Read Ibibiliya mu Shimakonde Imbodi Yaambi na dimbande dya Imbodi Yakala Nshuwau 17 Bible Online

Nshuwau 17 - Ibibiliya mu Shimakonde Imbodi Yaambi na dimbande dya Imbodi Yakala bible

Nshuwau 17

¹Yesu akatangole davo andínyanyula shilaka kulola kuwa kutwala kushidoni, “Atata, wakati undiwika! Mupe mwanavo lishangelo pakulota nanae akupe lishangelo

²kenga mo mwaumpalale wako madalaka pashanya pavanu uti pakulota avape shingumi shíkamalilika avalá vaunkamudidye.

³Shingumi shíkamalilika sho ni ashi, vakumanye wako kuva Nnungu wiu úvele jumo jojo na vammanye aijá wauntumididye, Yesu Klistu.

⁴Nangu ndikupa lishangelo mushilambo pangumalidile shimadengo uti shaungukamudidye ngutende.

⁵Nadoni napanelo Atata ngupa lishangelo pamevo pako, lishangelo lyolyo lyanguvénavo pamo namu wako shilambo shikanava kukandyangigwa.

⁶“Nangu nditadya lina lyako limanyike kwa avalá vaungupele mushilambo amu. Vovo vo, vavelé vako kutwala wako kungupa nangu na vanavo vankwigwilila lilove lyako.

⁷Ambi apa vanavo vandimanya kenga uti vyaungupele vyàlakadile kwako

⁸mwaa lilove lyaungupele, nangu ndivapa na vanavo vandipwashalela; vandimanya mwiu kenga nangu ngwalakadilé kwako na vandikulupila kenga wako uningutumidya.

⁹“Nangu ninkuvajugwila vanavo; hangunavajugwila shinu vashilambo, ila avalá vaungupele mwaa vàko wako umwene.

¹⁰Uti vyanguvenavo vyàko na uti vyauvenavo vyàngu, nadoni nangu ndipata lishangelo kwaindila yavanavo.

¹¹Hangupagwa shinu kavili mushilambo amu ila vanavo vandapagwa mushilambo; nangu ninkwida kwako. Atata Wakwilimyanga, vashunge mulina lyako, lina ali lyaungupele pakulota vave shinu shimo kenga mwatuvalalele wetu.

¹²Nangu pangushipagwa namu vanavo, ndivashunga mulina lyako, lina lyo lyaungupele. Ndivalaledya, hapali ata jumo ájaike. Ajaiké aijá wavampangidile kubamalegwa kwambangidya awikile popo Maandiko.[60]

¹³“Napanelo ambi apa ninkwida kwako; vinu avi ninkutangola ngùvele mushilambo pakulota mmitima myave lyumbale likulupililo lyangu.

¹⁴Nangu ndivapa lilove lyako kutwala vashilambo kuvavangedya mwaa havanava shinu vashilambo; vanavo vavelé mo mwanguvalalele nangu ndikave washilambo.

¹⁵Hangunajugwa shinu uvaumye mushilambo ila uvashunge kwa aijá nkalau.

¹⁶Vanavo havanava shinu vashilambo kenga mo mwanguvalalele nangu ndikave washilambo.

¹⁷Lyapulile nkati muumwiu;[61] lilove lyako ni umwiu.

¹⁸Mo mwaungutumididye wako mushilambo, nanangu ndivatumidya mushilambo.

¹⁹Kwamwaa wavanavo nangu ninkulyapulila pakulota navanavo momo valyapulile nkati muumwiu.[62]

²⁰“Nangu navajugwila shinu gweka vanavo; ninkuvajugwila momo uti avalá valóta kungukulupila nangu kwaindila yantenga wave.

²¹Vanavo uti vave shinu shimo kenga mo mwaupagwididye wako Atata nkati mwangu na nangu kupagwa nkati mwako. Navanavo momo vave nkati mwetu pakulota shilambo shikulupile kenga wako uningutumidya.

²²Lishangelo lyolyo lyaungupele, nanangu ndivapa pakulota navanavo vave shinu shimo kenga mo mwatuvalalele wetu;

²³nangu ngupagwe nkati mwave, wako upagwe nkati mwangu; vadyavalele muupamo kwambangidya shilambo shimanye doni, wako uningutumidya na unkuvanagwaledya kenga mo mwaungunagwaladyedya nangu.

²⁴“Atata, vaungupele vo, ninkulota vapagwe po panguvele nangu vone lishangelo; lishangelo lyo lyaungupele mwaa uningunagwaledya shilambo shikanava kukandyangigwa.

²⁵Atata Waishaliya, ata ikava kenga shilambo hashikumanyite, nangu ndikumanya na vavéle namu nangu ava, vandimanya kenga wako uningutumidya.

²⁶Nangu ndivatadya vamanye lina lyako namomo ndauka mushu ndivatadya vakumanye pakulota linagwaledyo lyauvenavo kwangu nangu lipagwe nkati mwave na nangu ngupagwe nkati mwave.”