Read Ibibiliya mu Shimakonde Imbodi Yaambi na dimbande dya Imbodi Yakala Nshuwau 10 Bible Online

Nshuwau 10 - Ibibiliya mu Shimakonde Imbodi Yaambi na dimbande dya Imbodi Yakala bible

Nshuwau 10

¹“Ninkumwaulila mwiu mwiu doni, aijá ákainjilila pannango walingongo lyavangandolo[41] ila áinjilila akwela lingongo, ajo nkwíva na nkúbyaa.

²Napane áinjilila pannango nae ni nkúshunga wiu wavangandolo.

³Aijá munu wapannango, anánshimulila nnango kutwala vangandolo kwigwa lidi lyake. Napane vangandolo vake vo, kula ngandolo nae anánshema na lina lyake kutwala kuvaumidya panda kuvalangalalela.[42]

⁴Nae panavaumya panda avalá vangandolo vake uti, mwene andálangalela kutwala vangandolo vake vo kumwoda mwaa lidi lyake vankumanya.

⁵Vangandolo, mwiko havanamwoda munu nnangadavo, vanavo vanantukuta mwaa madi avanu valangadavo, havamanyite.”

⁶Yesu andívakang'ela nkong'o awo kanji vanavo ashilá shashivaulila, mana ake havashimanya.

⁷Napavedoni Yesu andítangola kavili aashidoni, “Ninkumwaulila mwiu mwiu doni, nangu ni Nnango Wavangandolo.

⁸Vanu uti valitandyénge kwida[43] nangu nikanava, vanavo uti vàkwiva na vàkubyaa; vovo vo vangandolo havavaigwilidile.

⁹Nangu ni nnango; munu woewoe akainjilila kwangu, andaambwalegwa. Nae andainjila, andauma na andakodya udani wambone.

¹⁰Nkwíva aidila bai kwiva, kubyaa na kubamola; nangu jo ngwidilé pakulota vanavo vapate shingumi na shingumi shene vavenavo shoe namene.

¹¹“Nangu ni Nkúshunga Wambone. Nkúshunga Wambone, nae anájaula shingumi shake kwamwaa wavangandolo.

¹²Munu washibalugwa, ákavele nkúshunga na ákavele mwene vangandolo, nae kumwona kwene livinji tu, andávaleka vangandolo kutukuta kuka kutwala livinji jo kuvainjilila, vanavo uti do, pwii.

¹³Napane amu ni mwanatandela munu washibalugwa, nae hanavatanana vangandolo.

¹⁴“Nangu ni Nkúshunga Wambone; vangandolo vangu ninkuvamanya na vo vangu vo, vankungumanya

¹⁵kenga mo mwangumanyila nangu Atata, nanangu momo Atata ninkummanya. Nadoni ninkujaula shingumi shangu kwamwaa wavangandolo.

¹⁶Ninkuvanavo vangandolo vanji vákavele vamulingongo ali; vovo vo ininguvaikila ndivatwale, vanavo lidi lyangu vandaigwa, vandapagwa shipinga shimo na nkúshunga jumo.

¹⁷Ni ashi shitádya Atata angunagwaledye mwaa nangu ninkujaula shingumi shangu pakulota ngupate kavili.

¹⁸Shingumi shangu sho, hapali wakungupoka; nangu ninkujaula nene nimwene. Ninkuvanavo madalaka akujaula na akupata kavili. Lilamulo ali ngupatilé kumwe Atata.”

¹⁹Napavedoni kwamwaa wamalove alo kundyúmilila kavili kujavanikana pakati pavajuda.

²⁰Voe pakati pave vashishidoni, “Munu aju animwinjila majini; jojo aju, ankudulumbuka. Napane mwaa shani munkumwigwilila?”

²¹Vanji kushidoni, “Mwenu! Malove ala hanava shinu amunu wamajini. Hainatoshe lijini ankuulula kuntadya munu ákalola kulola?”

²²Napanelo pa Yelusalemu shindípagwa Shikukulu Shakwapula.[44] Wakati wene wo uvele washipwepwe.[45]

²³Napanelo Yesu àvele mwing'ande ya Nnungu ashindapita awanawananga mulukoma lwashitala shimwe Shalomoni.

²⁴Vayuda vaníntang'anedya kutwala kumudya, “Ulota kutuleka mudiwashiwashi mpaka duvani? Ikava kenga wako ni Klistu, twaulila ngala.”

²⁵Yesu kuvajang'ula, “Nangu nimwaulila kanji mwenu hamunakulupila shinu. Vitendo vyangutenda nangu palina limwe Atata ni vyovyo vinguumidya nangu ushuda.

²⁶Mwenu po hamunakulupila shinu mwaa hamunava shinu mmangandolo vangu.

²⁷Vangandolo vangu nangu, vankwigwa lidi lyangu; nangu ndivamanya vanavo na vanavo vankungwoda.

²⁸Avalá vangwóda nangu, ninkuvapa shingumi shíkamalilika, vovo vo mwiko havajaika na hapali wakungupoka mmakono mwangu.

²⁹Atata ángupele vanavo ankuvapunda vanu uti[46] na hapali munu wakuulula kumpoka vanu avo mmakono mwake.

³⁰Nangu namu Atata tunkuva shinu shimo.”

³¹Bai vayuda vandílakatanga kavili majanga pakulota vamwamange.

³²Yesu kushidoni, “Nditenda vinu vyoe vyambone vyakwalakela kumwe Atata pamevo penu. Napanelo pakati pavinu avyo, shakwashi shamulota mungwamangile majanga?”

³³Vayuda kushidoni, “Wetu hatunalota shinu kukwamanga majanga kwamwaa washinu shoeshoe shambone shautandile, ni kwamwaa wakukupulu. Wako umunu, napane unkulivika kuva Nnungu.”

³⁴Yesu kushidoni, “Da mu Lilamulo lyenu havaandike doni, ‘Nangu nditangola doni, Mwenu po, mmannungu?’[47]

³⁵Ikava kenga avalá vapatíle ntenga wake Nnungu, andivashema kuva vannungu, napane Maandiko hapali wakuulula kuputanga,

³⁶kushi aijá walyapulidile Atata jo kuntumidya mushilambo? Mwaa shani munkutangola doni, ‘Unkukupulu, pangulivalanga doni, Nangu ni Mwana wa Nnungu?’

³⁷Ikava kenga nangu hangunatandedya shinu vinu vimwe Atata bai hamunangukulupile

³⁸kanji ikava ninkutandedya, ata mukanangukulupila nangu, bai kulupila kwavinu vyangutenda vyo pakulota mumanye na muke mushu mumanya kenga Atata ankupagwa nkati mwangu na nangu nkati mumwe Atata.”

³⁹Bai vayuda vandílingangila kavili kunkamula kanji nae andívativaniva.

⁴⁰Yesu andyúma kavili kuka mwangu unji wa Yudani kulyutu alilá lyashivabatishidya Nshuwau vanu, nae kutwala kwikala koko.

⁴¹Napanelo vanu voe vashindamwidila na vashindatangola shivenevene vaashidoni, “Nshuwau hatandile shimanyikilo kanji uti vyashimmalanganga munu aju, vìu.”

⁴²Bai mulyutu alyo vanu voe vanínkulupila Yesu.