Read Ibibiliya mu Shimakonde Imbodi Yaambi na dimbande dya Imbodi Yakala Nshuwau 19 Bible Online

Nshuwau 19 - Ibibiliya mu Shimakonde Imbodi Yaambi na dimbande dya Imbodi Yakala bible

Nshuwau 19

¹Bai Pilatu andílamulila Yesu vanshape viboko.

²Vaing'ondo vakakandyanga lidaka lyadimiva kutwala kungwadya mmuti. Vaníngwadya ikanju yailangi yanshambalau

³kutwala kummandika kumwaulila kushidoni, “Shikamu, umu wavayuda!” Namomo vashinankanyola malatuma.

⁴Mwanda unji kavili Pilatu andyúmilila panda kutwala kuvaulila vayuda doni, “Mwenu! Ninkumwidanavo munu aju kwenu pakulota mumanye doni, nangu hangunamwona makosha.”

⁵Bai Yesu andyúmila panda àgwete lidaka lyadimiva mmuti na ikanju yailangi yanshambalau. Pilatu kutwa kuvaulila kushidoni, “Mwenu! Munu jo, aju.”

⁶Vanang'olo vavakulangalalela-shadaka pamo na vakushunga pavangwene vandíjunga vaashidoni, “Mpambilile! Mpambilile!” Pilatu kutwala kushidoni, “Ntwale mwenu po, mukampambilile. Nangu, hangunamwona makosha.”

⁷Vayuda vandíjang'ula, “Wetu tunkuvanavo lilamulo na kwodananavo lilamulo ali, nae inimmaikila apele mwaa andilivalanga kuva Mwana wa Nnungu.”

⁸Paigwite malove alo, Pilatu andímamodya kujopa

⁹kutwala kuujila kavili nng'ande. Napane andímudya Yesu doni, “Da wako kwenu kwashi?” Kanji Yesu hanjang'wíle.

¹⁰Pilatu kushidoni, “Hautamwa kungujang'ula? Da haunamanya shinu kenga ninkuvanavo madalaka akukuleka wako kuka kwali akukukamela panshalaba?”

¹¹Yesu kushidoni, “Wako haunavenavo madalaka kwangu nangu leka madalaka alo akaalakadile kuwa. Nadoni aijá ángukamudidye kwako wako ni ávenavo madambi akumamodya.”

¹²Kutunduvangila apo Pilatu ashindalambela mwakumuungulila Yesu kanji vayuda vashindajunga vaashidoni, “Ukamuungula munu aju, wako haunava shinu umuje Shashali. Mwaa woewoe álivika kuva umu, ankumpinga Shashali.”

¹³Paigwite malove alo, Pilatu andímwidanavo Yesu panda kutwala kwikala paikiti yake yaukumu lyutu lyavashema shimbambanda shamajanga, mushibalaniya Gabata.

¹⁴Napanelo uve wakati waliduva pamuti liduva lyaishumana yakulipanganianga Pasaka. Pilatu andívaulila vayuda kushidoni, “Mwenu! Umu wenu jo ajo!”

¹⁵Napane vanavo vandíjunga vaashidoni, “Mmalidye! Mmalidye! Mpambilile panshalaba.” Pilatu kuvaudya, “Da mulota nimpambilile panshalaba umu wenu?” Vanang'olo vavakulangalalela-shadaka kutwala kushidoni, “Hatuvé umu junji ila Shashali tu bai.”

¹⁶Kumwisho kwake Pilatu andívapa pakulota vauke vakampambilile panshalaba. Nadoni vanavo vakantwala Yesu.

¹⁷Nae ànyukete nshalaba wake, andyúma kuka pashinu pavashema Lyutu lya Shivanga, alilá lishaméka mushibalaniya Gologota.

¹⁸Popo po vanímpambilila panshalaba pamo namu nae vanu vanji vavili, junji nkono au, junji nkono au, Yesu pakati.

¹⁹Napanelo Pilatu kwandika malove mulibau kuka ndakamela panshalaba; malove alo aandike doni, “YESU NNASHALETI, UMU WAVAYUDA.”

²⁰Vayuda voe vandíshomya shavaandíke mulibau alyo mwaa palyutu lyavampambilidíle Yesu, lindívandika na panjini namomo libau alyo vaandike mushibalaniya, mushilatini na mushigalegu.

²¹Vanang'olo vavakulangalalela-shadaka vavayuda vanímpinga Pilatu vaashidoni, “Haunaandike doni, ‘Umu Wavayuda,’ ila, ‘Aju atédoni, Nangu Umu Wavayuda.’ ”

²²Pilatu kushidoni, “Shangwandike, ndyandika!”

²³Napanelo Yesu vakampambilile, vaing'ondo vandítwalanga dinguvo dyake kujavanianga mapungu nsheshe, kula mwing'ondo kupata lipungu lyake kutwala kubakila ikanju. Ikanju yo havatatíle ivele vila kuma kushanya mpaka pai.

²⁴Nadoni vaing'ondo vandyáulanila doni, “Ikanju ai hatunapapulange. Leka tuntende gudugudu pakulota tummanye nyani álota kupata.” Avi vindítandeka pakulota awikile popo Maandiko aashidoni, “Vandijavananga dinguvo dyangu na ikanju yangu, vanditandela gudugudu.”[63] Ashi ni shavatandile vaing'ondo.

²⁵Napanelo pepi na panshalaba umwe Yesu andípagwa anyoke, nkulugwe anyoke, Maliya ndyagwe Kolopashi namu Maliya wa ku Magadalena.

²⁶Yesu napane pangwene anyoke pamo na nkwóda wake aijá washinnagwaledya vàvele pamo, andímwaulila anyoke doni, “Mwanavo ajo apo,”

²⁷kutwala kumwaulila nkwóda jo kushidoni, “Anyoko ajo apo.” Kutunduvangila muwakati wowo wo, nkwóda aijá anímpwashalela kutwala kumuukanavo kwing'ande kwake.

²⁸Ling'oto lya avyo Yesu amanya kenga uti vindimalilika na pakulota Maandiko awikile popo, nae andítangola kushidoni, “Inangukola inyota.”

²⁹Popo po shindípagwa shitumba shavaumbadídye medi aulimu. Bai vandítwala shipande shaivonu, kupambya munkungulandi, kushuvika mmedi aulimu amulá kuka nampaka pakanywa.

³⁰Nae akalinge medi alalá, andítangola kushidoni, “Vindiwikila popo.” Bai andítepya muti wake kutwala kujaa imumu.

³¹Nadoni pakuva livele liduva lyakulipanganianga liduva lyakupumula na pakuva liduva lyakupumula alyo livele likumene namene, bai pakulota mili avilá havinapagwe panshalaba muliduva lyakupumula, vayuda vanínjugwa Pilatu doni, madodo avanu avalá vatamange na mili vyo, vaushe.

³²Vaing'odo kutwala kuka ndatamanga madodo amunu ntandi na wambili ve vavapambilidíle pamo namu Yesu.

³³Kanji pavawikile pamwe Yesu, vakamwone àpadile nae po madodo havantaménge.

³⁴Napane mwing'ondo jumo aníntalola Yesu nkushi ndimbau kutwala kuuminneu myadi na medi.

³⁵Aijá ágwene vinu avi andyumya ushuda na ushuda wake ni waumwiu. Nae andimanya kenga ankuvalanganga umwiu; ankuvalanganga pakulota namwenu momo mukulupile.

³⁶Vinu avyo vitandeke pakulota awikile popo Maandiko aashidoni, “Halipagwa ligwangwa lyake ata limo lilóta kutameka,”[64]

³⁷na kavili kenga mwatangalela Maandiko anji doni, “Vanannola aijá wavantalwele nkushi.”[65]

³⁸Napanelo vikapite vinu avyo, Yoshe wa ku Alimateya, nkwóda wake Yesu kanji shipiipii kwamwaa wakuvavajopa vayuda, nae anínjugwa Pilatu mili umwe Yesu. Pilatu kulamulila, nae kutwala kuka ndausha mili aulá kuukanavo.

³⁹Namomo Nikodemu aijá amuukidíle kunantandi Yesu shilo nanae andyúka ànyukete mauta akunung'angila na ubani shilinga shadikilu salasini.

⁴⁰Vanavo pavatwete mili umwe Yesu aulá, vandyávilidyanga mushanda yakunamikanga kutwala kuminyangila mauta akunung'angila kwodana na madyavalelo avayuda nkati mukushika.

⁴¹Palyutu lyavampambilidíle Yesu lindípagwa liteka; mo muliteka mo lindípagwa likabuli lyaambi lyavakanava kunshika munu.

⁴²Napane pakuva livele liduva lyakulipanganianga lyavayuda; namomo kwoda likabuli alyo livele pepi, vanavo vanínshika Yesu mulikabuli alyo.