Read Ibibiliya mu Shimakonde Imbodi Yaambi na dimbande dya Imbodi Yakala Lukashi 6 Bible Online

Lukashi 6 - Ibibiliya mu Shimakonde Imbodi Yaambi na dimbande dya Imbodi Yakala bible

Lukashi 6

¹Muliduva limo lyakupumula, Yesu apita mulyala lyangano, vakwoda vake vandítamanga mai angano kuting'inda, kumamena.

²Kanji mapalishayo vanji kuvatangalangila vaashidoni, “Mwaa shani mwenu munkutenda shinu shilaéka na lilamulo kutenda muliduva lyakupumula?”

³Yesu kuvajang'ula kushidoni, “Da hamunava kushomya vyatandíle Umu Daudi painkadíle indala nae pamo na avalá vavénavo?[12]

⁴Mwainjilidile mwing'ande ya Nnungu kutwala magung'u ashimadengo sha Nnungu kulya; magung'u áshilaeka na lilamulo kulya munu vila ila gweka vakulangalalela-shadaka.[13] Kanji nae andílya anji kuvapa vavagwe.”

⁵Kutwala kavili kushidoni, “Mwene liduva lyakupumula lyo ni Mwana Wamunu.”

⁶Muliduva linji lyakupumula akainjile mushitala shakulipudidya, momo mo andípagwa munu jumo wakudidimanga nkanakono.

⁷Napanelo vamwalimu vadishaliya pamo na mapalishayo vashinannumbata valota vamanye ikava kenga ankuponia muliduva lyakupumula kwambangidya vapate nkanidyo.

⁸Kanji nae amanya makumbukililo ave, andímwaulila munu wakudidimanga nkono kushidoni, “Takatuka wimile shing'ati!” Nae kutakatuka kwimila.

⁹Yesu kushidoni, “Nangu ninkumudya mwenu po, da muliduva lyakupumula lilamulo linkutuleka tutandedye vyambone kwali vyakunyata? Kuposha shingumi kwali kwanonga?”

¹⁰Andívalola vanu uti vantang'anadídye avalá kutwala kumwaulila kushidoni, “Nyalodya nkono wako!” Nae kutandela momo, nkono kuva kenga patandi.

¹¹Bai vanavo shindívatindimbukanga shitundi kutwala kupakanila mwakuntandela Yesu.

¹²Mumaduva lolo lo, liduva limo Yesu andyámbwakela kumashinga ndashwali; shilo uti andíshwedya anjugwa Nnungu.

¹³Palyamba lyake andívashema vakwoda vake kuvatandola kumi na mbili pakati pave; ava kuvashema Vamyombe.

¹⁴Vanu avo vavele ava: Simoni washilota kumupa Yesu lina lya Patulu, Andaleya nung'une jo Patulu, Tiyagu namu Nshuwau, Pilipo, Balutolomeu,

¹⁵Mateu, Tome, Tiyagu mwanagwe Alupeu, Simoni wavashinshema Shelote,[14]

¹⁶Yuda mwanagwe Tiyagu namu Yudashi Shikaliyote áukile ndava nannimya.

¹⁷Yesu andyálenavo vamyombe avalá kuka ndaikalanga pantadala. Popo po, shindípagwa shipinga shikumene shavakwoda vake na kupagwa imbumba yavenentete vakwalakela mumautu uti ashilambo sha ku Yudeya, vakwalakela ku Yelusalemu, vanji vakwalakela nanyenje imanga ya ku Tilu na ku Shidoni.

¹⁸Vanu ava vaidilile kumwigwilila na kuvaponia vilwele vyave; avalá váshangaishangigwa na majini mashapu kutwala kupona.

¹⁹Kula munu ashindalota ankwae Yesu mwaa mumili mwake mushindauma dimongo na nae vanu ava uti andívaponia.

²⁰Napanelo Yesu andíng'amula mevo ake kuvalola vakwoda vake kuvaulila kushidoni, “Mundyalaligwa mwenu mmamashikini, utawala wa Nnungu, wènu.

²¹Mundyalaligwa mwenu múvele na indala ambi apa, mundaikuta. Mundyalaligwa mwenu múlila ambi apa, mundeka.

²²“Mundyalaligwa mwenu pavannyatila vanu, kumwambukanga, kuntukana na kumumya shimbili shakunyata mwaa wa Mwana Wamunu.

²³Muliduva alyo, mwenu litamange na puwanga mwaa mwe! Kuwa ko, inudyo yenu ikumene. Ata vanyakala vave vashivatandela momo vakulava.

²⁴“Kanji mupambale mwenu mmatajili mwaa mundipata tayali kupambadyangigwa kwenu.

²⁵Mupambale mwenu mwíkwite mwaa inankola indala. Mupambale mwenu mwéka mwaa mundalamadika na mundalila.

²⁶“Mupambale mwenu pavamwing'a shimbili vanu uti mwaa vanyakala vave vashivatandela momo vakulava vakushang'apa.

²⁷“Kanji nangu ninkumwaulila mwenu múngwigwilila ambi apa doni, vanagwaledye vamongo venu, vatanane vannyatíla,

²⁸vaalaliye vannikíta na vashwalidye vamuuvyánga.

²⁹Aijá álota kukukanyola utung'u umo, nshiliulile unji. Álota kukula likoti, lishati momo nnakele.

³⁰Munu woewoe akakujugwa shinu, mupe; aijá álota kutwala shinu shako haunandai.

³¹Ashilá shinnagwéla mwenu vantandele, namwenu dadavo vatandele navanavo.

³²Shapo mwenu mukavanagwaledya avalá vannagwalédya, inkupagwa paida shani kwenu? Ata vakutega tu momo vandávanagwaledya avalá vánavanagwaledya vanavo.

³³Namomo mwenu mukavatandela wambone avalá vantandéla, inkupagwa paida shani kwenu? Ata vakutega tu dadavo, vandátandela momo.

³⁴Na mukavakapesha vamuvenavo lilindilililo lyakupata, inkupagwa paida shani kwenu? Ata vakutega tu vandákapashania pakulota kupata kavili shilinga shosho.

³⁵Bai vanagwaledye vamongo venu, tandedya wambone, kapesha pamukalindila kupata shinu shoeshoe. Mukatenda doni, inudyo yenu indava ikumene na mwiu mundava mmanavake Wapashanya-uti. Mwaa nae andávatanana vakanalambwalela na vakalau.

³⁶“Ava mmashididi kenga Tatagwenu nanae ni washididi.

³⁷“Hamunamuukumu munu namwenu Nnungu hamuukumu. Hamunamunge munu namwenu Nnungu hamunga. Valivalive vankawédya namwenu Nnungu anannivaliva.

³⁸Nadoni mukajaula namwenu Nnungu andamupa; andatwala shipimo shambone, shakwinyila, shakuumbala, shakupakatika kumwing'a. Doni, mo mwamuvapela vavenu, namwenu Nnungu anampela momo.”

³⁹Kutwala kuvaulila nkong'o au, “Inkuululika munu ákalola kunkamula nnandi ákalolamwagwe? Da vanu vavili ava uti havagwilila mulipondo?

⁴⁰Nkwóda hanamanya mpaka kumpunda aijá ámpundisha kanji nkwóda woewoe akalipundisha shana ava kenga jo mwene ámpundisha.

⁴¹“Mwaa shani unkwona shikoko shivéle muliu lyanung'unumunu kuleka kwona likangolo livéle muliu mwako?

⁴²Ùmwaulila dashi nung'unumunu, ‘Shate nikushe shikoko shivéle muliu mwako,’ wako likangolo livéle muliu mwako, ùkaulula kwona? Umunu wamalambi davo gwe! Shitandi usha likangolo livéle muliu mwako kutwala apo undalola shana pakulota ushe shikoko shivéle muliu lyanung'unumunu.

⁴³“Haupali nnandi wakukonda úpa vyepo vyakunyambikanga na haupali nnandi wakujumajumanga úpa vyepo vyambone.

⁴⁴Ivelé doni, kula nnandi umanyika mwaa wavyepo vyake; havanepa malalange mwinalala na havanepa nshambalau mulilonga.

⁴⁵Munu wakwalala ntima mwaa wavyambone vipagwíte muntima mwake, nae aumadyanga vinu vyambone kanji munu wakunyata ntima mwaa wavyakunyata vipagwíte muntima mwake, nae aumadyanga vinu vyakunyata. Kula munu atangola kwodana na vimuumbéle muntima mwake.

⁴⁶“Mwaa shani mungushema ‘Nang'olo, Nang'olo’ na mwenu shanimwaulila nangu hamunatandeya shinu?

⁴⁷Munu woewoe áida kwangu nangu áigwilila malove angu na átandedya, nangu ndamwaulila walinganenenavo.

⁴⁸Munu ajo avelé mwamunu ádangile ing'ande yake; andimba mapondo akukadaleka mpaka kundonda mulijanga kutwala kudenga. Livambwe likaide, medi kukanyola ing'ande yo kanji ing'ande yo, kulamana na kuting'ina mwaa wakudenga shana.

⁴⁹Kanji aijá áigwilila malove angu kanji mene kutandedya, avelé mwamunu ádangile ing'ande yake pashanya ulongo kwabila kukadaleya mapondo; livambwe kugang'ola ing'ande yo kutwala ing'ande nneu do, jiu, kujiuka.”