Read Ibibiliya mu Shimakonde Imbodi Yaambi na dimbande dya Imbodi Yakala Lukashi 4 Bible Online

Lukashi 4 - Ibibiliya mu Shimakonde Imbodi Yaambi na dimbande dya Imbodi Yakala bible

Lukashi 4

¹Bai Yesu kuja kulundi akulá àmuumbele Imumu Wanashwe. Imumu jojo jo anínnangalalela Yesu

²kushimbweshe mumaduva alubaini Ndamoni antubya. Mumaduva alo uti nae andíikala pakalya shinu; kumwisho nae kunkola indala

³kutwala Ndamoni kushidoni, “Wako ukava umwanagwe Nnungu, dyuwa lijanga ali live ligung'u.”[8]

⁴Yesu kushidoni, “Um! Indyandikigwa doni, ‘Munu hananama ligung'u gweka.’ ”[9]

⁵Ndamoni kuntwala kumuukanavo pashanya, muwakati ungwipi kunnodya viteng'u uti vitawála mushilambo shapai

⁶kutwala kumwaulila doni, “Wako nangu ndakupa madalaka aviteng'u avi uti pamo na lishangelo lyake mwaa nangu vaningukamudya, nene ninkuulula kumupa aijá waninnota.

⁷Napavedoni wako ukalipudya kwangu nangu, avi uti vindava vyako.”

⁸Yesu kushidoni, “Um! Indyandikigwa doni, ‘Lipudye kumwe UMU, jo Nnungu wako na untumikile jojo bai.’ ”[10]

⁹Ndamoni kuntwala kavili kumuukanavo ku Yelusalemu nammika panantutuvilo waing'ande ya Nnungu kutwala kumwaulila doni, “Wako ukava umwanagwe Nnungu, daloka apa

¹⁰mwaa indyandikigwa doni, ‘Nnungu andakukamudya kwavanjelo vake vakushililidye,’[11]

¹¹vanavo vandakudong'a pakulota haunalijajede palijanga.”

¹²Yesu kushidoni, “Mene wako! Vatédoni, ‘Haunanninge ntima UMU, jo Nnungu wako.’ ”

¹³Bai Ndamoni akamalile vyakutubya vyake uti, andínyema padyoko mpaka muwakati uvaikidíle.

¹⁴Napanelo Yesu andyúja na dimongo dya Imumu Wanashwe kuka ku Galileya. Bai dyabali dyake dindyúmanga uti muvilambo vyashitanono namu Galileya.

¹⁵Nae ashindavapundisha muvitala vyavo vyakulipudidya na vanavo uti vashindamupa lishangelo.

¹⁶Napanelo andíwika palikaja lyake lyakulumukidile pa Nashaleti; akawike apo, muliduva lyakupumula nae mwalidyavalelo lyake, andíinjila mushitala shakulipudidya. Akainjile, andítakatuka pakulota ashomye;

¹⁷vanavo kumupa shidingo shalyamba shamalove ake nkúlava Ishaiya. Nae kudingulanga mpaka pashinu pavaandike doni,

¹⁸“Imumu wake UMU aningushulukila mwaa aningupaka mauta pakulota ndivavalangangile vamashikini ntenga wambone, kungutuma ngwide ngwaule kuvaambola kwavakungwa, vákalola nivape kulola, vakutawaligwa nivape unaiti

¹⁹na nguvalangange doni, au ni wakati walitananilo lyake UMU.”

²⁰Akashomye, andídinga kumuujidya ntumika mwene kuliikalila. Akaikale, vanu uti vapagwíte mushitala mo, mevo ave uti kumwe Yesu do, jenje.

²¹Vakannole, nae kushidoni, “Nelo pamevo penu Maandiko ala andiwikila popo.”

²²Vanu uti vashindamwimyanga na vashinanshanga vyambone vyashitangola kutwala kushidoni, “Da aju i jo mwanagwe Yoshe aju?”

²³Nae kushidoni, “Panikaambambidya mwenu mundatangola nkong'o uushidoni, ‘Nkúlaula alilaule mwene!’ Nadoni mundatangola, ‘Vinu uti vyatwigwenge, vyautandile ku Kapalanaumu napenu apa momo tandedya!’ ”

²⁴Kutwala kavili kushidoni, “Ninkumwaulila mwiu doni, hapali nkúlava ápwashalalegwa mushilambo shake.

²⁵Kwakutangola mwiu muwakati umwe Liyashi, ko ku Ishilaeli akuno vandípagwa vanamwili voe namene; muwakati wowo muvyaka vitatu na nusu, kuwa kundishimigwa kutwala mushilambo uti kwinjila mpwapwa.

²⁶Napanelo Nnungu hantumíle Liyashi kuvaukila vanamwili ava kanji antumile pa Shalapeta bai, kushilambo sha Shidoni akulá kwankongwe namwili washilambo asho.

²⁷Namomo muwakati umwe nkúlava Elisheu, ko ku Ishilaeli akuno vandyúmbala vamalemba. Napanelo pakati pave, hapali áukile ndatakata ila Naamani tu munu wa ku Shiliya!”

²⁸Bai vanu uti mushitala amulá vakaigwe malove alo ni kushimwa doni,

²⁹kutakatukanga kunkumulanga nkaja amulá, kuntwala kumuukanavo pashanya lishinga lyavadangíle kaja yavo vakangang'aledye pai.

³⁰Kanji nae andyúma shing'ati shave kuvativaniva kuma.

³¹Napanelo Yesu andyálalela ku Kapalanaumu njini umo wa ku Galileya. Koko ko muliduva lyakupumula nae ashindavapundisha venentete

³²kutwala vanavo kushanga namene mapundisho ake mwaa lilove lyake lindívanavo madalaka.

³³Napanelo kupagwa munu jumo mushitala ávenavo imumu yalijini nshapu mumili mwake. Jo lijini jo, andíkuta namene

³⁴aashidoni, “Iya! Yesu wa ku Nashaleti, da wetu po tukukawadidyé nyamani? Widilé ndatubamola? Nangu ndikumanya shana wako jo. Wako ni Wakwilimyanga wake Nnungu.”

³⁵Yesu kunshulanga, “Malalila kushu ko gwe! Uma mumili mo!” Lijini kungwidya pai munu jo shing'ati shave kutwala kuma pakantenda shaushanga shoeshoe.

³⁶Vanu uti kushanga kutwala kwaulanila vaashidoni, “Jii, lilove ali, lilove shani? Nae ankuvanavo madalaka mwiu, ankulamulila na dimongo majini mashapu, vanavo kutwala kuma!”

³⁷Bai dyabali dyake dishindaandavala mumautu uti alilanga alyo.

³⁸Yesu kutakatuka kuma mushitala amulá kutwala kuwika paing'ande imwe Simoni; nkwegwe jo Simoni aju, ushínampwateka namene mili. Yesu akawike, vanavo kunjugwa amponie.

³⁹Yesu kutapela apalá pavele nnwele kutwala kutangalela shilwele ashilá; shilwele sho do, jii. Nnwele apalá kutakatuka kutwala kuvaatumikinneu.

⁴⁰Napanelo liduva palishwele vanu uti ve vavénavo valwele vavilwele vyakuvilingananga vashindavaidanavo kumwe Yesu. Nae ashinammikila mikono kula munu kutwala kuvaponia.

⁴¹Namomo majini ashindaumananga mumili mwavanu voe akuta aashidoni, “Wako, umwana wa Nnungu!” Nae ashindavashulanga, hashivaleka vatangola mwaa vanavo vanímmanya doni, nae avele Klistu.

⁴²Palyamba lyake, linyeiku, Yesu kuma kuka kulyutu lyakunamagweka kanji imbumba yavanu ni kunnambela mpaka kunkodya. Vakankodye, vashinammandikanga namene valota hanavanyeme

⁴³kanji nae andívaulila kushidoni, “Ininguvaikila nangu nguvalangange ntenga wambone wautawala wa Nnungu mumakaja anji momo mwaa ni shosho shavangutumidile.”

⁴⁴Bai nae andyúka mushu avalanganga ntenga muvitala vya ku Yudeya.