Read Ibibiliya mu Shimakonde Imbodi Yaambi na dimbande dya Imbodi Yakala Lukashi 23 Bible Online

Lukashi 23 - Ibibiliya mu Shimakonde Imbodi Yaambi na dimbande dya Imbodi Yakala bible

Lukashi 23

¹Bai vanang'olo uti vaikamati avalá vandítakatukanga kuntwala Yesu kumuukanavo kumwe Pilatu.

²Vanavo vandítunduvanga kuntambudyanga vinu vaashidoni, “Munu aju tuninkadyedya avatindinganianga venentete vetu aleya kunnipa Shashali ukodi wakunnodya nae kuva umu wetu na kavili jojo kulivika jo mwene kuva Klistu yani umu.”

³Pilatu kumudya, “Wako ni umu wavayuda?” Yesu kushidoni, “Wako ni úvalanganga.”

⁴Napanelo Pilatu andívaulila vanang'olo vavakulangalalela-shadaka na venentete uti kushidoni, “Nangu munu aju namwona shinu likosha.”

⁵Kanji vanavo vashindang'ang'anikila vaashidoni, “Aju ankupita avatubya venentete na mapundisho ake ku Yudeya akuno uti kutunduvanga ku Galileya mpaka nkaja amu.”

⁶Napanelo Pilatu paigwite vatambulanga ku Galileya, nae andyúdya, “Da munu aju ngalileya?”

⁷Bai Pilatu pamanyite doni Yesu avele munu ávele mwina madalaka amwe Elode, nae andílamulila vamuukenavo kumwe Elode mwaa mumaduva lolo nae andípagwa po pa Yelusalemu.

⁸Napanelo Elode pangwene Yesu andípuwanga namene mwaa andíikala maduva oe ava na mweshe wakumwona pakuva ashindaigwa vantambulanga. Nae ashindavanavo lilindilililo lyakumwona atenda shimanyikilo shoeshoe.

⁹Nadoni Elode andímuudyangidya vinu vyoe namene kanji nae hashijang'ula.

¹⁰Vanang'olo vavakulangalalela-shadaka pamo na vamwalimu vadishaliya pashinu apo, vashinantambudyanga na dimongo vinu vyoe.

¹¹Bai Elode pamo na vaing'ondo vake vaníntanila na vandímwiludyanga, kungwadya ikanju yashiumu kutwala kumuujidya kumwe Pilatu.

¹²Napanelo Elode namu Pilatu vanu vákashiigwania muwakati wapanyuma, muliduva alyo vandípangana imbodi.

¹³Kutwala apo Pilatu andívashema vanang'olo vavakulangalalela-shadaka, vakutawala pamo na venentete kuvaulila doni,

¹⁴“Mwenu muningupalakadyedya munu aju na munimmalanganga kenga ankuvatindinganianga venentete. Kanji lola, nangu paninnalyenge nae pamevo penu, haningwene likosha lyoelyoe pakati pavinu uti vyamumwaulenge

¹⁵na ata Elode momo mwaa nae andimuujidya kwetu wetu. Mwenu! Munu aju hashipali shatandile shakulota apalele.

¹⁶Nangu ndalamulila vanshape viboko ngutwale ninneke.” [

¹⁷[43]Jo Pilatu aju ashindalamuliligwa avaungulile venentete nkúngwa jumo pashikukulu sha pasaka.]

¹⁸Kanji imbumba yavanu inditangola kwaunapamo ijunga iishidoni, “Munu ajo atuntamwa, tuungulila Balabashi,”

¹⁹eti munu wavanjadíle nkalaboshi mwaa wakuvalangalalela venentete kupinga shilikali na kumyaa munu!

²⁰Napanelo Pilatu andítangonavo kavili alota amuungule Yesu.

²¹Kanji vanavo vandíjunga vaashidoni, “Nkamele panshalaba! Nkamele panshalaba!”

²²Pilatu kutangola kavili mwanda wantatu kushidoni, “Da munu aju atandilé shakunyata shani? Nangu namwona likosha lyakupalela nae; ndalamulila vanshape viboko ngutwale ninneke.”

²³Kanji vanavo vashindang'ang'anikila vajunga pashanya po valota Yesu vankamele panshalaba. Bai kujunga koko ko kundítema.

²⁴Nadoni Pilatu andyámuwa kutandela momo mwavashilatela vanavo.

²⁵Andímuungula munu wavanjadíle nkalaboshi mwaa wakupinga shilikali na kubyaa kuntwala Yesu kunneka nkati mumalotelo ave.

²⁶Napanelo pavashimuukanavo, vanínkamula munu jumo walina Simoni wa ku Shilene aaloka kuludeya, vanavo kuntika nshalaba apite amwoda Yesu.

²⁷Ishindamwoda imbumba yavenentete, nkati mwake vandípagwa vakongwe váshipita vatangadikanga vannilila.

²⁸Kanji Yesu andívashiliukila kutwala kuvaulila doni, “Mmakongwe mmayelusalemu! Hamunangulilile nangu! Lililile mmene na valilile vanavenu.

²⁹Mwaa mwe! Undawika wakati wavalota kutangola doni, ‘Vandijaligwa vakongwe vákaimite, vákavaleke na vákajang'adidye.’

³⁰Muwakati awo vanu vandatangalela mashinga doni, ‘Tameka mutunyanyakedye na mutubulikidye!’

³¹Shapo vanu pavatenda doni nnandi umbii, kushi kwamwenu milandi vyakujuma ilota kuva dashi?”

³²Namomo vandívatwala vanu vavili vanji vavele vakalau kuvaukanavo ndavapedya pamo namu Yesu.

³³Pavawikile palyutu lyavashema Pashivanga, Yesu vanínkamela panshalaba pamo na vakalau vavili avalá; jumo kunkanakono junji kunshanda.

³⁴Kanji Yesu kushidoni, “Atata, valivalive mwaa havanamanya shinu shavatenda.” Bai vanavo vandíjalanga gudugudu kwambangidya vajavanange dinguvo dyake.

³⁵Venentete vandíimilanga pepi valola na vakutawala vashinantanila vaashidoni, “Andivaposha vanji ambi apa aliposhe mwene ikava kenga nae ni Klistu wake Nnungu na Wakutandalegwa.”

³⁶Namomo vaing'ondo vashinammandika vantanila vatwala ugwalwa vamupa

³⁷vaashidoni, “Wako ukava mwiu umu wavayuda, liposhe gwegwe umwene.”

³⁸Na yadavo pamuti pake vandíkamela shibau shavaandike doni, “AJU NI UMU WAVAYUDA.”

³⁹Napanelo nkalau jumo wavankamadíle palyutu lyolyo ashindamwabalanga Yesu aashidoni, “Da wako i Klistu? Bai liposhe gwegwe umwene na utuposhe nawetu!”

⁴⁰Kanji nkalau junji anínshulanga muje aashidoni, “Da wako mpaka ambi haunanjopa shinu Nnungu ata padyoko muwakati nawako unkupata ukumu yoyo?

⁴¹Wetu apa tunkupata mauvilo ala kwashaliya mwaa tunkuukumigwa kwodana na vitendo vyetu. Kanji aju apa hashipali shakunyata shatandile.”

⁴²Kutwala kumwaulila Yesu doni, “Yesu, ngukumbukila paulota kwida na utawala wako.”[44]

⁴³Yesu kushidoni, “Ngwigwa, wako jo nelo aju mwiu undapagwa namu nangu kulyutu lyalipuwilo.”

⁴⁴Wakati awo uvele wakati wasasita kutwala mushilambo uti kwida shii mpaka muwakati wasatisa,

⁴⁵liduva lìdimbile. Mwing'ande ya Nnungu inguvo íshidivilikidya lyutu Lyanashwe-uti, indípapuka shing'ati kuma kushanya mpaka mwina.

⁴⁶Bai Yesu andíkuta pashanya po aashidoni, “Atata, mmakono mwako ninkukamudya imumu yangu.”[45] Patangwele davo, nae kujaa shingumi.

⁴⁷Napanelo nang'olo wavaing'ondo pagwene vinu vitandéke avilá, andímupa lishangelo Nnungu aashidoni, “Munu aju mwiu avele waishaliya.”[46]

⁴⁸Kutwala imbumba yavanu vakodyaniénge palyutu alyo pakulota valole shitendo asho, pavagwene avilá vitandéke, vandyújila kumakaja valikanyalanga pashuva.

⁴⁹Vavagwe Yesu pamo na vakongwe váshimwoda kutunduvangila ku Galileya, vandíimilanga kushu valola víshitandeka.

⁵⁰Napanelo munu jumo walina Yoshe wamushipinga shaikamati, munu wambone doni na waishaliya,

⁵¹haungidile nkono vitendo vyavavagwe. Nae avele wa pa Alimateya likaja lya ku Yudeya na ashilindila utawala wa Nnungu.

⁵²Munu aju andímuukila Pilatu nanjugwa mili wake Yesu.

⁵³Bai Yoshe andíshuluwa mili aulá, kwavilidyanga mushanda kuka ndashika muntupa wamulijanga wavakanava kunshika munu.

⁵⁴Liduva alyo livele liduva lyakulipanganianga na wakati wakutunduvanga liduva lyakupumula ushindavandikanga.

⁵⁵Napanelo vakongwe avalá vaaléke namu Yesu ku Galileya, vandímwoda Yoshe, vandyóna shonga ashilá na mwavaladyadidye mili.

⁵⁶Bai vanavo vandyújananga kutwala kupanganianga vinu vyakunung'angila vyakutaa mumili na mauta akunung'ila. Muliduva lyakupumula vanavo vandípumula kwodana na lilamulo.