Read Ibibiliya mu Shimakonde Imbodi Yaambi na dimbande dya Imbodi Yakala Nshuwau 16 Bible Online

Nshuwau 16 - Ibibiliya mu Shimakonde Imbodi Yaambi na dimbande dya Imbodi Yakala bible

Nshuwau 16

¹“Nangu ninkumwaulila uti avi kwambangidya hamunalikuvale.

²Mwenu mundavingigwa muvitala vyakulipudidya; leka apo, wakati unkuwika umwe aijá álota kummyaa mwenu andona kenga alipudya kwa Nnungu.

³Vinu avi vandatenda mwaa havammanyite Atata na ata nangu momo havangumanyite.

⁴Kanji napane vyovyo vyo, ninkumwaulila kaladavo pakulota pavitandeka po, mukumbukilinneu vyanimmanyiya. “Vyanavo kunantandi hanimwaulidile mwaa nangu ndípagwa namu mwenu.

⁵Napane ambi apa panguka kumwe aijá ángutumididye, pakati penu hapali ata jumo wakungudya, ‘Da wenda kwashi?’

⁶Doni, kwoda nimwaulila davo, mmitima myenu mo shinimuumbala shipalodi.

⁷Kanji napane ninkumwaulila mwiu uti doni, kudyanga nangu nguke mwaa ndikanauka, nkúpambadyanga jo hamwidila; nangu ndikauka, nantumidya nae.

⁸Palota kwida po, nae jo andaundukula shilambo kwamwaa wamadambi, ishaliya na ukumu;

⁹kwamadambi mwaa havangukulupidile nangu;

¹⁰kwaishaliya mwaa nangu ninkuka kumwe Atata na mwenu hamungwona kavili;

¹¹kwaukumu mwaa nkútawala washilambo ashi andyukumigwa.

¹²“Nangu ninkuvanavo vinji vyoe vyakulota kummanyiya ila ambi apa, hamulipililila.

¹³Napane palota kwida aijá Imumu Waumwiu anannangalalela mwenu uti muumwiu mwaa nae halivalanganga shinu jo mwene, ila andavalanganga vyalota kwigwa na anammalangangila vilóta kwida.

¹⁴Nae po anangupa nangu lishangelo mwaa alota kupata ashilá shangu nangu kutwala kummalangangila mwenu.

¹⁵Uti vyavenavo Atata, vyàngu. Ni ashi shitadídye nguushidoni, vyangu nangu nae andapata kutwala kummalangangila mwenu.

¹⁶“Muwakati padyoko hamungwona; muwakati padyoko kavili, munangwona.”

¹⁷Napanelo pakati pavakwoda vake vanji vandyáulanila doni, “Da shosho sho amba nyamani paashidoni, ‘Muwakati padyoko hamungwona; muwakati padyoko kavili, munangwona,’ na, ‘Mwaa ninkuka kumwe Atata’?”

¹⁸Nadoni vashindaudyania, “Da amba nyamani paashidoni, ‘Wakati padyoko’? Wetu hatunamwigwa shámba.”

¹⁹Yesu andívamanya kenga vashilota kumudya, nae kutwala kuvaudya, “Da muudyania malove lo angutangwele doni, ‘Muwakati padyoko hamungwona; muwakati padyoko kavili, munangwona?’

²⁰Ninkumwaulila mwiu mwiu doni, mwenu mundalila na mundatangadikanga kanji shilambo shipuwanga. Mundavanavo shipalodi ila shipalodi shenu sho shindava lipuwilo.

²¹Nkongwe ukamwikila wakati wake wakuvaleka, andávanavo shipalodi mwaa wakati wamauvilo undimwikila. Napane pammaleka mwana, nae andálivaliva mauvilo uti kwamwaa walipuwilo lyakwida munu mushilambo.

²²Doni, mwenu ambi apa munkuvanavo shipalodi kanji nangu ndamwona kavili na mitima vyenu vindapuwanga, lipuwilo alyo hapali wakumpoka.

²³Muliduva alyo hashipali shamulota kungudya. Nangu ninkumwaulila mwiu doni, shoeshoe shamunjugwa Atata palina lyangu, nae andamupa.

²⁴Mpaka ambi apa hashipali shamunjugwile palina lyangu nangu. Jugwa mundapata kwambangidya lipuwilo lyenu liwikile popo.

²⁵“Vinu avi nditangola kwamikong'o; undawika wakati wandikatangola ngutumila mikong'o, napane kwamwaa umwe Atata nammalangangila ngala.

²⁶Muliduva alyo mundajugwa palina lyangu. Hangunatangola shinu kenga nangu nanjugwila kumwe Atata

²⁷mwaa jo mwene Atata aju ankunnagwaledya mwenu kwoda mwenu muningunagwaledya nangu na muningukulupila kenga ngwaleké kumwe Nnungu.

²⁸Nangu ngwaleké kumwe Atata kutwala kwida mushilambo shapai, napane ninkuma mushilambo amu kuujila kumwe Atata.”

²⁹Vakwoda vake kutwala kushidoni, “Napanelo unkutangola ngala haunatumila shinu mikong'o.

³⁰Wetu napane ambi tunkumanya kenga wako undimanya kula shinu na haunalindila shinu vanu vakuudyangidye. Napavedoni tunkukulupila kenga walakadilé kumwe Nnungu.”

³¹Yesu kutwala kushidoni, “Da napane munkukulupila?

³²Mwenu! Wakati unkuwika na wakati wene ni wowo au wavalota kummwadilikanianga kula munu kuka kwing'ande yake. Munanguleka gweka yangu kanji hangunava shinu gweka, Atata apali pamo namu nangu.

³³Vinu avi nangu nimwaulila pakulota nkati mwangu, mwenu muvenavo amani. Mushilambo mundapata mauvilo kanji lyunge ntima; nangu nditema shilambo.”