Read Ibibiliya mu Shimakonde Imbodi Yaambi na dimbande dya Imbodi Yakala Lukashi 7 Bible Online

Lukashi 7 - Ibibiliya mu Shimakonde Imbodi Yaambi na dimbande dya Imbodi Yakala bible

Lukashi 7

¹Napanelo Yesu akamalile mapundisho ake pamevo pavenentete, andyúka ku Kapalanaumu.

²Palikaja lyolyo, andípagwa nang'olo jumo wavaing'ondo miya wavaloma. Nae andívanavo ntumika wake washintanana namene e avéle nnwele wakuleka indaja.

³Nang'olo ajo akaigwe vantambulanga Yesu, andívatuma vanang'olo vavayuda kuka nanjugwa Yesu auke akamponie ntumika wake.

⁴Vanavo vakawike pavele Yesu vanínjugwangila namene vaashidoni, “Nang'olo ajo, wako indikuvaikila umpwashele

⁵mwaa nae ankuvanagwaledya namene venentete vetu na ni jojo átudangalele shitala shakulipudidya.”

⁶Kutwala Yesu kuka namu vanang'olo avo; pavavandike paing'ande, nang'olo kuvatuma vavagwe kuka ndamwaulila Yesu kushidoni, “Nang'olo, haunashumbukange mwaa nangu hanguvaikidile kungwidila wako kwing'ande kwangu.

⁷Ni ashi shingutadídye kulyona kunyambikanga kwida nangu nimwene ndatangola namu wako. Kanji ukatangola lilove limo tu, ntumika wangu andapona.

⁸Mwaa nangu ni nimunu ngúvele mwina madalaka na ninkuvanavo vaing'ondo vandivalamulila. Nikannamulila jumo, ‘Wena!’ Nae kukinneu. Junji, ‘Ida!’ Kwidinneu. Nikannamulila ntumika wangu, ‘Tenda ashi!’ Nae kutandenneu shosho.”

⁹Yesu akaigwe malove ala, anínshanga munu ajo; nae kushiliuka kutwala kwaulila imbumba yavanu íshimwoda kushidoni, “Ninkummanyiya ngala doni, ata mo muvanaishilaeli, hangunava kukodya likulupililo kenga ali.”

¹⁰Bai vanu vavatumíle avalá pavaujidile kukaja, vanínkodya ntumika jo àponile.

¹¹Napanelo ling'oto lyawakati padyoko, nae andyúka kulikaja limo lyavashema Naimu; vakwoda vake vandyúka namu nae pamo na imbumba yavanu vanji.

¹²Akawike pashengo likaja, mwe! Vanu kwaloka vànyukete maiti; maiti ala avele amwana nnume avéle jumo jojo. Mwene nkúvaleka avele nkongwe namwili na imbumba yavanu vapalikaja ishinampalakela.

¹³UMU akamwone namwili jo andímwanangila shididi kutwala kushidoni, “Haunalile.”

¹⁴Nae kuvandika, kukamula igoli yavanyukatidíle maiti ailá, vanu vanyukéte igoli kwimila nae kushidoni, “Nnemba! Ninkukwaulila, takatuka!”

¹⁵Maiti apalá takatuku, ngoo, kutunduvanginneu kutangola nae kuntwala kumwing'a mwene anyoke.

¹⁶Vanu uti kuvainjila kujopa kutwala kumupa lishangelo Nnungu vaashidoni, “Pakati petu andyumilila nkúlava nkumene namene!” Vanavo kavili kushidoni, “Nnungu andida ndavaangangola venentete vake!”

¹⁷Bai dyabali adyo dimwe Yesu dindíigwinika ku Yudeya na muvilambo uti vyashitanono.

¹⁸Napanelo vakwoda vake Nshuwau vanímmalangangila Nshuwau vinu avyo uti.

¹⁹Nshuwau akaigwe, andívashema vakwoda vake vavili kuvatuma kumwe UMU vakamudye doni, “Da wako ni gwegwe watukulindila kwida kwali tunnindile junji?”

²⁰Bai vakawike pavele Yesu vanavo kushidoni, “Nshuwau Wakubatisha anditutuma twide tukudye doni, ‘Da wako ni gwegwe watukulindila kwida kwali tunnindile junji?’ ”

²¹Muwakati wowo Yesu andívaponia valwele voe vavilwele vyakuvilingananga, vamauvilo na vamajini aukalau. Na yadavo vákalola andívatadya kupata kulola.

²²Yesu napane andívajang'ula vanu avalá kushidoni, “Wena mukammalangangile Nshuwau vyamugwene na vyamwigwite. Kamwaulile doni, vákalola vankupata kulola, vakudidimanga madodo vankuwena, vamalemba vankutakata, vákaigwa vankwigwa, vakupela vankuvadyuwa na vamashikini vankuvalangangiligwa ntenga wambone.

²³Andijaligwa munu ákangunyatila nangu.”

²⁴Napanelo avalá vaidíle na ntenga umwe Nshuwau vakatumuke mulyutu alyo Yesu andítunduvanga kutangola ing'ano imwe Nshuwau avaulila vanu vapagwíte apo kushidoni, “Da kushimbweshe muukile ndalola nyamani? Muukile ndalola udani úshipunga imepo?

²⁵Kanji muukile ndalola nyamani? Muukile nannola munu ágwalangidile shana? Mwenu! Vagwalangidíle dinguvo dyakushenga na vanáma mukupuwanga, vaikalanga muding'ande dyavaumu.

²⁶Kanji shana muukile ndalola nyamani? Muukile nannola nkúlava? Elo nkúlava kanji nangu ninkumwaulila doni, nae pankulava po, andipunda;

²⁷ni jojo aijá wavamwandike doni, ‘Lola, nannangaledya njelo wangu apite akukandyangidya indila yako umwene úkanava kupita.’[15]

²⁸Nangu ninkumwaulila ngala doni, pakati pavanu vamushilambo shapai haumilidile nkúlava ámpundile Nshuwau. Kanji aijá ndikidiki muutawala wa Nnungu aju ni nang'olo ámpundile nae.

²⁹Vanu uti na ata vakukatisha-ukodi vamwigwilidíle Nshuwau, vandímupa ishaliya Nnungu mwaa wakuvapa ubatisho Nshuwau

³⁰kanji mapalishayo namu vamwalimu vadishaliya pakwita kuvapa ubatisho Nshuwau, vandiludyanga malotelo a Nnungu pamili pavo.

³¹“Vanu vaimbula ai ndivalinganiange na nyamani? Vanu ava vavele mwanyamani?

³²Leka ndivalinganiange na vadyoko vaikalénge mumautu aumbala vatangalanila doni, “ ‘Tundimwambela magoma, mwenu hamuvinile. Tundimba dimu dyashililo, mwenu hamulidile.’

³³Shapo lo, andida Nshuwau Wakubatisha munu ákashilya na ákashikumbila ugwalwa wavyepo mwenu kushidoni, ‘Anintawala lijini ajo.’

³⁴Kwida Mwana Wamunu álya na ákumbila mwenu muushidoni, ‘Nnole munu wakululuka, lilevi, njave vakukatisha-ukodi na vakutega.’

³⁵Kanji napane limanyilo lyake Nnungu linkulilodya kuva lyaishaliya kwa avilá vyavatenda vaitikidíle.”

³⁶Napanelo mpalishayo jumo anínnalika Yesu kwing'ande yake akalye shakulya; Yesu kwinjila nng'ande amulá kutwala nanae kwikala pandamu.

³⁷Mwe! Nkongwe jumo nkútega wapalikaja lyolyo akamanye doni Yesu avelé nng'ande mwake mpalishayo alya shakulya, nae andítwala ishupa yake yamauta akunung'angila

³⁸kuka ndamwimila Yesu pamadodo pake, kulila, myodi kugwilila mmadodo mwake Yesu kutwala ugwimbu wake kupukutanga myodi mmadodo mo, kupalapata na kupakanga mauta.[16]

³⁹Napanelo mpalishayo aijá annalike Yesu akone davo, andítangola shintimatima aashidoni, “She! Aju leka àvele nkúlava mwiu, shi akanimmanya nkongwe ánkamulanga aju; nkongwe aju, nkùtega!”

⁴⁰Kanji Yesu andímwaulila kushidoni, “Simoni! Shipali shinu shangulota kukwaulila wako.” Simoni, “Shinu shani mwalimu?”

⁴¹“Munu jumo ntajili ashindavadai vanu vavili njuluku wake. Jumo ashindai dinali dimiya mwanu, junji kundai amushini.

⁴²Kanji vanu vavili ava uti kwodamwaa havavenavo njuluku wakunnipa, nae andívalivalivila uti. Napanelo pakati pavanu vavili ava, wakwashi álota kunnagwaledya namene mwene njuluku?”

⁴³Simoni kushidoni, “Nangu ngwona jo wannivalidile poe jo.” Yesu kushidoni, “Undyamuwa shana.”

⁴⁴Nae kushiliuka kunnola nkongwe kutwala kumudya Simoni kushidoni, “Unkumwona nkongwe aju? Nangu ndiinjila nng'ande mwako, wako haungupele medi akunavanga mmadodo kanji nkongwe aju, aningunavyanga madodo myodi kutwala kungwanyalanga na ugwimbu wake.

⁴⁵Haungukumbatidile kanji nkongwe aju, te ndikainjile hanapumula shinu kungupalapata mmadodo.

⁴⁶Haungupakile mauta mmuti kanji nkongwe aju, aningupaka mauta akunung'ila mmadodo.

⁴⁷Nadoni ninkukwaulila ngala doni, madambi ake avéle oe, andilivalivika; ni ashi shalodya linagwaledyo likumene. Kanji kwaupande wako wako, nangu nikwaulila doni, munu ánalodya linagwaledyo lidikidiki, Nnungu annivaliva padyoko madambi ake.”

⁴⁸Kutwala apo andímwaulila nkongwe aijá kushidoni, “Madambi ako mwiu andilivalivika.”

⁴⁹Bai avalá vanu vapagwíte pavashilya apalá vandyúdyanianga vaashidoni, “Da aju avelé kenga nyani áulula kuvalivaliva vanu madambi?”

⁵⁰Kanji Yesu andímwaulila nkongwe jo kushidoni, “Likulupililo lyako lindikuposha, wena kwaamani.”