Read Ibibiliya mu Shimakonde Imbodi Yaambi na dimbande dya Imbodi Yakala Nshuwau 13 Bible Online

Nshuwau 13 - Ibibiliya mu Shimakonde Imbodi Yaambi na dimbande dya Imbodi Yakala bible

Nshuwau 13

¹Napanelo shikukulu sha Pasaka shikanava kuwika, Yesu àmanyite kenga wakati wake wakuma mushilambo ashi kuka kwatatake undiwika, namomo pakuva andívanagwaledya vake mushilambo, andívanagwaledya mpaka kumwisho.

²Napane valya shakulya shalyulo, Ndamoni àvikile muntima umwe Yudashi mwanagwe Simoni Shikaliyote shabaa yakunnimya

³na Yesu àmanyite kenga Tatamunu aninkamudya vinu uti mmakono mwake, namomo àalakadile kwa Nnungu na ankuujila kwa Nnungu,

⁴andítakatuka pandamu apalá, kula likoti lyake kutwala itaulu kulyungila mwinono.

⁵Nae ankutwala medi kutaa mushuniya kutunduvanga kuvanavyanga vakwoda vake mmadodo na kuvaanyalanga na itaulu yalyungidíle mwinono.

⁶Ankuwika pamwe Simoni Patulu, Patulu jo ankushidoni, “Nang'olo, wako ulota kunavyanga madodo angu?”

⁷Yesu kushidoni, “Wako ambi apa haumanya shandikutenda ila mushu mo, undamanya.”

⁸Patulu do, “Mene. Wako madodo angu, mwiko haunavyanga!” Yesu akanjang'ula, “Ndikanakunavyanga, haupagwa nkati mwangu.”

⁹Simoni Patulu kushidoni, “Bai nang'olo, hanave madodo gweka kanji makono na muti wangu uti momo.”

¹⁰Yesu do, “Munu áliingile medi, iloteka anavange mmadodo gweka mwaa mili wake uti unditakata. Mwenu munditakata kanji i uti.”

¹¹Nae anímmanya aijá áshilota kunnimya; ni ashi shintadídye atangole doni, “I uti mútakete.”

¹²Pamalidile kuvanavyanga medi mmadodo, andítwala kavili likoti lyake kugwala, kuujila palyutu lyake kwikala kutwala kuvaudya, “Da shanintandile ashi, mana ake munkumanya?

¹³Mwenu munkungushema nangu Mwalimu na Nang'olo, munkuvanavo shaliya mwaa ni shosho shanguvele.

¹⁴Napane ikava kenga nangu ngúvele Nang'olo na Mwalimu ninnavyanga mwenu medi mmadodo, bai namwenu momo inimmaikila munavyanie.

¹⁵Doni, nimpelé kenga mpano pakulota mo mwanintandalele mwenu, namwenu mutandele momo.

¹⁶Nangu ninkumwaulila mwiu mwiu doni, ntumika hanampunda nang'olo wake na ata wavantumile kumpunda aijá ántumile.

¹⁷Napane ikava kenga mundimanya vinu avi, mundaalaligwa mukatandedya.

¹⁸“Nangu namwamba shinu mwenu uti; ndivamanya avalá vandivatandwele kanji ni pakulota awikile popo Maandiko, ‘Aijá áshilya namu nangu andijalukanga kuva mmongo wangu.’[57]

¹⁹Ninkumwaulila kaladavo vikanava kutandeka pakulota pavitandeka po, mwenu mukulupile kenga Nangu ni Nene.

²⁰Ninkumwaulila mwiu mwiu doni, álota kumpwashalela aijá wanintumidya nangu, angupwashalela nangu na aijá ángupwashalela nangu, ampwashalela aijá ángutumididye.”

²¹Bai akatangole malove alo, ntima wake uníntindinganianga kutwala kumya ushuda aashidoni, “Ninkumwaulila mwiu mwiu, pakati penu apali álota kungulimya.”

²²Vakwoda vake vandílalana shivenevene vaambabidyania nyani washimwamba.

²³Napane andíikala pepi-pepi namu nae po pandamu nkwóda wake jumo aijá washinnagwaledya namene Yesu.

²⁴Simoni Patulu kunkwidula, “Mudye wamwamba jo.”

²⁵Nkwóda aijá akatepa kutwala kumudya, “Nang'olo, da wakwashi?”

²⁶Yesu kushidoni, “Aijá wangulota kumupa shibadu shaligung'u shangulota kulidya mundamu, ni jojo.” Bai akalidya shibadu shaligung'u kumupa Yudashi Shikaliyote mwanagwe Simoni.

²⁷Nae akalye shibadu ashilá, Shatwani kumwinjilinneu. Yesu kutwala kumwaulila, “Shaulota kutenda sho, tenda shipajelo.”

²⁸Napane vanu ve vapagwíte pandamu apalá havamanyíte mwaa shani andímwaulila davo.

²⁹Kwoda Yudashi avele munu áshiwenanavo lipeta lyanjuluku, vanji vashona kenga amwaulila auke akashume vinu vilotéka pashikukulu kwali auke akavajavile vinu vákalyulula.

³⁰Doni, Yudashi palile ligung'u alilá andyúminneu. Wakati wene wo, uvele washilo.

³¹Ling'oto lyakuma Yudashi, Yesu andítangola doni, “Ambi apa Mwana Wamunu ankupata lishangelo na Nnungu ankupata lishangelo nkati mwake.

³²Ikava kenga Nnungu nkati mwake ankupata lishangelo, nanae Nnungu momo andamupa lishangelo Mwana nkati mwake na lyo lishangelo lyo, anampenneu.

³³“Mmanavangu, undibakila wakati padyoko wakupagwa namu mwenu. Munangulambela napane kenga mo mwandivaulidile vayuda, ambi apa ninkumwaulila mwenu, ‘Kwanguka nangu mwenu hamuulula kuka.’

³⁴Ninkumupa lilamulo lyaambi; nagwaladyania. Mo mwaninnagwaladidye nangu mwenu, namwenu momo nagwaladyania.

³⁵Amu ni mwavalota kummanyila vanu kenga mwenu ni mmakwoda vangu, mukanagwaladyania.”

³⁶Simoni Patulu kutwala kumudya, “Da Nang'olo, ulota kuka kwashi?” Yesu kushidoni, “Kwanguka nangu, ambi apa mwenu hamuulula kungwoda ila mushu mo, munangwoda.”

³⁷Patulu kushidoni, “Nang'olo mwaa shani nakwode ambi apa? Kwamwaa wako wako, nangu ndajaa shingumi shangu.”

³⁸Yesu, “Wako undajaa shingumi shako kwamwaa wangu nangu? Ninkukwaulila mwiu mwiu doni, ng'uku hakangavela wako ukanava kungukana myanda mitatu.