Read Ibibiliya mu Shimakonde Imbodi Yaambi na dimbande dya Imbodi Yakala Lukashi 3 Bible Online

Lukashi 3 - Ibibiliya mu Shimakonde Imbodi Yaambi na dimbande dya Imbodi Yakala bible

Lukashi 3

¹Mushaka shakumi na tano shautawala umwe Umu Nang'olo Tibeliu Shashali, ku Yudeya alangalalela Ponji Pilatu, ku Galileya alangalalela Elode nung'une wavashinshema Pilipo alangalalela ku Ituleya pamo na ku Talakoniti, ku Abileni alangalalela Lishaniya,

²vakulangalalela-shadaka vakumene vàvele Anashi namu Kaipashi, Nnungu andítangola lilove lyake namu Nshuwau mwanagwe Shakaliya kushimbweshe

³kutwala nae kupita awena muvilambo uti vivéle nanyenje Yudani alaililila ubatisho wakulijugulanga kwakulivalivigwa kwamadambi.

⁴Avyo ni vyavaandike mulibuku lyamalove ake nkúlava Ishaiya doni, “Lidi lyamunu linkwigwinika kushimbweshe liishidoni, ‘Kandyanga indila yake UMU, aalowa mwalota kupita.

⁵Makabakobo uti andaivililika, mashinga na dindunda uti vindagwalalila, dindila dyakudingukanga dindauduka, dyakwimbikanga dindakandyangigwa

⁶kutwala vanu uti kwona kwambola kwake Nnungu.’ ”

⁷Nadoni Nshuwau andyáulila imbumba yavanu imwidilíle avape ubatisho kushidoni, “Mmana mmadinyoka dyaishumu mwe! Anyinyitidilé nyani kutila shaushanga shake Nnungu shida?

⁸Lodya vyepo vilódya kulijugulanga. Hamunaashidoni, ‘Tatagwetu wetu Abulaamu.’ Mwaa nangu ninkummanyiya ngala doni, ata majanga lolo ala, Nnungu ankuulula kundyuwidya Abulaamu vana.

⁹Imbedo tayali vandilumika mulushija lwannandi. Kula nnandi úkapa vyepo vyambone vandálumula kujela pamoto.”

¹⁰Imbumba yavanu yo kutwala kumudya kushidoni, “Shapo na wetu po tutandelé mwashi?”

¹¹Nae kushidoni, “Ávenavo mikogo mivili, unji wo anjaulile aijá ákavenavo na ávenavo shakulya atandele momo.”

¹²Kuwika shipinga shavakukatisha-ukodi valota avape ubatisho, navanavo kumudya, “Mwalimu, wetu apa tutandele mwashi?”

¹³Nae kushidoni, “Ukodi wakupunda shilinga shavannamulidile mutwale, hamunantwalile munu.”

¹⁴Vaing'ondo vanji navanavo kumudya, “Kushi wetu tutandele mwashi?” Nae kushidoni, “Hamunankwinyange munu woewoe shinu shake, hamunantambudyange munu shákatandile kanji puwangila nshala wenu wamupata.”

¹⁵Bai venentete vashindaangaikanga na kula munu ashindalyudya muntima mwake ikava kenga Nshuwau ni Klistu[7]

¹⁶kutwala nae kuviigwiniya kushidoni, “Nangu ninkumwing'a mwenu ubatisho ngutumila medi kanji aijá áida kunyuma kwangu; nae avelé na dimongo kungupunda nangu wandikavaidile nangu kumuungulanga vilatu vyake. Jojo jo andamwing'a mwenu ubatisho wa Imumu Wanashwe pamo na moto.

¹⁷Ankuvanavo shombo shakupatangila vyakulya mmakono mwake pakulota akandyange palugwa pake antwale ngano akankondye mushidimbi shake kanji makadakada lo, andataa moto úkadimika.”

¹⁸Bai Nshuwau ashindavalaililila vanu ntenga wambone atumila malove ala na malailililo anji.

¹⁹Kanji kwodamwaa Nshuwau anínshashulanga Elode mwaa wakunnomba ndyagwe nung'une mwene walina Elodiya na mwaa wakunshashulanga vinu vinji vyakunyata vyashitenda,

²⁰bai Elode akatwale myaa vyakala avilá kupambanianga na mwaa au ni pantwete Nshuwau kunjela nkalaboshi.

²¹Napanelo vanu uti pavashuka ndapata ubatisho, nanae Yesu andyúka ndapata. Pashishwali kuwa kundíshimuka;

²²kukashimuke, Imumu Wanashwe wakwaneka shana wakuva mwang'unda kushuluka kuntulila mumili kutwala kuwa kwigwinika lidi lishishidoni, “Wako ni umwanangu wapantima, ninkukunnagwaledya namene; kwamwaa wako wako nangu ninkupuwanga namene.”

²³Napanelo Yesu patunduvenge shimadengo shake àvenavo vyaka salasini vyaulinga vammanya kuva mwanagwe Yoshe kenga mwavashikumbukilila, Yoshe aju kuva mwanagwe Yeli,

²⁴Yeli kuva mwanagwe Matati, Matati kuva mwanagwe Lawi, Lawi kuva mwanagwe Meliki, Meliki kuva mwanagwe Yanai, Yanai kuva mwanagwe Yoshe,

²⁵Yoshe kuva mwanagwe Matatiya, Matatiya kuva mwanagwe Amoshi, Amoshi kuva mwanagwe Naumu, Naumu kuva mwanagwe Eshili, Eshili kuva mwanagwe Nagai,

²⁶Nagai kuva mwanagwe Maati, Maati kuva mwanagwe Matatiya, Matatiya kuva mwanagwe Shemei, Shemei kuva mwanagwe Yosheki, Yosheki kuva mwanagwe Yoda,

²⁷Yoda kuva mwanagwe Yowanani, Yowanani kuva mwanagwe Lesha, Lesha kuva mwanagwe Shelubabeli, Shelubabeli kuva mwanagwe Shalatiyeli, Shalatiyeli kuva mwanagwe Neli,

²⁸Neli kuva mwanagwe Meliki, Meliki kuva mwanagwe Adi, Adi kuva mwanagwe Koshamu, Koshamu kuva mwanagwe Elimudamu, Elimudamu kuva mwanagwe Eli,

²⁹Eli kuva mwanagwe Yoshuwa, Yoshuwa kuva mwanagwe Eliyesheli, Eliyesheli kuva mwanagwe Yolimu, Yolimu kuva mwanagwe Matati, Matati kuva mwanagwe Lawi,

³⁰Lawi kuva mwanagwe Shimiyau, Shimiyau kuva mwanagwe Yuda, Yuda kuva mwanagwe Yoshe, Yoshe kuva mwanagwe Yonamu, Yonamu kuva mwanagwe Eliyakimu,

³¹Eliyakimu kuva mwanagwe Meleya, Meleya kuva mwanagwe Mena, Mena kuva mwanagwe Matata, Matata kuva mwanagwe Natani, Natani kuva mwanagwe Daudi,

³²Daudi kuva mwanagwe Yeshe, Yeshe kuva mwanagwe Obedi, Obedi kuva mwanagwe Buwashi, Buwashi kuva mwanagwe Shalamoni, Shalamoni kuva mwanagwe Naashoni,

³³Naashoni kuva mwanagwe Aminadabi, Aminadabi kuva mwanagwe Adimini, Adimini kuva mwanagwe Aluni, Aluni kuva mwanagwe Eshiloni, Eshiloni kuva mwanagwe Peleshi, Peleshi kuva mwanagwe Yuda,

³⁴Yuda kuva mwanagwe Yakobo, Yakobo kuva mwanagwe Ishaki, Ishaki kuva mwanagwe Abulaamu, Abulaamu kuva mwanagwe Tela, Tela kuva mwanagwe Nakole,

³⁵Nakole kuva mwanagwe Shelushi, Shelushi kuva mwanagwe Lagau, Lagau kuva mwanagwe Pelegi, Pelegi kuva mwanagwe Ebeli, Ebeli kuva mwanagwe Shala,

³⁶Shala kuva mwanagwe Kainani, Kainani kuva mwanagwe Alipashadi, Alipashadi kuva mwanagwe Shemu, Shemu kuva mwanagwe Noe, Noe kuva mwanagwe Lameki,

³⁷Lameki kuva mwanagwe Metushala, Metushala kuva mwanagwe Enoki, Enoki kuva mwanagwe Yaledi, Yaledi kuva mwanagwe Malaleeli, Malaleeli kuva mwanagwe Kainani,

³⁸Kainani kuva mwanagwe Enoshi, Enoshi kuva mwanagwe Sheti, Sheti kuva mwanagwe Adamu kutwala Adamu aju kuva mwanagwe Nnungu.