Read Ibibiliya mu Shimakonde Imbodi Yaambi na dimbande dya Imbodi Yakala Nshuwau 14 Bible Online

Nshuwau 14 - Ibibiliya mu Shimakonde Imbodi Yaambi na dimbande dya Imbodi Yakala bible

Nshuwau 14

¹“Hamunaushaushange mitima vyenu. Nkulupile Nnungu; ngukulupila nangu momo.

²Kukaja kumwe Atata apali mautu oe namene. Leka ikavele davo, nikanimwaulila. Doni, ninkuka nampanganiyangidya mautu.

³Nikauka nampanganiangidya mautu, ninkwida kavili nantwala pakulota apalá panguve nangu namwenu mupagwe popo.

⁴Kwanguka nangu, mwenu mundimanya indila.”

⁵Tome kushidoni, “Nang'olo, wetu kwauka wako ko, hatumanyite. Napane indila ayo, tulota kumanya dashi?”

⁶Yesu kushidoni, “Nangu ni Indila, Umwiu na Shingumi. Hapali wakwida kumwe Atata pakapitila kwangu nangu.

⁷Ikava kenga muningumanya, Atata momo munammanya. Kutunduvangila ambi apa munimmanya na munimwona.”

⁸Pilipo kushidoni, “Nang'olo, Tatamunu jo, bai tulodya itunagwele.”

⁹Yesu kutwala kushidoni, “Nangu ndiikala namu mwenu muwakati woe, mpaka ambi haunava kungumanya Pilipo? Munu ángugwene nangu, animwona Atata. Napanelo wako utangola dashi doni, ‘Ngulodya Tatamunu’?

¹⁰Da wako po haunakulupila shinu kenga nangu ninkupagwa nkati mumwe Atata na Atata kupagwa nkati mwangu nangu? Malove animmalangangila hanava shinu akubuni nene nimwene; Atata ápagwa nkati mwangu ni átandedya vinu vyake avi.

¹¹Ngukulupila kenga ninkupagwa nkati mumwe Atata na Atata kupagwa nkati mwangu, kwali mene, kwamwaa wa vyo vinu vyene, kulupila.

¹²Ninkumwaulila mwiu mwiu doni, aijá ángukulupila nangu, vyangutenda avi nanae momo andatenda na vyakwanjadyeka kupunda avi, nae andatenda mwaa nangu mwanda kumwe Atata.

¹³Kula shinu shamulota kujugwa palina lyangu, nangu ndatandedya kwambangidya Atata apate lishangelo nkati mu Mwana.

¹⁴Mukangujugwa shoeshoe palina lyangu, nangu ndatandedya.

¹⁵“Mukangunagwaledya, malamulo angu mundaigwilila

¹⁶na nangu nanjugwa Atata na nae andamupa nkúpambadyanga junji aikale namu mwenu ngwengwe,

¹⁷aijá Imumu Waumwiu. Nae shilambo hashuulula kumpwashalela mwaa hashinamwona shinu na hashinammanya shinu. Mwenu munimmanya mwaa ankunama namu mwenu na andapagwa nkati mwenu.

¹⁸Haninneka muushiva, namwidila kavili.

¹⁹Undiijalila wakati padyoko shilambo hashingwona ila mwenu munangwona. Kwoda nangu ninkunama, namwenu momo mundanama.

²⁰Muliduva alyo mwenu mundamanya kenga nkati mumwe Atata ngupali nangu, nkati mwangu mwenu mupali na nkati mwenu, ngupali nangu.

²¹Munu ávenavo malamulo angu na áigwilila, ajo ni ángunagwaledya. Jo ángunagwaledya nangu jo, Atata anannagwaledya na nangu nannagwaledya kutwala kulilodya kwake.”

²²Napanelo Yudashi kanji i aijá Shikaliyote kushidoni, “Nang'olo, ilota kuululika dashi wako kulilodya kwetu wetu gweka bila shilambo?”

²³Yesu kunjang'ula doni, “Woewoe akangunagwaledya andaigwilila malove angu, Atata anannagwaledya na wetu tundamwidila kutwala kutenda lyutu pamo namu nae.

²⁴Aijá ákangunagwaledya, malove angu hanaigwilila. Mwenu! Malove amwigwite, hanava shinu angu; amwe Atata ángutumididye.

²⁵“Vinu avi nangu nimwaulila panishipagwa namu mwenu

²⁶napane nkúpambadyanga, aijá Imumu Wanashwe walota kuntumidya Atata palina lyangu, nae anampundisha mwenu kula shinu na anankumbuwanga uti vyanimwaulidile nangu.

²⁷Ninkunnakela amani; amani yangu ninkumupa. Hangunamupa shinu kenga mwaijaulila shilambo. Hamunaushaushange mitima vyenu na hamunajope.

²⁸Mundigwa vyanimwaulidile kenga ninkuka na namwidila kavili. Leka mùngunagwaladidye, mukandipuwangila ing'ano yakuka nangu kumwe Atata mwaa nae ni nang'olo kungupunda nangu.

²⁹Vinu avi ninkumwaulila kaladavo vikanava kutandeka pakulota pavitandeka po, mukulupile.

³⁰Hangutangola shinu kavili vinu vyoe namu mwenu mwaa nkútawala washilambo ashi ankwida. Nae kwangu nangu hatenda shinu

³¹kanji pakulota shilambo shimanye doni, nangu ninkunnagwaledya Atata, nadoni avilá vyangulamulidile nae ngutende, ninkutandedya. Bai takatukanga, tume apa.