Read Ibibiliya mu Shimakonde Imbodi Yaambi na dimbande dya Imbodi Yakala Lukashi 22 Bible Online

Lukashi 22 - Ibibiliya mu Shimakonde Imbodi Yaambi na dimbande dya Imbodi Yakala bible

Lukashi 22

¹Napanelo shikukulu shamagung'u ákave nkukumuku shavashishema Pasaka,[40] shishindavandikanga.

²Nadoni vanang'olo vavakulangalalela-shadaka pamo na vamwalimu vadishaliya vashindalambela dindila dyakummalididya Yesu mwaa vashindavajopa venentete.

³Napanelo Shatwani andímwinjila Yudashi wavashinshema Shikaliyote munu wamushipinga shavakwoda vake Yesu kumi na mbili avalá.

⁴Kutwala Yudashi kuka ndalya shemba na vanang'olo vavakulangalalela-shadaka pamo na vanang'olo vavakushunga-ing'ande ya Nnungu avalodya mwakunnimidya nae Yesu kwavanavo.

⁵Kutwala vanavo kupuwanga na kulivika kunnipa njuluku.

⁶Bai Yudashi andívaungila nkono na andílambela dindila dyakuvakamudidya Yesu shipiipii.

⁷Napanelo liduva lyashikukulu shamagung'u ákave nkukumuku livaikidíle vayuda kunshinda ngandolo wapasaka lindíwika.

⁸Likawike, Yesu aníntuma Patulu namu Nshuwau aashidoni, “Wena mukapanganiange shikukulu sha Pasaka tulye.”

⁹Vanavo kumudya, “Ulota tuke tukapanganiange kwashi?”

¹⁰Yesu kushidoni, “Lola, pamwinjila nkaja mundashingananavo munu jumo ànyukete shilongo shamedi; mwenu mwode mpaka paing'ande yalota kwinjila

¹¹mutwale mumwaulile mwene ing'ande ayo doni, ‘Mwalimu andákudya, Shumba shani shalota kulyela shikukulu sha Pasaka na vakwoda vake?’

¹²Nae anannangudya lyutu lyakulyandaula shana livenavo vinu uti; mwenu panganianga popo.”

¹³Vanavo pavaukile vandyánela mo mwavaulilidile Yesu; bai vanavo vandípanganianga Pasaka ayo.

¹⁴Wakati pauwikile, Yesu andíikala pandamu pamo na vamyombe vake

¹⁵kutwala kuvaulila doni, “Iningunagwela namene kulya shikukulu sha Pasaka ashi namu mwenu nikanava kuuvauvanga.

¹⁶Ninkumwaulila doni, hangulya kavili shikukulu sha Pasaka shinji namu mwenu mpaka pashilota kutandeka shiilanianga mana ake uti muutawala wa Nnungu.”

¹⁷Muwakati wowo Yesu andítwala shikombe kunnambwalela Nnungu kutwala kushidoni, “Twala mulakalanile.

¹⁸Ninkumwaulila doni, hangukumbila kavili ugwalwa wavinyu mpaka pawida utawala wa Nnungu.”

¹⁹Namomo andítwala ligung'u kunnambwalela Nnungu, kumajanianga kuvapa vakwoda vake aashidoni, “Au ni mili wangu ujaulíka mwaa wenu mwenu. Tenda shinu ashi mungukumbukila nangu.”

²⁰Pavamalidile kulya, andítwala shikombe kutandela momo aashidoni, “Shikombe ashi ni imbodi yaambi yamyadi vyangu vijaíka mwaa wenu mwenu.

²¹“Kanji mwe! Namalimya álota kungulimya nangu, apali namu nangu po pandamu apa.

²²Kutangola mwiu, Mwana Wamunu ankuukila mo mwampangilidile Nnungu kanji shonde munu álota kunnimya jo!”

²³Bai vanavo vandyúdyania, “Apali apa wakutenda shitendo asho?”

²⁴Napanelo pakati pavakwoda undyúmilila ntau valota vammanye nyani áshivaikila kuva nang'olo pakati pave.

²⁵Yesu kutwala kushidoni, “Vaumu vashilambo ashi vankulitumbudya kwavenentete vave na avalá vakamulidíle madalaka vankulivika kuva vanu vakutandedya wambone kwavenentete.

²⁶Kanji mwenu hamunave davo; nang'olo pakati penu alitende kuva kenga ndyoko uti na nanangalaledi ave kenga ntumika.

²⁷Mwenu! Da nang'olo shana ava aijá ánaikala pandamu kwali aijá ánavatumikila vaikalénge pandamu? Da hanava aijá ánaikala pandamu? Kanji napanelo nangu pakati penu nguvelé kenga aijá ánavaangaikangila vanu pandamu.

²⁸“Mwenu ni múnapagwa ngwengwe namu nangu mumauvilo angu.

²⁹Napavedoni ninkunkamudya utawala kenga mo mwangukamudididye nangu Atata

³⁰pakulota mulye na mukumbile pandamu wangu muutawala wangu na mwikale muviteng'u muukumu makola kumi na mbili amwe Ishilaeli.”

³¹Yesu kavili kushidoni, “Simoni, Simoni, ngwigwa. Shatwani andijugwa ampate mwenu pakulota ampete kenga ngano.

³²Kanji nangu ndikujugwila kwambangidya likulupililo lyako halinajaike. Napanelo wako paunguujila po, vanonowange vanung'unumunu.”

³³Patulu kushidoni, “Nang'olo, nangu nguvelé tayali kwinjila namu wako nkalaboshi na kupela namu wako.”

³⁴UMU kutwala kushidoni, “Patulu, ninkukwaulila doni, nelo ng'uku ntandi akanava kukangavela wako unangukana myanda mitatu.”

³⁵Kutangola kavili kushidoni, “Panintumile pamukanyukata njuluku, lipeta kwali vilatu, dashi shindípagwa shimwovíte?” Vanavo do, “Hashipagwite.”

³⁶Yesu kushidoni, “Napanelo aijá ávenavo njuluku na ávenavo lipeta anyukate. Ákave na lyambila, ashulushe likoti lyake ashume lyambila.

³⁷Ninkumwaulila doni, ambi apa vilota kutandeka avilá vyandikíke doni, ‘Vanimpambanianga mushipinga shavaungave-lilamulo.’ Mwaa uti vyavaandike vingwamba nangu, mwiu vindatandeka.”

³⁸Vanavo, “Nang'olo, lola! Apa tunkuvanavo maambila mavili.” Nae kushidoni, “Ing'ano ai tuleke.”

³⁹Napanelo Yesu andyúma kuka kenga lidyavalelo lyake ku Lishinga Lyamilandi Vyaulivela, vakwoda vake kumwoda.

⁴⁰Pawikile palyutu, andívaulila vakwoda vake kushidoni, “Shwali kwambangidya hamunainjile mukutubigwa.”

⁴¹Nae kuvaleka kuka shitamba shamadodo salasini doni ndaguguvala kushwali

⁴²aashidoni, “Atata! Ukalota nyemya pamili pangu luwene alu[41] ila hainave mwangulatela nangu, ive mwaulatela wako umwene.” [

⁴³[42]Popo po, andyúmilila njelo wakwalakela kuwa kwida nannonowanga.

⁴⁴Yesu nkati mukuvauvanga kwake, andíshwali na dimongo namene na lyuduku lyashuma ligwilangila pai kuva kenga matweni makumene amyadi.]

⁴⁵Patakatwike pashishwali akauke kwavakwoda vake, andívakodya vàlalenge mwaa wamatuva

⁴⁶kutwala nae kuvaudya, “Mwaa shani mundilalanga? Takatukanga mushwali pakulota hamunainjile mukutubigwa.”

⁴⁷Napanelo Yesu akuno atangola kuwika imbumba yavanu wakulangalela kuva Yudashi munu wamushipinga sha avalá kumi na mbili; nae andyúka mpaka pavéle Yesu nankumbatila.

⁴⁸Yesu kanji kushidoni, “Yudashi, unnimya Mwana Wamunu kwaindila yakumwambatila?”

⁴⁹Napanelo avalá vavéle namu Yesu vakamanye víshilota kutandeka avilá vandímudya, “Nang'olo, tuvabyae maambila?”

⁵⁰Munu jumo pakati pave kumwangenneu lyatu lyankanakono ntumika wake nkúlangalalela-shadaka nkumene.

⁵¹Yesu napane kushidoni, “Bai, leka.” Nae kukamula lyatu alilá kumponia.

⁵²Kutwala apo, andívaudya vanang'olo vavakulangalalela-shadaka, vanang'olo vavakushunga-ing'ande ya Nnungu pamo na vanang'olo vamuukidíle nankamula avalá kushidoni, “Kenga nkalau shamwida na maambila pamo na dilungu?

⁵³Nangu panishipagwa ngwengwe namu mwenu mwing'ande ya Nnungu, mwenu hamunguungile. Kanji au ni wakati wenu, wakati wamadalaka akushii.”

⁵⁴Bai vanavo vanínkamula kumuukanavo kwing'ande yankúlangalalela-shadaka nkumene; Patulu andyúka amwoda mwakushu.

⁵⁵Vanavo vandíkong'a moto wave shing'ati lugwani vene kwikalanga nanae Patulu kuka ndaikala popo.

⁵⁶Napanelo ntumika jumo mwali anínnola Patulu ndoo kutwala kushidoni, “Munu aju momo andípagwa namu Yesu.”

⁵⁷Patulu doni, “Gwee! Nangu munu ajo hanimmanyite.”

⁵⁸Kutima padyoko munu junji pakati pave kunnola Patulu nanae kushidoni, “Nawako momo uvelé mpinga wowo.” Patulu do, “Wako! Nangu nkati mo, hangupali.”

⁵⁹Ikapite isaa kenga imo doni munu junji anímmalanganga kavili aashidoni, “Mwiu, munu aju momo andípagwa mpinga wowo mwaa nanae aju, ngalileya.”

⁶⁰Nae do, “Jii! Nangu shautangola wako sho, hangumanyite.” Bai Patulu akuno atangola, ng'uku kukangavalenneu

⁶¹kutwala UMU kushiliuka kunnola Patulu, Patulu kukumbukilinneu malove ake UMU amwaulidíle kushidoni, “Nelo ng'uku ntandi akanava kukangavela wako unangukana myanda mitatu.”

⁶²Bai Patulu andyúmila panda ndatumbula ing'uto.

⁶³Napanelo vanu váshinnaledya Yesu vaníntukana, vanínkanyola

⁶⁴namomo vandímunga lilesho kumevo vamudya, “Valanga, akukanywelé nyani?”

⁶⁵Vovo vo vashinantangalela malove anji oe akumwabolanga.

⁶⁶Napanelo wiku paushwenge, nkodyanio wavanang'olo vavenentete kutunduvangila vanang'olo vavakulangalalela-shadaka pamo na vamwalimu vadishaliya vandíikala nguguvale kuntwala Yesu kumwimidya paikamati yave.

⁶⁷Vanavo kumudya, “Wako ukava Klistu, twaulila!” Kanji nae kushidoni, “Ndikamwaulila ata hamukulupila

⁶⁸na ndikamudya hamungujang'ula ata padyoko.

⁶⁹Kanji kutunduvangila ambi apa Mwana Wamunu andaikala kunkanakono kwake Nnungu Wadimongo-uti.”

⁷⁰Vanavo uti kumudya, “Da napanelo wako po umwanagwe Nnungu?” Nae kushidoni, “Mwenu ni múnguvalanganga.”

⁷¹Vanavo do, “Shapo tulambela ushuda shani kavili? Da i tundimwigwa tuvene vyatangwele?”