Read Ibibiliya mu Shimakonde Imbodi Yaambi na dimbande dya Imbodi Yakala Lukashi 5 Bible Online

Lukashi 5 - Ibibiliya mu Shimakonde Imbodi Yaambi na dimbande dya Imbodi Yakala bible

Lukashi 5

¹Muliduva limo Yesu àvele nanyenje litanda lya Geneshaleti, imbumba yavanu inshinya ilota kwigwa ntenga wa Nnungu,

²nae andyóna dingalava mbili dìvele panshiko vene vakwaka vàshulwike vashapushanga dingau.

³Yesu kwinjila mwingalava imo ye ivéle imwe Simoni kutwala kunjugwa amwangaladyedye anyeme padyoko kumwangu. Nae kwikala mwingalava mo kutwala kuvapundisha venentete.

⁴Napanelo akamalile kutangola andímwaulila Simoni kushidoni, “Wena kumedi makumene mukajele lungau lwenu mwake.”

⁵Simoni kushidoni, “Mwalimu, wetu tundikukula shashilo shoe ashi, hatupatile shinu. Kanji kwodamwaa utangwelé wako, nangu ndajela lungau mmedi.”

⁶Bai vakatandele momo mo, vandípata dyomba dyoe namene mpaka lwo lungau lwo kulota kupapuka.

⁷Vasimoni kuvapyalika vavave vavéle mwingalava inji vauke vakavapwashele. Vanavo kuka kutwala dingalava mbili adi uti kuumbadyanga dyomba mpaka dyo dingalava dyo, kulota kutitimila.

⁸Simoni Patulu akone davo andyúka ndakola maulu kumwe Yesu aashidoni, “Nang'olo wangu, ngunyema; nangu ni nimunu wakutega.”

⁹Mwaa nae andíshanga pamo na vanu uti vavénavo kwamwaa wadyomba dyoe dyavapatíle pashako asho

¹⁰namomo vanavake Shebedeu, Tiyagu namu Nshuwau vavagwe Simoni, navanavo vandíshanga. Kanji Yesu kumwaulila Simoni kushidoni, “Haunajope, kutunduvangila ambi apa wako undava umunu wakuvaka vanu.”

¹¹Bai vanavo vakaukenavo dingalava dyavo kumwangu, vandílakanga vinu vyavo uti popo po; vene tota kuka vamwoda Yesu.

¹²Napanelo Yesu àvele palikaja limo munu jumo wamalemba apalá kuumilila! Akamwone Yesu kutapela pai kutwala kushidoni, “Nang'olo wangu, ukalota unkuulula kungutadya ngutakate.”

¹³Yesu kunyalodya nkono kunkamula kushidoni, “Ndilota, takata!” Munu aijá muwakati wowo malemba kumuuminneu.

¹⁴Napanelo Yesu kunnamulila hanamwaulile munu junji kanji andímwaulila kushidoni, “Wena ukalilodye kwankúlangalalela-shadaka, utwale umye shadaka kwakuushaniangigwa kwako ushapu kenga mo mwalamulidile Musha pakulota uve ushuda kwavanavo.”

¹⁵Kanji dyabali dimwe Yesu dindímamodya kwandavala na dimbumba dyavanu voe dindíkadyanianga valota vamwigwilile na avaponie vilwele vyave.

¹⁶Yesu kanji ashindavanyema auka kushimbweshe. Koko ko, ashindashwali.

¹⁷Muliduva limo lyapagwíte Yesu apundisha, popo po vandípagwa mapalishayo pamo na vamwalimu vadishaliya ve vaalakénge mumakaja uti a ku Galileya, ku Yudeya na ku Yelusalemu. Napanelo dimongo dyake UMU dyakuponedya dindípagwa namu Yesu.

¹⁸Mwenu, muwakati wowo vanu vannyukéte munu wakudidimanga madodo apalá kuumilila. Vanavo kulambela litala lyakumwishidya pavele Yesu

¹⁹kanji vakatatakele mwaa waumbala wavanu, vandíkwela pashanya ing'ande kuvambulanga kutwala kumpaleya munu aijá pamo na igoli yake mpaka mushu mwake Yesu shing'ati vanu.

²⁰Yesu akone likulupililo lyave, andímwaulila nnwele jo kushidoni, “Wako madambi ako andilivalivika.”

²¹Napanelo vamwalimu vadishaliya pamo na mapalishayo vandyánjanga kuudyania shivenevene vaashidoni, “Aju avelé kenga nyani, átangola malove akukupulu aju? Tukanneka Nnungu, nyani junji áulula kulivaliva madambi amunu?”

²²Yesu nae akamanye makumbukililo ave, andívajang'ula kushidoni, “Mutangadikanga nyamani mmitima myenu mo?

²³Popo apa shikamadyénge namene ni nyamani? Kushidoni ‘Madambi ako andilivalivika,’ kwali kushidoni ‘Takatuka uwene’?

²⁴Bai pakulota mumanye doni, Mwana Wamunu mushilambo amu andivanavo madalaka akulivaliva madambi…” Nae andímwaulila munu wakudidimanga madodo, “Ninkukwaulila takatuka utwale igoli yako uke kwenu.”

²⁵Munu kutakatukinneu kutwala igoli yaléle kuka kwave amupa lishangelo Nnungu.

²⁶Bai vanu ni kushanga doni, vandímupa lishangelo Nnungu na kundívaida kujopa kutwala kushidoni, “Nelo tundyona vyamakango.”

²⁷Kutwala apo Yesu andyúma apalá; akaume nae andímwona munu jumo nkúkatisha-ukodi walina Lawi àikele pashitala shaukodi, Yesu kumwaulila kushidoni, “Ngwoda!”

²⁸Nae apalá andíleka vinu vyake uti popo po, mwene tota kuka amwoda Yesu.

²⁹Napanelo Lawi kwing'ande kwake, andítalakanga shakulya shoe shakumpuwangila Yesu. Po pavashilya po, shindípagwa shipinga shikumene shavakukatisha-ukodi pamo na vanji.

³⁰Napanelo mapalishayo pamo na vamwalimu vave vadishaliya vashindavatangadikanga vakwoda vake Yesu vaashidoni, “Mwaa shani munkulyanavo vakukatisha-ukodi na vakutega?”

³¹Yesu kushidoni, “Vanu vangumi havanannambela nkúlaula kanji vánannambela nkúlaula vava valwele.

³²Nangu handivaidilile vaishaliya kanji ndivaidilile vakutega pakulota valijugulange.”

³³Vanavo napane kushidoni, “Vakwoda vake Nshuwau pamo na vamapalishayo dimindi dyoe vankunga na vankushwali; napanelo mwaa shani vako wako vankulya na vankupuwanga?”

³⁴Yesu kushidoni, “Da mwenu, vanu vavalalike pashitamo mwene nkúlomba àpagwite namu vanavo, nyani álota kuvatenda vaunge?

³⁵Undawika wakati wavalota kumumya nkúlomba pakati pave; ni wakati au wavalota vanavo kunga.”

³⁶Kutwala kutangola kavili nkong'o au, “Hapali munu ánapapula inguvo yaambi kutenda shilaka mwinguvo yakala; ukatenda davo inguvo yaambi yo unaanonga na leka apo, shilaka shosho sho hashivaila mwinguvo yakala mo.

³⁷Namomo hapali munu ánataa ugwalwa wavyepo muvitumba vyamagwogwe vyakala; ukatenda davo ugwalwa waambi wo undapapula vitumba; ugwalwa kujaikanga kutwala vitumba vyo, kwanangeka.

³⁸Vatwala ugwalwa waambi kutaa muvitumba vyambi.

³⁹Napanelo namomo hapali munu ánatenda akakumbila ugwalwa wakala kulota akumbile ugwalwa waambi mwaa ona doni, ‘ugwalwa wakala ni wamana.’ ”