Read Ibibiliya mu Shimakonde Imbodi Yaambi na dimbande dya Imbodi Yakala Nshuwau 12 Bible Online

Nshuwau 12 - Ibibiliya mu Shimakonde Imbodi Yaambi na dimbande dya Imbodi Yakala bible

Nshuwau 12

¹Napanelo àbakidile maduva sita kuwika Pasaka, Yesu andíwika pa Betaniya likaja lyashinama Lashalu aijá wandyuwídye pakati pavakupela.

²Koko ko vanínkandyangidya shakulya shalyulo; Malita ashindamwangaikangila pashilya akuno Lashalu àikele pandamu namu nae.

³Napanelo Maliya andítwala ishupa yamauta akunung'angila ambone-uti aúka njuluku woe kumpaka mmadodo mwake Yesu, kupukutanga mmadodo mo atumila ugwimbu wake. Kunung'angila kwamauta alo, kundyánela uti nng'ande mo.

⁴Napanelo Yudashi Shikaliyote, jumo pakati pavakwoda vake aijá álota kunnimya, andítangola doni,

⁵“Mwaa shani mauta ala havashumididye, njuluku wo kuvapa vamashikini? Dikandipatikananga dinali dimiya nnatu.”[51]

⁶Nae andítangola davo i kwamwaa wakuvatanana vamashikini kanji mwaa wakuva nkwíva. Lipeta lyanjuluku lishiikala namu nae; njuluku úshiinjila amo, nae ashindadadamola.

⁷Yesu kushidoni, “Nneke, nae atandilé davo pakulota alikandyedye muliduva lyamashiko angu.

⁸Vamashikini vo mundapagwanavo ngwengwe, napane nangu namu mwenu ngwengwe hangupagwa.”

⁹Napanelo imbumba yavayuda paimanyite doni, Yesu apali ku Betaniya, indyúka koko i yakunnola Yesu gweka, yadavo ivele yakunnola Lashalu aijá wandyuwídye pakati pavakupela.

¹⁰Nadoni vanang'olo vavakulangalalela-shadaka vandípanga nnugu pakulota vammalidye yadavo Lashalu

¹¹mwaa, kwamwaa wake, vanu voe vashindavaambukanga vayuda kutwala kunkulupila Yesu.

¹²Napane palyamba pake po, imbumba yavanu ye iidíle pashikukulu, paiigwite doni, Yesu ankwida pa Yelusalemu,

¹³vanavo vandínyakatanga maalati amalala kuka nanshinga vajunga pashanya po vaashidoni, “Ashibike! Aalaligwe aijá áida palina limwe UMU![52] Aalaligwe Umu wa ku Ishilaeli!”

¹⁴Yesu anímpata mwana wapunda kutwala kunkwela kenga mwavaandikidile,

¹⁵“Mmanashiyau, hamunajope! Mwenu, UMU wenu ankwida ànkwadile mwana wapunda.”[53]

¹⁶Kunantandi vakwoda vake havashimanya vinu avi, napane paukile ndapata Yesu lishangelo ni pavakumbukidile doni, vinu avi vindyandikigwa vimwamba nae na vyovyo vyo, vanintenda.

¹⁷Napanelo imbumba ye ipagwíte namu Yesu muwakati wanshamíle Lashalu mushonga na kundyuwa pakati pavakupela, indyúka mushu yumya ushuda.

¹⁸Ni mwaa wakwigwa kenga Yesu andítenda shimanyikilo asho shitadídye imbumba ya pa Yelusalemu yuke ikampwashalele.

¹⁹Nadoni mapalishayo vandyaulanila shivenevene kushidoni, “Wetu apa hashipali shatwamba! Shapo lola, shilambo uti shindimwoda nae!”

²⁰Napanelo pakati pavanu ve vaukíle ndalipudya kwa Nnungu pashikukulu sha Pasaka, vanji vo vavele vagalegu.

²¹Vovo vo, vandímuukila Pilipo munu wa ku Beteshaida ya ku Galileya nanjugwa doni, “Nang'olo, wetu tulota tumwone Yesu.”

²²Pilipo ankuka ndamwaulila Andaleya kutwala uti vavili, vankuka ndamwaulila Yesu.

²³Yesu ankuvajang'ula doni, “Wakati wakupata Mwana Wamunu lishangelo, undiwika.

²⁴Ninkumwaulila mwiu mwiu doni, imbeju yangano painagwilila pai ikanawa, ivalela momo. Napane ikawa, indápa vyepo vyoe.

²⁵Aijá ánagwaledya shingumi shake andakatoka na aijá ányatila shingumi shake mushilambo ashi, andakondya mushingumi shíkamalilika.

²⁶Aijá ángutumika, inimmaikila angwode. Pangulota kupagwa nangu, ntumika wangu momo andapagwa popo. Munu akangutumika, Atata andamupa ishima.

²⁷“Napanelo ambi apa ungumi wangu unkwangaikanga. Da ngushi dashi? ‘Atata, muwakati au ngwambola’? Mene, shangwidilile muwakati au ni shosho ashi.

²⁸Atata, ing'a lishangelo lina lyako!” Bai lindíigwinika lidi lyakwalakela kuwa líishidoni, “Lishangelo tayali nding'a na yadavo ndaing'a kavili.”[54]

²⁹Imbumba ye ipagwíte mulyutu alyo ikaigwe lidi alyo, indítangola doni, “Ayo, ing'uva.” Vanji do, “Njelo anditangola namu nae.”

³⁰Yesu akajang'ula kushidoni, “Lidi ali haliidile kwamwaa wangu nangu, liidilé mwaa wenu.

³¹Wakati wakuukumigwa shilambo ashi undiwika. Ambi apa, andavingigwa nkútawala washilambo ashi.

³²Napane nangu pavalota kungunyanyulidya kushanya mushilambo amu, vanu uti ndavashombela kwangu.”

³³Nae andítangola malove ala avalanganga inamuna yashipaledi yalota kuvauvanga.

³⁴Imbumba kutwala kujang'ula, “Lilamulo linkutupundisha kenga, ‘Klistu ngwengwe andanama,’ napane utangola dashi, ‘Mwana Wamunu inimmaikila vannyanyule’? Da ‘Mwana Wamunu jo’ ni wakwashi?”

³⁵Yesu kushidoni, “Muwakati padyoko lilangadyo lindapagwa pakati penu. Nadoni wena po pamuvenavo lilangadyo apa kwambangidya shii hashinanshushuwange. Aijá ánawena mushii, hanamanya kwashi kwauka.

³⁶Po pauvenavo lilangadyo apa, kulupila lyo lilangadyo lyo pakulota muve mmana mmalilangadyo.” Yesu akamalile kutangola, andyúma kutwala kuvativaniva.

³⁷Napanelo ata ikava kenga Yesu anditenda vimanyikilo pakati pave, vanavo havashinkulupila.

³⁸Avi vinditandeka pakulota viwikile popo avilá vyatangwéle nkúlava Ishaiya doni, “UMU, ntenga wetu akulupidilé nyani na dililadidyé pamili pamwe nyani dimongo dyake UMU?”

³⁹Ni mwaa au utadídye vanavo havanaulule kukulupila. Doni, Ishaiya anditangola kavili kushidoni,

⁴⁰“Mevo ave andivaputadya, mitima vyave andivananopya, pakulota havanalole na mevo na ata mmitima vyave havanaananalele kutwala kushiliuka na nangu kuvaponia.”[55]

⁴¹Ishaiya anditangola malove ala mwaa andyóna lishangelo lyake Yesu na anditangola amwamba nae.[56]

⁴²Kanji napane ata po pakati pavakutawala po, voe vanínkulupila Yesu kanji kwamwaa wamapalishayo havashilivalanganga likulupililo lyave vajopa kuvingigwa muvitala vyakulipudidya.

⁴³Vovo vo, lishindavanagwela lishangelo lyakwalakela kwavanu kuliko lishangelo lyakwalakela kwa Nnungu.

⁴⁴Napanelo Yesu andítangola pashanya po aashidoni, “Aijá ángukulupila nangu, hanangukulupila shinu nangu, ankunkulupila aijá ángutumididye.

⁴⁵Ángwona nangu, ankumwona aijá ángutumididye.

⁴⁶Nangu ni Lilangadyo ngwídile mushilambo pakulota kula munu ángukulupila nangu, hanapagwe mushii.

⁴⁷Munu akaigwa malove angu na mene kutandedya, nangu namuukumu shinu. Nangu hangwidile ndaukumu shilambo, ngwidilé ndaambola.

⁴⁸Munu ángwita nangu na mene kwitikila malove angu, apali wakumuukumu. Lyo lyene lilove lyanguvalanganga ni lilóta kumuukumu muliduva lyamwisho.

⁴⁹Doni, hangutangwele vyangu nimwene; Atata ángutumididye ni nae ángulamulidile ngutangole nyamani na nguvalangange nyamani.

⁵⁰Nangu ninkumanya kenga lyo lilamulo lyake ali ni shingumi shíkamalilika. Napavedoni, mo mwangwaulidile Atata, nimomo mwangutangalalela nangu.”