwalimu! Da vinu vyene vyo vilota kutandeka duvani na pavilota kutandeka po, shilota kulilodya shimanyikilo shani?”

⁸Yesu kushidoni, “Lilaledye! Hanapagwe wakunduwanga mwaa vandaida vanu voe vatumila lina lyangu vaashidoni, ‘Nangu ni Masiya’ na kushidoni, ‘Wakati undiwika’ kanji hamunavode.

⁹Mukona ding'ondo na vijungulima, mwenu hamunaitukange mwaa vinu avi shitandi vindivaikila vitandeke kanji hauva shinu wakati wamwisho.”

¹⁰Kutwala kavili kushidoni, “Venentete vandatandana ing'ondo shivenevene na utawala umo undatandana ing'ondo na utawala unji.

¹¹Mumautu akuvilingananga mundaumilila vindangenda vyakujowa, shivanga, vilwele, vinu vyakwituwanga na kuwa kundalilodya vimanyikilo vikumene namene.

¹²“Kanji vinu avyo uti vikanava kutandeka, kwamwaa walina lyangu mwenu vanankamula kumuuvyauvyanga, vamuukanavo kuvitala vyakulipudidya, vanjela mudikalaboshi na vamuukanavo kwavaumu na kwavananangalaledi vashilikali.

¹³Napanelo lyolyo lyo, lindava litala lyakulota mwenu kunguumidya nangu ushuda.

¹⁴Napavedoni mmitima mwenu amuwa kaladavo kuleka kulipundisha mwakulishililididya.

¹⁵Nangu apa nantadya mutangole malove alimanyilo; malove alo, vamongo venu havapinga ata kutaukanga hakupagwa.

¹⁶Napanelo mwenu ata vatatavenu, vakuluvenu na vanung'unuvenu, vakwenu, vabwadivenu vanannimya na pakati penu vanji vandabyaigwa.

¹⁷Vanu uti vanammangedya mwaa wangu nangu

¹⁸kanji mmyuti mwenu mo, haukulika ugwimbu ata ukava umo.

¹⁹Ni mwaa wakulipililila kwenu kwamulota kupata ungumi wenu.

²⁰“Napanelo mukavona vaing'ondo vàtang'anadidye Yelusalemu, manyinneu doni wakati wakubamalegwa likaja alyo undiwika.

²¹Napavedoni vanu valóta kupagwa ku Yudeya vatilile kumashinga, vapanjini vaume na valóta kupagwa kumala, havanaujile kukaja.

²²Mumaduva alo shindaumilila shaushanga vitandeka vinu uti vyandikíke.

²³Shonde vakongwe vílota kuvakodya vinu avyo vàimitenge na vílota kuvakodya vajang'edya mwaa mushilambo ashi andaida mauvilo makumene; Nnungu andavang'unulangila mevo venentete ava.

²⁴Vanu voe vandavabyaa maambila, vanji kuvakamula mikole kuvaukanavo muvilambo uti vyavamidi na Yelusalemu vamidi vandatimbanga mpaka wakati wave uvamalilikile.

²⁵“Liduva, mwedi na dinondo vinu avi vyakuwa vindavanavo vimanyikilo; mushilambo venentete vandalijugulanga kwamwaa washilindimu shamawimbi shilóta kulindimuka mwimanga.

²⁶Vanu vandadilikanga matuva vakumbukila vinu vilóta kutandeka mushilambo mwaa vyadimongo vyakuniania vindating'inigwa.

²⁷Apo vandamwona Mwana Wamunu aaloka mulyundi na dimongo pamo na lishangelo lyoe.[39]

²⁸Pavilota kutandeka vinu avyo, mwenu takatukanga mwimilange munyanyulile vilaka kuwa mwaa kwambolegwa kundivandika.”

²⁹Napanelo Yesu andívakang'ela nkong'o au, “Lola nkungu na milandi vinji uti.

³⁰Pamunona viipukila, mwemwe mmene mundamanyinneu doni shipondo shiwikile.

³¹Nadoni pamwona vinu avi vitandeka, momo manyinneu doni utawala wa Nnungu undivandika.

³²Ninkumwaulila mwiu doni, vanu vaimbula ai havamalilika vinu avi vikanava kuumilila.

³³Shilambo shakuwa na shapai, vindapita kanji malove angu mwiko hapita.

³⁴“Lishunge! Hamunaleke mitima vyenu viidapelwa kwambalwa na ulevi na mangaikangilo ashinamidyo ashi kutwala liduva alyo kunkodya shingangala kenga ntego

³⁵mwaa liduva alyo, vanu uti ndyoko na nkulu mushilambo uti, lindavawikila.

³⁶Ngwengwe muve mevo mujugwa mupate dimongo kwambangidya vilóta kutandeka vyo vinkowe na mwimile bila kujagajega pamevo pake Mwana Wamunu.”

³⁷Yesu kula liduva, mui ashindapagwa mwing'ande ya Nnungu apundisha, shilo kuka ndaikala kulishinga lyavashema Lyamilandi Vyaulivela.

³⁸Lyamba linyeiku, vanu uti vashindauka kwing'ande ya Nnungu ndamwigwilila.