Read Ibibiliya mu Shimakonde Imbodi Yaambi na dimbande dya Imbodi Yakala Nshuwau 11 Bible Online

Nshuwau 11 - Ibibiliya mu Shimakonde Imbodi Yaambi na dimbande dya Imbodi Yakala bible

Nshuwau 11

¹Napanelo andípagwa munu jumo Lashalu áshipagwa mushilwele wapalikaja lya Betaniya,[48] likaja lyolyo lyashinama Maliya na nkulumunu Malita.

²Avele Maliya aijá ampakénge UMU mauta na ampukuténge mmadodo atumila ugwimbu wake e avénavo numbumunu nnwele, Lashalu.

³Napanelo valumbumunu avalá vandítuma vakamwaulile Yesu doni, “Nang'olo, mujo waunnagwaledya namene wako aijá, nnwele.”

⁴Yesu akaigwe, andítangola kushidoni, “Shilwele asho hashinava shinu shakuka ndamalilikila mukupela kanji shilota kulodya lishangelo lyake Nnungu pakulota kwaindila yashilwele asho, Mwana wa Nnungu apate lishangelo.”

⁵Yesu ashinannagwaledya namene Malita na nung'une pamo na numbugwave Lashalu.

⁶Napavedoni nae àigwite avi kenga Lashalu nnwele, andíikala maduva mavili mulyutu lyavéle

⁷kutwala apo andívaulila vakwoda vake kushidoni, “Tuke kavili ku Yudeya.”

⁸Vakwoda vo kushidoni, “Labi, madudi-madudi apa vananangalaledi vashilota vakwamange majanga; napanelo ulota uke koko kavili?”

⁹Yesu kushidoni, “Da liduva halivenavo disaa kumi na mbili? Munu akawena mui hanalikuvala mwaa nae andóna lilangadyo lyashilambo.

¹⁰Kanji áwena shilo andálikuvala mwaa lilangadyo nkati mwake halipali.”

¹¹Malove ala nae andítangola naling'oto andítangola kavili aashidoni, “Njetu Lashalu andilala, nangu ninkuka ndamwimulanga.”

¹²Vakwoda vake kushidoni, “Nang'olo ikava kenga alelé lwono, bai andapona.”

¹³Yesu pashitangola davo ashivalanga kupela kumwe Lashalu kanji vakwoda vashikumbukila kenga nae ashamba kulala kwalwono.

¹⁴Napavedoni Yesu andívaulila ngala kushidoni, “Lashalu andipela.

¹⁵Nangu ninkupuwanga kwamwaa wenu mwenu mwaa kwanavo nangu hangupagwite pakulota mwenu mukulupile. Kanji leka tuke tukannole.”

¹⁶Napanelo Tome, aijá áshimanyika Didimu,[49] andívaulila vavagwe kushidoni, “Leka tuke tukapalange pamo namu nae.”

¹⁷Yesu pawikile ànkadidye Lashalu àtwete maduva nsheshe mushonga.

¹⁸Napanelo kuma pa Yelusalemu mpaka pa Betaniya shivele shitamba shavyuluta vitatu.

¹⁹Napavedoni vanu voe pakati pavayuda vandyúka nannidya Malita namu Maliya kwamwaa wanumbugwave.

²⁰Malita paigwite kenga Yesu ankwida, andyúka anshinga. Maliya andíbaki pakaja.

²¹Malita kumwaulila Yesu, “Nang'olo, wako leka ùpagwite apa numbwangu hanapele.

²²Ata ambi apa ninkumanya kenga shoeshoe shaulota kunjugwa Nnungu, Nnungu andakupa.”

²³Yesu kutwala kumwaulila doni, “Numbuvo andadyuka.”

²⁴Malita, “Nangu ninkumanya kenga nae andadyuka mukudyuka kwamuliduva lyamwisho.”

²⁵Yesu doni, “Nangu ni Kudyuka na Shingumi. Aijá ángukulupila nangu, ata akapela andavanavo shingumi.

²⁶Kula munu ánama na ángukulupila nangu, mwiko hapela. Dashi wako unkukulupila malove ala?”

²⁷Malita kushidoni, “Elo nang'olo. Nangu ndikulupila kenga wako ni Klistu, Mwana wa Nnungu aijá úshilota kwida mushilambo amu.”

²⁸Akamalile kutangola malove alo andyúka kwanung'unumunu Maliya nannyinyitila doni, “Mwalimu jo andiwika, andákushema.”

²⁹Maliya akaigwe, andítakatukinneu kumuukila Yesu

³⁰pakuva Yesu avele akanava kwinjila nkaja àvele palyutu lyolyo lyankodídye Malita.

³¹Napanelo vayuda vapagwíte namu Maliya paing'ande pake vannidya, vakamwone atakatuka na auma shipajelo vandímwoda vakumbukila doni, auka kuvyonga ndalila.

³²Bai Maliya akawike pavele Yesu, pangwene andíguguvala mmadodo mwake aashidoni, “Nang'olo, wako leka ùpagwite apa numbwangu hanapele.”

³³Yesu pangwene Maliya alila na vayuda vamwodíle navanavo momo valila, unímmeta ntima wake na vyakunkodya muntima mwake viníntindinganianga.

³⁴Kutwala kudya, “Da munshikilé pashi?” Vanavo kushidoni, “Nang'olo, ida ulole.”

³⁵Yesu andyúmadyanga myodi.

³⁶Vayuda do, “Munkwona mwashinnagwaladyedya nae munu aju!”

³⁷Vanu vanji pakati pave kushidoni, “Da aju i jojo ántadidye munu aijá wakuputala mevo kulola? Napane hainaululike kuntadya munu aju hanapele?”

³⁸Napanelo Yesu akuno ummeta ntima wake kavili, andyúka kulikabuli. Likabuli alyo livele ntupa[50] na vandídiva lijanga.

³⁹Yesu kutwala kushidoni, “Usha lijanga lyo!” Malita numbugwe wakujala do, “Nang'olo, ambi apa ankunung'a mwaa andipita maduva nsheshe.”

⁴⁰Yesu, “Da nangu handikwaulidile doni, ukakulupila undona lishangelo lyake Nnungu?”

⁴¹Bai vanavo vandyúsha lijanga lyo Yesu kunyanyula shilaka kutwala kushido, “Atata, ninkukulambwalela mwaa uningwigwilila.

⁴²Ninkumanya kenga wako ngwengwe unkungwigwa kanji nditangola davo pakulota vanu vangutang'anadídye vakulupile kenga wako po, ni úngutumididye.”

⁴³Akatangole malove ala andítangola pashanya po aashidoni, “Lashalu, umila panda apa!”

⁴⁴Munu e apadíle aijá kuma apalá, makono na madodo vàntavilidyenge shanda, ing'ope vàungangidile lilesho. Yesu kushidoni, “Muungulange munneke auke.”

⁴⁵Kutwala vanu voe pakati pavayuda ve vamwidilíle Maliya pavagwene avilá vyatandile Yesu vanínkulupila.

⁴⁶Napane vyovyo vyo, vanji vandyúka ndavalanganga kwamapalishayo.

⁴⁷Vanang'olo vavakulangalalela-shadaka pamo na mapalishayo vandíikala nguguvale kutwala kushido, “Na wetu apa shipali shatwamba? Munu aju ankulodya vimanyikilo vyoe namene.

⁴⁸Tukanneka auka mushu atandedya, vanu uti vanankulupila. Valoma vandaida ndatupoka lyutu lyetu pamo na venentete vetu.”

⁴⁹Napanelo Kaipashi, munu jumo wamushipinga shosho, avéle nkúlangalalela-shadaka nkumene mumwaka awo, andívaulila, “Mwenu hashipali shamumanya!

⁵⁰Hamunaanalela shinu kenga ni shambone kupela munu jumo kwamwaa walikola kuliko kumalilika venentete uti?”

⁵¹Malove ake Kaipashi havele gweka akubuni jo mwene. Ni kwamwaa wakuva nkúlangalalela-shadaka nkumene mumwaka awo ni shintadídye avalangange kenga Yesu andapela kwamwaa wavenentete

⁵²na ata i gweka venentete avo, namomo kwamwaa wavana va Nnungu vamwadilikanénge pakulota vanavo, nae avaunganiange vave shipinga shimo.

⁵³Bai kutunduvangila muliduva alyo, vandyámuwa kummalidya.

⁵⁴Kwaing'ano ayo, Yesu hashiwena kavili ngala pakati pavayuda ila andyúma kuka isemu ívele pepi na kushimbweshe palikaja lyavashema Epulaimu. Pashinu apo, nae andíikala na vakwoda vake.

⁵⁵Napanelo Pasaka yavayuda ishindavandikanga. Vanu voe vaisemu ayo, Pasaka ikanava kuwika vandyúka ku Yelusalemu ndalyushanianga ushapu.

⁵⁶Vanavo vashinannambela Yesu na vàimilenge mwing'ande ya Nnungu vashindaudyania doni, “Mwenu mwona dashi? Mwiu, jojo jo andaida pashikukulu apa?”

⁵⁷Doni, vanang'olo vavakulangalalela-shadaka pamo na mapalishayo vandyúmya lilamulo lyakulota munu ámanyite lyutu lyavele Yesu, avalangange kwambangidya vakankamule.