Read Ibibiliya mu Shimakonde Imbodi Yaambi na dimbande dya Imbodi Yakala Nshuwau 18 Bible Online

Nshuwau 18 - Ibibiliya mu Shimakonde Imbodi Yaambi na dimbande dya Imbodi Yakala bible

Nshuwau 18

¹Napanelo pamalidile kushwali, andyúma pamo na vakwoda vake kuka mwangu unji walundi lwa Kedeloni. Mwangu unji walundi alwo, lindípagwa liteka, nae akainjila na vakwoda vake.

²Napane Yudashi aijá namalimya wakunnimya Yesu andímanya lyutu alyo mwaa myanda vyoe Yesu ashindauka na vakwoda vake mulyutu alyo.

³Jo Yudashi jo andyúka kuliteka àvenavo shipinga shavaing'odo pamo na vakushunga vakwalakela kwavanang'olo vakulangalalela-shadaka na mapalishayo vànyukatenge vyenje, ditoshi na dyuti.

⁴Yesu àmanyite avi uti víshilota kuntandeka, andílyumilidya kutwala kuvaudya, “Munnambela nyani?”

⁵Vanavo, “Yesu wa ku Nashaleti.” Yesu kushidoni, “Ni nangu apa.” Bai Yudashi aijá namalimya andípagwa pamo na vanavo.

⁶Napanelo Yesu pavaulidile doni, “Ni nangu apa,” vanavo vandyújila kunyuma kutwa kugwanginneu.

⁷Nae kuvaudya kavili, “Da munnambela nyani?” Vanavo doni, “Yesu wa ku Nashaleti.”

⁸Yesu kushidoni, “Nangu nimwaulila, ni nangu apa. Napane ikava kenga mwenu mungulambela nangu, valeke ava vauke.”

⁹Vinu avi vinditandeka pakulota liwikile popo lilove lyatangwéle jo mwene doni, “Vaungupele uti, hapali ata jumo ángujaike.”

¹⁰Napanelo Simoni Patulu e anyukéte lyambila, andyálamola kutwala kupanyula lyatu lyakunkanakono lyantumika wake nkúlangalalela-shadaka nkumene. Lina lyantumika ajo, livele Maluku.

¹¹Yesu napane kumwaulila Patulu doni, “Kondya lyambila! Da hangunakumbile shikombe shangupele Atata?”

¹²Nadoni shipinga shavaing'ondo pamo namu nanangalaledi wave na vakushunga vavayuda vakankamula Yesu vakamunga.

¹³Shitandi vakamuukanavo kumwe Anashi nkwegwe Kaipashi e avéle nkúlangalalela-shadaka nkumene mumwaka awo.

¹⁴Kaipashi aju ni jojo aijá e avaulidíle vayuda doni, ni shambone kuvapalela venentete munu jumo bai.

¹⁵Napanelo Yesu vashindamwoda Simoni Patulu pamo na nkwóda junji. Nkwóda aju, pakuva vandímanyana namu nkúlangalalela-shadaka nkumene, nae andíinjila pamo namu Yesu mpaka mulugwani lwanang'olo ajo.

¹⁶Patulu napane andíimila panda pannango alindila. Nkwóda aijá e amanyíke na nkúlangalalela-shadaka nkumene, andyúja kuka ndatangola namu mwali nkúshunga-nnango kutwala kumwidanavo Patulu nkati.

¹⁷Mwali jo kumudya Patulu, “Da wako i unkwóda pakati pavakwoda vake munu aju?” Nae kushidoni, “Mene, hangunava nangu.”

¹⁸Ishindadidima imepo, vatumika pamo na vakushunga vandítang'anedya moto wavakang'íle pakulota vajote. Patulu nanae andípagwa na vanavo àimidile ajota moto.

¹⁹Napanelo nkúlangalalela-shadaka nkumene andímuudyangidya Yesu yavakwoda vake na mapundisho ake.

²⁰Yesu kutwala kushidoni, “Nangu nditangola ngala na shilambo; ndipundisha ngwengwe muvitala vyakulipudidya na mwing'ande ya Nnungu mwavakadyania uti vayuda. Hashipali shangutangwele kwashipii.

²¹Napane mwaa shani munkungudya? Vaudye avalá vangwigwíte. Vanavo vandimanya shana ashilá shangushitangola.”

²²Akajang'ule davo, nkúshunga jumo e ammandíke, anínkanyola lilatuma aashidoni, “Wako unjang'ula davo nkúlangalalela nkumene?”

²³Yesu kushidoni, “Ikava kenga nangu nditangola kunyata, umya ushuda wakunyata wene wo! Kanji ikava kenga nditangola viu mwaa shani unangukanyola?”

²⁴Bai Anashi aníntumidya Yesu vàmuungile mmakono kumwe Kaipashi, aijá nkúlangalalela-shadaka nkumene.

²⁵Napanelo Simoni Patulu akuno àimidile ajota moto, vanavo vandímudya, “Da wako momo i unkwoda pakati pavakwoda vake?” Nae kukana aashidoni, “Mene, hangunava nangu.”

²⁶Ntumika jumo umwe nkúlangalalela nkumene, mulikola wake aijá wannumwíle Patulu lyatu kutwala kushidoni, “Da nangu handikugwene ùvele namu nae paliteka apalá?”

²⁷Patulu kukana kavili. Bai muwakati wowo ng'uku kukangavalenneu.

²⁸Kavili vayuda vandímumya Yesu paing'ande imwe Kaipashi kumuukanavo kumwe gavana. Wakati wene wo uvele lyamba linyeiku, napane vanavo pavakalota kulitaa udagwa, havainjidíle nng'ande vajopa pakulota vaulule kulya Pasaka.

²⁹Nadoni Pilatu andyúma kuka ndatangola na vanavo kutwala kuvaudya, “Munu aju mummalanganga makosha shani?”

³⁰Vanavo vakanjang'ula kushidoni, “Nae leka akavele nkalau, hatunamwidenavo ndakukamudya wako.”

³¹Pilatu kushidoni, “Ntwale mmene mukamuukumu kenga mwalitangalela lilamulo lyenu.” Vayuda kushidoni, “Wetu hatuvenavo lilamulo lyakumpambilila munu woewoe.”

³²Avyo vindítandeka pakulota liwikile popo lilove lyatangwéle Yesu avalanganga inamuna yalota kupela nae.

³³Pilatu andíinjila kavili nng'ande kutwala kunshema Yesu kumudya, “Wako ni umu wavayuda?”

³⁴Yesu kushidoni, “Da kudya aku kwàko wako umwene kwali vapali vakwaulidíle yangu?”

³⁵Pilatu akajang'ula, “Da nangu po ni muyuda? Vakwenu pamo na vanang'olo vavakulangalalela-shadaka ni vakutumidídye kwangu nangu. Da ukashidyé nyamani?”

³⁶Yesu kushidoni, “Utawala wangu haunava shinu washilambo ashi. Leka ùvele washilambo ashi, vatumika vangu vakanditenda ing'ondo vangushililidya pakulota nangu hangunakamuligwe na vayuda. Kanji napanelo utawala wangu haunava shinu washilambo ashi.”

³⁷Pilatu kutwala kushidoni, “Bai wako po, umu!” Yesu akajang'ula, “Wako ni úvalanganga. Kwakutangola mwiu ndivalekwa kwamwaa au na kwamwaa wowo ndida mushilambo amu pakulota ngumye ushuda kwaumwiu. Uti avalá vaumwiu, vankwigwa lidi lyangu.”

³⁸Pilatu kumudya, “Da umwiu ni nyamani?” Nae akatangole malove ala andyújila kwavayuda kutwala kushidoni, “Munu aju nangu hangunamwona makosha.

³⁹Nadoni mwenu mundivanavo lidyavalelo lyakumuungulilila nkúngwa jumo muwakati wa Pasaka. Napane mulota nimuungulilile ‘umu wavayuda’?”

⁴⁰Vanavo kwakujang'ula kwave, vandíjunga vaashidoni, “Mene, nae mene! Tunnota Balabashi!” Mwenu, Balabashi aju avele nkalau.